រាជធានីភ្នំពេញ ៖ ឃ្លាំងស្តុកអេតចាយមួយកន្លែងត្រូវអគ្គិភ័យឆាបឆេះយ៉ាងសន្ធោសន្ធៅដោយសារតែការផ្ទុះកំប៉ុងហ្គាស ខណៈពេលដែលកម្មករនៅទីនោះត្រូវបានថៅកែប្រើឲ្យគ្រីបកំប៉ុងស្រាបៀរលាយឡំគ្នាជាមួយនឹងកំប៉ុងហ្គាសបណ្តាលឲ្យផ្ទុះលាន់សូរដូចរន្ទះត្រូវកម្មករពីរនាក់ប្តី-ប្រពន្ធរងរបួសដួលអុកគូទដេកដួលនៅនឹងកន្លែង ព្រមទាំងបង្កឲ្យមានជាអណ្តាតភ្លើងឆាបឆេះយ៉ាងសន្ធោសន្ធៅឡើងតែម្តង។ ហេតុការណ៍នោះបានកើតឡើងកាលពីវេលាម៉ោង៣រសៀលថ្ងៃទី២៥ កញ្ញា ។ ឃ្លាំងស្តុកអេតចាយដែលឆាបឆេះនេះមានទីតាំងស្ថិតនៅក្នុងភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ ។
ម្ចាស់ឃ្លាំងឈ្មោះផុន សារ៉េត ភេទប្រុស អាយុ៤៥ឆ្នាំ មានទីលំនៅផ្ទះលេខD៣០ ភូមិក្បាលដំរី សង្កាត់កាកាប ខណ្ឌពោធិ៍សែនជ័យ ។ ចំណែកឯអ្នករបួសពីរនាក់ដែលជាកម្មករគ្រីបកំប៉ុងអេតចាយនោះម្នាក់ឈ្មោះហ៊ីង សាវិន ភេទប្រុស អាយុ៤៧ឆ្នាំ និងប្រពន្ធឈ្មោះនាង សារ៉េត អាយុ៤៥ឆ្នាំ មានស្រុកកំណើតភូមិមុខដា ឃុំមុខដា ស្រុករមាសហែក ខេត្តស្វាយរៀង និងស្នាក់នៅក្នុងឃ្លាំងស្តុកអេតចាយខាងលើ ។
តាមប្រភពព័ត៌មានបានឲ្យដឹងថា នៅមុនពេលកើតហេតុខាងលើ កម្មករ២នាក់ប្តីប្រពន្ធនោះត្រូវបានថៅកែប្រើឲ្យគ្រីបកំប៉ុងអេតចាយបញ្ចូលគ្នាដែលក្នុងនោះមានកំប៉ុងស្រាបៀរ និងកំប៉ុងហ្គាសលាយឡំគ្នាផងដែរ។ នៅក្នុងខណៈពេលកំពុងគ្រីបនោះស្រាប់តែកំប៉ុងហ្គាសនោះបានផ្ទុះឡើងលាន់សូរដូចរន្ទះបណ្តាលខ្ទាតអំបែងកំប៉ុងស្រាបៀរ និងកំប៉ុងហ្គាសនោះត្រូវកម្មករ២នាក់ប្តីប្រពន្ធនេះដូចអំបែងគ្រាប់បែកដួលអុកគូទនិងដេកដួលនៅនឹងកន្លែង ព្រមទាំងមានអណ្តាតភ្លើងឆាបឆេះឡើងយ៉ាងសន្ធោសន្ធៅ និងមានផ្សែងហុយឡើងទៅលើយ៉ាងឃ្មួលខ្មៅតែម្តង ហើយក៏រលាកជនរងគ្រោះថែមទៀតផងដែរ ។
ប្រភពដដែលបានបន្តថា នៅក្នុងខណៈពេលភ្លើងកំពុងឆេះនោះក៏មានការផ្ទុះធុងហ្គាស និងកំប៉ុងហ្គាសលាន់សូរដូចគេបោកគ្រាប់បែកប្រយុទ្ធគ្នាក្នុងសមរភូមិជាប់សូរមិនដាច់គួរឲ្យខ្លាចស្ទើរតែមិនហ៊ានចូលទៅជិត។ ភ្លាមនោះអាជ្ញាធរ និងសមត្ថកិច្ចបានចុះទៅកាន់កន្លែងកើតហេតុ ហើយក៏មានរថយន្តពន្លត់អគ្គិភ័យចំនួន៦គ្រឿងរបស់អង្គភាពយោធាកងពលតូចង៧០ និងការិយាល័យពន្លត់អគ្គិភ័យនៃស្នងការដ្ឋាននគរបាលរាជធានីភ្នំពេញ ព្រម ទាំងរថយន្តកងរាជអាវុធហត្ថរាជធានីភ្នំពេញ ចេញអន្តរាគមន៍បាញ់ទឹកពន្លត់យ៉ាងសស្រាក់សស្រាំ ។ ការឆាបឆេះនោះត្រូវបានគេវាយតម្លៃថា មានការខូចខាតអស់ប្រមាណ៣០%ប៉ុណ្ណោះ និងមិនបានរាលដាលដល់ផ្ទះប្រជាពលរដ្ឋឡើយ៕
ចែករំលែកព័តមាននេះ