រាជធានីភ្នំពេញ ៖ កម្មករជាង៧០នាក់បានប្រមូលផ្តុំគ្នាធ្វើកូដកម្មទាមទារឱ្យថៅកែបើកប្រាក់ខែបង្គ្រប់តាមកិច្ចសន្យា កាលពី១០ថ្ងៃមុនដែលបើកបានតែពាក់កណ្តាលហើយពេលដល់ថ្ងៃកំណត់បែរជានាំគ្នាគេចមុខមិនបើកប្រាក់ខែឱ្យកម្មករទៅវិញ ។ ការធ្វើកូដកម្មរបស់កម្មករខាងលើបានកើតឡើងនៅរសៀលថ្ងៃទី២៤ កញ្ញា ដែលមុនដំបូងពួកគេធ្វើនៅមុខរោងចក្រមានទីតាំងស្ថិតនៅភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ បន្ទាប់មកបាននាំគ្នាធ្វើដំណើរតាមផ្លូវទៅឈរមុខទីស្នាក់ការប៉ូលិសប៉ុស្តិ៍រដ្ឋបាលទឹកថ្លា ដើម្បីសុំជួយអន្តរាគមន៍ ទើបថៅកែព្រមបើកប្រាក់ខែពាក់កណ្តាលទៀតឱ្យ ។
កម្មការិនីឈ្មោះម៉ែត មុំ អាយុ២៧ឆ្នាំ តំណាងក្រុមកម្មករតវ៉ា បានឱ្យដឹងថា កម្មករដែលធ្វើកូដកម្មខាងលើនេះដោយសារតែតំណាងនិយោជកឈ្មោះ មិុច វួចខេង មានតួនាទីប្រធានគណនេយ្យបានជូនដំណឹងកាលពីថ្ងៃទី១៤ កញ្ញា ដោយប្រាប់ថា នៅថ្ងៃទី២៤ កញ្ញា នឹងបើកប្រាក់ខែចំនួន៥០ភាគរយ បង្គ្រប់លើប្រាក់ខែ ដែលកម្មករបានបើក៥០ភាគរយរួចហើយ នៅថ្ងៃទី១៤ កញ្ញា គឺប្រាក់សម្រាប់ខែសីហា ។ កម្មការិនីរូបនោះបានបន្តថា ពេលដល់ថ្ងៃទី២៤ កញ្ញា និយោជកបែរជាមិនបើកប្រាក់ខែចំនួន៥០ភាគរយបន្ថែមទៀតតាមកិច្ចសន្យា បែរជានាំគ្នាគេចមុខពីកម្មករទៅវិញ ដោយប្រាក់ខែកម្មករខ្លះមិនទាន់បើកមានចាប់ពី៣០ទៅ៤០ដុល្លារ និងមានកម្មករខ្លះរហូតដល់៨០ដុល្លារទៀតផង ។
នៅរសៀលម៉ោង៣ថ្ងៃទី២៤ កញ្ញា ក្រុមកម្មករបានមកឈរតវ៉ានៅមុខរោងចក្រហើយបានត្រៀមដើរក្បួនទៅធ្វើការតវ៉ានៅមុខភូមិគ្រឹះសម្តេចតេជោ ហ៊ុន សែន ថែមទៀត តែដោយសារអាជ្ញាធរប៉ូលិសខណ្ឌសែនសុខ មានលោកម៉ក់ ហុង អធិការប៉ូលិស លោកជា ខេមា អភិ បាលរងខណ្ឌសែនសុខ និងលោកប៉ែន ថុល មេប៉ុស្តិ៍សង្កាត់ទឹកថ្លា ធ្វើការសម្របសម្រួលជាមួយនិយោជក និងកម្មកររហូតដល់បានលទ្ធផលចុងក្រោយគឺនៅថ្ងៃចន្ទសប្តាហ៍ក្រោយនិយោជក នឹងបើកប្រាក់ខែចំនួន៥០ភាគរយបង្គ្រប់ទៅឱ្យកម្មករ ៕
ចែករំលែកព័តមាននេះ