ខេត្តកណ្តាល ៖ ដោយមើលឃើញនូវការលំបាកក្នុងការសិក្សារបស់កុមារា កុមារី ដែលកំពុងរស់នៅក្នុងភូមិកោះតេជោ ឃុំគគីរធំ ស្រុកកៀនស្វាយ ខេត្តកណ្តាល កាលពីព្រឹកថ្ងៃទី២៤ កញ្ញា ២០១២ លោកម៉ក់ ពេជ្ជរិទ្ធ ទីប្រឹក្សាផ្ទាល់សម្តេចតេជោ ហ៊ុន សែន និងជាអគ្គនាយកកាំកុងត្រូលបានចូលរួមជាអធិបតីក្នុងពិធីបញ្ចុះបឋមសិលាកសាងសាលាបឋមសិក្សាមួយខ្នងមាន៦បន្ទប់ ដើម្បីជាប្រយោជន៍សាធារណៈ និងកាត់បន្ថយការលំបាករបស់កុមារា កុមារីនៅក្នុងមូលដ្ឋាន ។
លោកម៉ក់ ពេជ្ជរិទ្ធ បានមានប្រសាសន៍នាឱកាសនោះថា សាលារៀនមួយខ្នងនេះ គឺជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន និងលោកជំទាវដែលលោកទាំង២តែងតែយកចិត្តទុកដាក់គិតគូរដល់ការលំបាករបស់ប្រជាពលរដ្ឋក្នុងទូទាំងប្រទេស ។
លោកអគ្គនាយកបានលើកឡើងថា បើគិតតាមភូមិសាស្ត្រភូមិកោះតេជោ នេះ គឺមានការលំបាកណាស់ ព្រោះវាជាកោះមួយស្ថិតនៅកណ្តាលទន្លេមេគង្គដែលប្រជាពលរដ្ឋជួបការលំបាកទាំងក្នុងការធ្វើដំណើរ និងរាល់ការទំនាក់ទំនងនានា ។ ដូច្នេះហើយបានជាសម្តេច និងលោកជំទាវយកចិត្តទុកដាក់គិតគូរដល់ការលំបាករបស់ប្រជាពលរដ្ឋ ហើយបានផ្តល់ជាអំណោយបន្តបន្ទាប់លើការអភិវឌ្ឍហេដ្ឋារចនាសម្ព័ន្ធក្នុងភូមិនេះ ។ លោកបញ្ជាក់ថា ចាប់ពីពេលនេះទៅមន្ត្រីគណបក្សប្រជាជនកម្ពុជា និងអាជ្ញាធរមូលដ្ឋានត្រូវរួមគ្នាជួយកសាងនូវសមិទ្ធផលទាំងឡាយក្នុងភូមិកោះតេជោនេះ ធ្វើយ៉ាងណាកុំឱ្យប្រជាពលរដ្ឋជួបការលំបាក ស្របតាមអនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ