រាជធានីភ្នំពេញ ៖ គណៈកម្មាធិការអនុសាខាកាកបាទក្រហមកម្ពុជាខណ្ឌឫស្សីកែវរួមជាមួយសហគមន៍មូលនិធិនគរកាយវត្តព្រះពុទ្ធសាសនាកម្ពុជា កាលពីព្រឹកថ្ងៃទី២៤ កញ្ញា ២០១២ បាននាំយកអំណោយជាគ្រឿងឧបភោគបរិភោគ និងបច្ច័យមួយចំនួនទៅចែកជូនដល់ប្រជាពលរដ្ឋក្រីក្រចាស់ជរា និងផ្ទុកមេរោគអេដស៍ចំនួន១០គ្រួសារដែលរស់នៅក្នុងមូលដ្ឋាន សង្កាត់ទួលសង្កែ ខណ្ឌឫស្សីកែវ ។
ពិធីនេះបានរៀបចំធ្វើឡើងនៅក្នុងវត្តញាណរង្សី ស្ថិតក្នុងសង្កាត់ទួលសង្កែដោយមានការនិមន្ត និងអញ្ជើញចូលរួមចែកដោយផ្ទាល់ដៃពីសំណាក់ព្រះតេជគុណសុវណ្ណជោតិ ខឹម សម្បត្តិ ជាប្រធានសហគមន៍មូលនិធិនគរកាយវត្តព្រះពុទ្ធសាសនាកម្ពុជា និងជាចៅអធិការវត្តញាណរង្សី និងលោកជា ពិសី ប្រធានគណៈកម្មាធិការអនុសាខាកាកបាទក្រហមកម្ពុជាខណ្ឌឫស្សីកែវ ព្រមទាំងព្រះសង្ឃ និងសមាជិកសមាជិកាកាកបាទក្រហមកម្ពុជាខណ្ឌឫស្សីកែវយ៉ាងច្រើនកុះករ ។
អំណោយចែកជូននាឱកាសនោះក្នុងមួយគ្រួសារទទួលបានអង្ករ២៥គីឡូក្រាម គ្រឿងឧបភោគបរិភោគ និងវត្ថុប្រើប្រាស់សរុបចំនួន២៥មុខ ព្រមទាំងថវិកា៥ម៉ឺនរៀល ។ អំណោយទាំងនេះជាអំណោយកាកបាទក្រហមកម្ពុជាខណ្ឌឫស្សីកែវ ។ ដោយឡែកសហគមន៍មូលនិធិនគរកាយវត្តព្រះពុទ្ធសាសនាកម្ពុជាបានជួយឧបត្ថម្ភក្នុងមួយគ្រួសារថវិកា៥ម៉ឺនរៀល អង្ករ២៥គីឡូក្រាម និងគ្រឿងឧបភោគបរិភោគមួយចំនួនទៀត ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ