ខេត្តឧត្តរមានជ័យ ៖ លោកយឿន ប៊ុនថា អនុប្រធានមន្ទីរកសិកម្មត្រូវបានប្រកាសតែងតាំងជាប្រធានមន្ទីរកសិកម្មខេត្ត បន្ទាប់ពីលោកប៉ែន ម៉ារ៉ាន់ឌី ប្រធានមន្ទីរចាស់បានទទួលមរណភាពកាលពីអំឡុងចុងឆ្នាំ២០១១ កន្លងទៅ ។ ពិធីនេះបានរៀបចំធ្វើនៅសាលាខេត្ត កាលពីព្រឹកថ្ងៃទី១៩ កញ្ញា ក្រោមអធិបតីភាពលោកឱម គឹមស៊ា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងលោករដ្ឋមន្ត្រី ច័ន្ទ សារុន និងមានអញ្ជើញចូលរួមពីលោកប៉ិច សុខិន អភិបាលខេត្ត ព្រមទាំងមន្ត្រីរាជការជុំវិញខេត្តយ៉ាងច្រើនកុះករ ។
លោកសូ សុជាតិ អនុប្រធានមន្ទីរកសិកម្មខេត្ត បានអានរបាយការណ៍ឱ្យដឹងថា នៅខេត្តឧត្តរមានជ័យ ក្នុងខែកក្កដា និងខែសីហា កន្លងទៅ បានជួបការរាំងស្ងួតធ្វើឱ្យមានការប៉ះពាល់ដល់ដំណាំស្រូវ ។ បន្ទាប់ពីជួបគ្រោះរាំងស្ងួត ក្រុមការងារមន្ទីរកសិកម្មខេត្តបានចុះជួយធ្វើការសង្គ្រោះដំណាំស្រូវដោយបូមទឹកដាក់ស្រែធ្វើឱ្យដំណាំស្រូវមានការលូតលាស់ល្អឡើងវិញបានមួយចំនួន តែត្រូវខូចខាតទាំងស្រុងចំនួន៧៥០ហិកតា ។ ដោយឡែកដំណាំរួមផ្សំផ្សេងៗពុំមានការខូចខាតធ្ងន់ធ្ងរទេ។
លោកអនុប្រធានមន្ទីរបានបញ្ជាក់ថា ប្រជាពលរដ្ឋនៅក្នុងខេត្តនេះ ភាគច្រើនតែងបង្កបង្កើនផលស្រូវតាមបែបបុរាណ គឺពួកគាត់ភ្ជួរ ហើយព្រោះចោលដោយមិនមានភ្លឺសម្រាប់ទប់ទឹកទេ ។ បន្ទាប់មក មន្ទីរកសិកម្មខេត្តបានចុះទៅតាមបណ្តាស្រុកជាញឹកញាប់ ដើម្បីបង្ហាត់បង្រៀនឱ្យពួកគាត់យល់ដឹងពីបច្ចេកទេសថ្មីក្នុងការបង្កបង្កើនផលស្រូវដូចជាធ្វើស្រែឱ្យមានភ្លឺសម្រាប់ទប់ទឹក ឬសម្រាប់បូមទឹកដាក់រក្សាទឹកទុកដើម្បីឱ្យដំណាំស្រូវលូតលាស់បានល្អ ។ ជាមួយនេះក៏បានពន្យល់ដល់ពួកគាត់ឱ្យចេះជ្រើសរើសពូជស្រូវដែលប្រើពូជតិចហើយទទួលបានទិន្នផលខ្ពស់ ។
បន្ទាប់ពីបានប្រកាសចូលកាន់មុខតំណែងជាប្រធានមន្ទីរកសិកម្មខេត្ត លោកយឿន ប៊ុនថា បានប្តេជ្ញាខិតខំយកចិត្តទុកដាក់បម្រើប្រជាពលរដ្ឋឱ្យអស់ពីចិត្តពីថ្លើម និងយកចិត្តទុកដាក់ពង្រឹងសាមគ្គីភាពផ្ទៃក្នុងអង្គភាពមន្ទីរកសិកម្មឱ្យបានល្អ ។ ជាមួយនេះសហការជាមួយមន្ទីរនានាក្នុងខេត្តឱ្យបានរឹងមាំ ដើម្បីឈានទៅអភិវឌ្ឍន៍ប្រទេសជាតិឱ្យកាន់តែមានការរីកចម្រើន ។
ក្នុងឱកាសនោះ លោកឱម គឹមសា៊ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានផ្តាំផ្ញើដល់មន្ត្រីកសិកម្ម ជាពិសេសលោកប្រធានមន្ទីរថ្មី បន្ទាប់ពីបានទទួលមុខតំណែងនេះត្រូវបម្រើប្រជាពលរដ្ឋ មិនឱ្យប្រជាពលរដ្ឋខកចិត្តនោះទេ ។ ជាមួយនោះត្រូវតែមានការសហការឱ្យបានល្អជាមួយមន្ត្រីក្រោមឱវាទរបស់ខ្លួន និងមន្ទីរនានានៅជុំវិញខេត្ត ជាពិសេសអាជ្ញាធរខេត្ត ដើម្បីអនុវត្តយុទ្ធសាស្ត្រចតុកោណរបស់រាជរដ្ឋាភិបាលក្នុងការអភិវឌ្ឍប្រទេសជាតិឱ្យមានការរីកចម្រើន ៕
ចែករំលែកព័តមាននេះ