ខេត្តតាកែវ ៖ រហូតមកទល់ពេលនេះបណ្តឹងទាក់ទងនឹងការចោទប្រកាន់ព្រះសង្ឃនាម ធៀប សេងគី អតីតព្រះចៅអធិការវត្តប្រាសាទមានជ័យ ស្ថិតនៅឃុំដូង ស្រុកបាទី ខេត្តតាកែវ មិនទាន់មានដំណោះស្រាយដោយយុត្តិធម៌នៅឡើយទេ ប៉ុន្តែប្រជា ពលរដ្ឋរាប់រយនាក់ដែលជាពុទ្ធបរិស័ទចំណុះជើងវត្តបានផ្តិតមេដាយលើញតិ្តគាំទ្រមួយដោយបញ្ជាក់ពីភាពស្អាតស្អំរបស់ព្រះសង្ឃអង្គ
ខេត្តតាកែវ ៖ រហូតមកទល់ពេលនេះបណ្តឹងទាក់ទងនឹងការចោទប្រកាន់ព្រះសង្ឃនាម ធៀប សេងគី អតីតព្រះចៅអធិការវត្តប្រាសាទមានជ័យ ស្ថិតនៅឃុំដូង ស្រុកបាទី ខេត្តតាកែវ មិនទាន់មានដំណោះស្រាយដោយយុត្តិធម៌នៅឡើយទេ ប៉ុន្តែប្រជា ពលរដ្ឋរាប់រយនាក់ដែលជាពុទ្ធបរិស័ទចំណុះជើងវត្តបានផ្តិតមេដាយលើញតិ្តគាំទ្រមួយដោយបញ្ជាក់ពីភាពស្អាតស្អំរបស់ព្រះសង្ឃអង្គនោះ និងទាមទារឱ្យសមត្ថកិច្ចពាក់ព័ន្ធ រួមទាំងព្រះមេគណខេត្តតាកែវ និងមេគណស្រុកបាទីផ្តល់យុត្តិធម៌ដល់ព្រះអង្គ និងសុំឱ្យបានធ្វើជាព្រះចៅអធិការវត្តឡើងវិញ ។
អតីតព្រះចៅអធិការវត្តប្រាសាទមានជ័យព្រះនាមធៀប សេងគី បានរងការចោទប្រកាន់ថា បាននាំស្រីចូលដេកក្នុងកុដិ នាយប់ថ្ងៃទី២ ធ្នូ ឆ្នាំ២០១១ ហើយក្រោយមកត្រូវព្រះអនុគណស្រុកបាទីព្រះនាមភួង ម៉ិញ បង្ខំឱ្យព្រះអង្គសឹកជាបន្ទាន់ ។ ការចាប់បង្ខំឱ្យអតីតព្រះចៅអធិការវត្តព្រះនាមធៀប សេងគី សឹកយ៉ាងប្រញាប់ប្រញាល់នោះមិនបានធ្វើឱ្យពុទ្ធបរិស័ទសប្បាយចិត្តឡើយ ហើយពួកគាត់នាំគ្នាធ្វើលិខិតប្តឹងទៅសម្តេចអគ្គមហាសេនាបតីតេជោ ហ៊ុន សែន ដើម្បីជួយអន្តរាគមន៍រកយុត្តិធម៌ ។
ក្រសួងធម្មការនិងកិច្ចការសាសនា រួមទាំងមន្ទីរធម្មការខេត្ត អាជ្ញាធរមូលដ្ឋានបានសើុបអង្កេតករណីនោះ ហើយរកឃើញថា ការចោទប្រកាន់លើអតីតព្រះចៅអធិការវត្តព្រះនាមធៀប សេងគី ថាបានប្រព្រឹត្តទោសក្នុងបទបារាជិកប្រាសចាកទៅនឹងពុទ្ធប្បញ្ញត្តិនោះគឺមិនពិតប្រាកដទេ ប៉ុន្តែគឺជាគម្រោងការឃុបឃិតគ្នា រវាងមនុស្សមួយចំនួនតូចដោយជួលស្ត្រីឈ្មោះឆេង ផល្លី ក្នុងតម្លៃ២០ម៉ឺនរៀល ឱ្យលួចចូលទៅក្នុងកុដិរបស់ព្រះចៅអធិការ ក្នុងពេលយប់ដើម្បីក្លែងបន្លំទម្លាក់កំហុសលើព្រះអង្គ ។
យោងតាមលិខិតផ្លូវការមួយរបស់មេឃុំដូង បញ្ជាក់ថា ស្ត្រីឈ្មោះឆេង ផល្លី បានសារភាពថា នាងត្រូវឈ្មោះឃុំ រុន និងសង្ឃនាមវ៉ា ម៉ៅ ជួលក្នុងតម្លៃ២០ម៉ឺនរៀល ដើម្បីរៀបចំឆាកល្ខោនបង្ខូចព្រះកិត្តិយសអតីតព្រះចៅអធិការវត្តព្រះនាមធៀប សេងគី ដោយឱ្យរូបនាងបន្លំចូលទៅក្នុងកុដិរបស់ព្រះអង្គ ហើយជនទាំង២នាក់នោះរួមទាំងបក្សពួកមួយចំនួនទៀតជាអ្នកស្រែកឆោឡោ និងទម្លាក់កំហុសលើព្រះអង្គ ។
ក្រោយពីការស៊ើបអង្កេតរបស់ជំនាញពាក់ព័ន្ធរកឃើញថា អតីតព្រះចៅអធិការអង្គនោះមិនមានកំហុសដូចជាការចោទប្រកាន់ សម្តេចព្រះសង្ឃនាយកនន្ទ ង៉ែត បានអនុញ្ញាតជាផ្លូវការឱ្យព្រះតេជគុណធៀប សេងគី បួសជានេនឡើងវិញនៅអំឡុងខែមេសា ឆ្នាំ២០១២ ហើយត្រូវញោមរបស់ព្រះអង្គសុំនិមន្តឱ្យទៅគង់នៅវត្តឈូងលាប ព្រះសីហនុរាជស្រុកស្អាង ខេត្ត កណ្តាលវិញ ។
បន្ទាប់មកប្រជាពលរដ្ឋនៅក្នុងឃុំដូងបានសុំនិមន្តអតីតចៅអធិការធៀប សេងគី ទៅគង់ចាំព្រះវស្សានៅវត្តប្រាសាទមានជ័យវិញ ព្រោះព្រះអង្គមិនមានកំហុសដូចការចោទប្រកាន់ ហើយបានកសាងវត្តមានការរីកចម្រើនលើគ្រប់វិស័យយ៉ាងឆាប់រហ័ស ។ ទោះជាយ៉ាងណាក្តី អតីតចៅអធិការអង្គនោះបានរងនូវបណ្តឹងពីព្រះអនុគណស្រុកបាទី ព្រះនាមភួង ម៉ិញ ម្តងទៀតដោយយកលេសរឿងរា៉វពីលើកមុន ហើយធ្វើលិខិតមួយច្បាប់និមន្តព្រះតេជគុណធៀប សេងគី ទៅប្រជុំ។
ក្នុងពេលប្រជុំនោះមានប៉ូលិសយាមកាមមិនឱ្យអ្នកណាម្នាក់ចូលជិតឡើយ ។ បន្ទាប់មកព្រះអនុគណស្រុកបានចាប់បង្ខំព្រះតេជគុណនាមធៀប សេងគី ឱ្យសឹកជាលើកទី២ ដោយចោទប្រកាន់ថា ព្រះអង្គមិនគោរពវិន័យសង្ឃ ។ ការចាប់បង្ខំឱ្យសឹកនោះមិនបានធ្វើឱ្យប្រជាពលរដ្ឋជាពុទ្ធបរិស័ទចំណុះជើងវត្តស្ងប់ចិត្តឡើយ ហើយបាននាំគ្នាតវ៉ា និងសុំឱ្យព្រះតេជគុណធៀប សេងគី បួសឡើងវិញ ។
ក្រោយមកមានព្រះលិខិតមួយរបស់សម្តេចព្រះសង្ឃនាយករង អំ លឹមហេង អនុញ្ញាតឱ្យព្រះតេជគុណធៀប សេងគី បួសត្រឹមតែជាសាមណេរអស់មួយជីវិតពុំអាចបួសជាភិក្ខុបានឡើយ។ប្រជាពលរដ្ឋរាប់រយនាក់ដែលបានធ្វើលិខិតគាំទ្រនិងសុំឱ្យសមត្ថកិច្ចពាក់ព័ន្ធផ្តល់យុត្តិធម៌ពិតប្រាកដដល់អតីតព្រះចៅអធិការព្រះនាមធៀប សេងគី បានលើកឡើងថា ការចោទប្រកាន់ទាំងឡាយគឺត្រូវបានរកឃើញការពិតអស់ហើយ ថា ព្រះតេជគុណធៀប សេងគី មិនបានប្រព្រឹត្តកំហុសទេ ដូច្នេះត្រូវតែផ្តល់យុត្តិធម៌ដល់ព្រះ
អង្គ ។
ជួបជាមួយកោះសន្តិភាពនៅក្នុងវត្តប្រាសាទមានជ័យ ស្ថិតនៅឃុំដូង ស្រុកបាទី កាលពីថ្ងៃទី២៥ កញ្ញា ឆ្នាំ២០១២ លោកមេឃុំ ប៉ូលិសប៉ុស្តិ៍ អាចារ្យ គណៈកម្មាធិការវត្តបានឱ្យដឹងដូចគ្នាថា វត្តប្រាសាទមានជ័យនេះកាលពីដើមឡើយមិនមានការរីកចម្រើនទេ លុះពេលនិមន្តព្រះតេជគុណធៀប សេងគី មកគង់ធ្វើជាចៅអធិការវត្ត ព្រះអង្គក៏ទាក់ទងសប្បុរសជនក្នុងក្រៅនិងក្រៅប្រទេសកសាងបានព្រះវិហារ ចាក់សាបទីធ្លាវត្ត ធ្វើដងទង់១គូ និងកសាងសាលាឆាន់ដែលលេចចេញជារូបរាងទៅហើយនោះ ។
លោកណុប ទូច មេឃុំដូងរៀបរាបឱ្យដឹងថាទាំងអាជ្ញាធរ ទាំងប្រជាពលរដ្ឋគោរពស្រឡាញ់ព្រះចៅអធិការគ្រប់គ្នា ព្រោះតែព្រះអង្គមានស្នាព្រះហស្តកសាងបានច្រើន និងធ្វើឱ្យវត្តមានកេរ្តិ៍ឈ្មោះល្បី ។ ព្រោះតែប្រជាប្រិយភាពរបស់ព្រះអង្គនេះហើយ ទើបធ្វើឱ្យសង្ឃខ្លះនៅក្នុងវត្តមានការច្រណែន ហើយរៀបចំល្បិចទម្លាក់កំហុសលើព្រះអង្គ ។
មន្ត្រីជាន់ខ្ពស់ក្រសួងធម្មការនិងកិច្ចការសាសនាមួយរូបដែលសុំមិនបញ្ចេញឈ្មោះអះអាងថា ការចោទប្រកាន់អតីតព្រះចៅអធិការវត្តប្រាសាទមានជ័យព្រះនាមធៀប សេងគី ថាបានប្រព្រឹត្តទោសក្នុងបទបារាជិកនោះគឺមិនពិតទេ ប៉ុន្តែគឺជាការមួលបង្កាច់ និងទម្លាក់កំហុសដោយអយុត្តិធម៌ និងរកលេសផ្សឹកព្រះអង្គតែប៉ុណ្ណោះ។ មន្ត្រីរូបនោះបន្តថា ក្រោយពីក្រសួងធម្មការនិងកិច្ចការសាសនាទទួលបានបណ្តឹងពីប្រជាពលរដ្ឋ ក្រសួងបានធ្វើលិខិតទៅសម្តេចព្រះសង្ឃនាយកនន្ទ ង៉ែត ដើម្បីស្រាវជ្រាវ ហើយបន្ទាប់ពីស្រាវជ្រាវគឺរកឃើញថា មានមនុស្សមួយក្រុមបានរៀបចំគម្រោងការជួលស្ត្រីម្នាក់ក្នុងតម្លៃ២០ម៉ឺនរៀល ដើម្បីឱ្យចូលទៅសម្ងំក្នុងកុដិអតីតព្រះចៅអធិការវត្តក្នុងពេលយប់ ហើយពួកគេធ្វើជាភ្ញាក់ផ្អើលឆោឡោ និងរកលេសចោទប្រកាន់តែម្តង ប៉ុន្តែការពិតគឺព្រះតេជគុណអង្គនោះមានភាពស្អាតស្អំ បរិសុទ្ធ និងកាន់ធម្មវិន័យបានត្រឹមត្រូវណាស់ ។ មន្ត្រីក្រសួងធម្មការរូបនោះអំពាវនាវឱ្យមានការផ្តល់យុត្តិធម៌ដល់ព្រះតេជគុណធៀប សេងគី ផង ៕
ចែករំលែកព័តមាននេះ