រាជធានីភ្នំពេញ ៖ គណៈមេធាវីនៃព្រះរាជាណាចក្រកម្ពុជា កាលពីថ្ងៃទី២១ កញ្ញា ឆ្នាំ២០១២ បានកោះអញ្ជើញលោកសម រង្ស៊ី មេធាវីមិនប្រកបវិជ្ជាជីវៈ អត្តលេខ១០៨ ឱ្យចូលខ្លួនមកបំភ្លឺទាក់ទងដីកាស្ថាពររបស់សាលាឧទ្ធរណ៍ ហើយចំពោះករណីនេះ លោកសម រង្ស៊ីអាចប្រឈមនឹងការលុបឈ្មោះចេញពីបញ្ជីសមាជិកគណៈមេធាវីនៃព្រះរាជាណាចក្រកម្ពុជា ក្នុងពេលដ៏ខ្លីខាងមុខ បើសិនជាមិនចូលមកបំភ្លឺតាមការអញ្ជើញទេនោះ ។
លោកជីវ សុងហាក់ ប្រធានគណៈមេធាវីនៃព្រះរាជាណាចក្រកម្ពុជា កាលពីថ្ងៃទី២១ កញ្ញា បានចេញលិខិតកោះអញ្ជើញលោកសម រង្ស៊ី ឱ្យចូលខ្លួនមកបំភ្លឺដោយផ្ទាល់ដល់ក្រុមប្រឹក្សាគណៈមេធាវីនៃព្រះរាជាណាចក្រកម្ពុជានៅថ្ងៃទី៩ ខែតុលា ឆ្នាំ២០១២ ។ តាមប្រភពពីគណៈមេធាវីនៃព្រះរាជាណាចក្រកម្ពុជា កាលពីរសៀលថ្ងៃទី២៣ កញ្ញា បានប្រាប់កោះសន្តិភាពតាមទូរស័ព្ទថា គណៈមេធាវីនៃព្រះរាជាណាចក្រកម្ពុជាតម្រូវឱ្យលោកសម រង្ស៊ី ចូលមកបំភ្លឺផ្ទាល់ចំពោះក្រុមប្រឹក្សាគណៈមេធាវីនៃព្រះរាជាណាចក្រកម្ពុជា នៅថ្ងៃទី៩ ខែតុលា ខាងមុខទាក់ទងទៅនឹងដីកាស្ថាពររបស់សាលាឧទ្ធរណ៍ ។
សមាជិកគណៈមេធាវីមួយរូបមានប្រសាសន៍ថា ជាធម្មតាដីកាចូលជាស្ថាពរបញ្ជាក់ពីនីតិសម្បទារបស់បុគ្គល(សម រង្ស៊ី) មានទោសជាទណ្ឌិត បើទោះជាលោកសម រង្ស៊ី មិនបានប្រព្រឹត្តខុសវិជ្ជាជីវៈក៏ដោយ ។ ពេលណាក្លាយខ្លួនជាទណ្ឌិត វាមានទណ្ឌកម្មពីខាងគណៈមេធាវី ហើយទណ្ឌកម្មដែលត្រូវដាក់នោះមិនទាន់ដឹងថា ក្រុមប្រឹក្សាគណៈមេធាវីនៃព្រះរាជាណាចក្រកម្ពុជាត្រូវដាក់កម្រិតណាទេ ពីព្រោះអាស្រ័យទៅលើការសម្រេចរបស់ក្រុមប្រឹក្សានៃគណៈមេធាវី ។
ចំណែកប្រភពពីគណបក្សសម រង្ស៊ី បានអះអាងថា លោកជូង ជូងី មេធាវីរបស់លោកសម រង្ស៊ី កាលពីរសៀលថ្ងៃទី២៣ កញ្ញា បានបដិសេធមិនធ្វើអត្ថាធិប្បាយទេ ពីព្រោះលោកនៅមិនទាន់បានទទួលលិខិតកោះអញ្ជើញលោកសម រង្ស៊ី ពីគណៈមេធាវីនៃព្រះរាជាណាចក្រកម្ពុជានៅឡើយ ។ លោករង់ចាំទទួលបានលិខិតនោះពិនិត្យមើលសិន ទើបអាចនិយាយបាន ។
គណៈមេធាវីបន្តថា ការពិភាក្សារបស់ក្រុមប្រឹក្សាគណៈមេធាវី សម្រេចលុបឈ្មោះលោកសម រង្ស៊ី ចេញពីសមាជិកគណៈមេធាវីនៃព្រះរាជាណាចក្រកម្ពុជា ដោយយោងតាមមាត្រា៥៩នៃច្បាប់ស្តីពីលក្ខន្តិកៈមេធាវី និងយោងតាមមាត្រា៦ នៃក្រមសីលធម៌មេធាវី ។ លោកសម រង្ស៊ី បច្ចុប្បន្នមានឈ្មោះជាទណ្ឌិតតាមរយៈដីកាស្ថាពរសាលាឧទ្ធរណ៍ដែលតម្កល់សាលក្រមរបស់សាលាដំបូងខេត្តស្វាយរៀង ។
គេនៅចាំបានថា កាលពីដើមឆ្នាំ២០០៩សម្តេចហេង សំរិន ប្រធានរដ្ឋសភា បានសម្រេចលុបឈ្មោះលោកសម រង្ស៊ី ចេញពីបញ្ជីឈ្មោះសមាជិកសភានីតិកាលទី៤ និងពីបញ្ជីអ្នកតំណាងរាស្ត្រមណ្ឌលកំពង់ចាមជាស្ថាពរ ។ លោកសម រង្ស៊ី នៅមានរឿងព្រហ្មទណ្ឌនៅសាលាដំបូងរាជធានីភ្នំពេញជាច្រើនករណីទៀត ដែលបានសម្រេចសាលក្រមកំបាំងមុខដាក់ពន្ធនាគារជាង១០ឆ្នាំ ៕
ចែករំលែកព័តមាននេះ