កីឡាករចន ធឺរី ខ្សែការពារក្លិប Chelsea ប្រកាសឈប់លេងឱ្យក្រុមជម្រើសជាតិអង់គ្លេស នៅមុនពេលមានការស៊ើបអង្កេតរឿងក្តីជាន់ឈ្លីលើជាតិសាសន៍កីឡាករអែនថុន ហ្វើឌីណង់ ខ្សែការពារក្លិប QPR របស់សមាគមបាល់ទាត់អង់គ្លេស (FA) ។កីឡាករចន ធឺរី ទើបតែរួចផុតរឿងក្តីមើលងាយជាតិសាសន៍ក្រោយពីតុលាការសម្រេចរឿងក្តីដែលកីឡាករអេនថុន ហ្វើឌីណង់ ប្តឹងចោទប្រកាន់ថា ចន ធឺរី មានឥរិយាបថមើលងាយជាតិសាសន៍ក្នុងអំឡុងពេលប្រកួត ខណៈពេល FA បានប្រកាសថានឹងធ្វើការស៊ើបអង្កេតរឿងខាងលើបន្តដោយកំណត់ពេលធ្វើការស៊ើបអង្កេតនៅក្នុងថ្ងៃទី២៤ កញ្ញា កន្លងមក ។
គួរបញ្ជាក់ថា នៅមុនពេលមានការស៊ើបអង្កេត កីឡាករចន ធឺរី បានប្រកាសលាឈប់ពីការលេងឱ្យក្រុមជម្រើសជាតិអង់គ្លេស នៅក្នុងអាយុ៣១ឆ្នាំ ដោយផ្តល់ពីហេតុផលថា ការដែល FA សម្រេចធ្វើការស៊ើបអង្កេតបន្ត ខណៈពេលតុលាការសម្រេចរួចមកហើយថា ខ្លួនគ្មានកំហុសធ្វើឱ្យខ្លួនមានអារម្មណ៍ថា FA គិតថា ខ្លួនប្រហែលមិនស័ក្តិសមសម្រាប់លេងឱ្យក្រុមជម្រើសជាតិ និងទទួលស្គាល់ថា វាជារឿងគួរឱ្យឈឺចាប់ក្នុងការសម្រេចចិត្តលើកនេះ ។នៅក្នុងការថ្លែងរបស់កីឡាករបញ្ជាក់ថា «ខ្ញុំបានប្រតិបត្តិយ៉ាងពេញលេញជាប់ជានិច្ចក្នុងការលេងឱ្យក្រុមជម្រើសជាតិ ប៉ុន្តែការសម្រេចរបស់ FA លើកនេះធ្វើឱ្យខ្ញុំឈឺចាប់ ខ្ញុំចង់ជូនពរដល់លោករ៉យ ហតសុន និងក្រុមជម្រើសជាតិឱ្យទទួលជោគជ័យក្នុងពេលអនាគត ។ ខ្ញុំនឹងលេងឱ្យ Chelsea សម្រាប់ទិសដៅដណ្តើមជើងឯកក្នុងប្រទេស និងនៅអឺរ៉ុប ។ ខ្ញុំសូមអរគុណដល់អ្នកគាំទ្រ និងក្លិបដែលគាំទ្រខ្ញុំជារៀងរហូតនាពេលកន្លងមក» ។
កីឡាករចន ធឺរី បានចូលលេងឱ្យក្រុមជម្រើសជាតិអង់គ្លេសចំនួន៧៦លើក ធ្លាប់ត្រូវដកចេញពីប្រធានក្រុមជម្រើសជាតិចំនួន២លើក ហើយជាចុងក្រោយនេះត្រូវរឹបអូសតំណែងជាប្រធានក្រុមកាលពីឆ្នាំ២០១០ ក្រោយពីមានដំណឹងថា មានសម្ព័ន្ធភាពជាមួយប្រពន្ធរបស់កីឡាករវេនប្រ៊ីដ ខ្សែការពារអតីតមិត្តរួមក្លិប Chelsea ៕
ចែករំលែកព័តមាននេះ