ខេត្តបន្ទាយមានជ័យ ៖ ពន្ធនាគារខេត្តបន្ទាយមានជ័យ ដែលមានទីតាំងជាប់នឹងមាត់ស្ទឹងសិរីសោភ័ណ ស្ថិតនៅភូមិគាប សង្កាត់ទឹកថ្លា ក្រុងសិរីសោភ័ណ កំពុងតែប្រឈមនិងការជន់លិចដោយទឹកជំនន់ហូរធ្លាក់ពីក្រុងប៉ោយប៉ែត និងស្រុកអូរជ្រៅ ដែលពេលនេះស្ថានភាពទឹកកំពុងហូរឆ្លងកាត់តាមដងស្ទឹងសិរីសោភ័ណ និងស្ទឹងអូរមួយចំនួនឆ្ពោះទៅកាន់ដៃទន្លេសាប ។
ខេត្តបន្ទាយមានជ័យ ៖ ពន្ធនាគារខេត្តបន្ទាយមានជ័យ ដែលមានទីតាំងជាប់នឹងមាត់ស្ទឹងសិរីសោភ័ណ ស្ថិតនៅភូមិគាប សង្កាត់ទឹកថ្លា ក្រុងសិរីសោភ័ណ កំពុងតែប្រឈមនិងការជន់លិចដោយទឹកជំនន់ហូរធ្លាក់ពីក្រុងប៉ោយប៉ែត និងស្រុកអូរជ្រៅ ដែលពេលនេះស្ថានភាពទឹកកំពុងហូរឆ្លងកាត់តាមដងស្ទឹងសិរីសោភ័ណ និងស្ទឹងអូរមួយចំនួនឆ្ពោះទៅកាន់ដៃទន្លេសាប ។
បើតាមប្រភពព័ត៌មានពីលោកវរសេនីយ៍ឯក ហ៊ិន សុផល ប្រធានពន្ធនាគារខេត្តបន្ទាយមានជ័យបានប្រាប់ឱ្យដឹងនៅព្រឹកថ្ងៃទី២៣ កញ្ញា ថា ពន្ធនាគារខេត្តបន្ទាយមានជ័យមានទណ្ឌិត និងពិរុទ្ធជនប្រុស ស្រីជិត១.០០០នាក់ ហើយពន្ធនាគារនេះកំពុងតែទទួលរងផលប៉ះពាល់ពីទឹកជំនន់ហូរហៀចេញពីស្ទឹងសិរីសោភ័ណ ។ ពេលនេះទឹកជំនន់ចាប់ផ្តើមហូរជ្រាបចូលក្នុងបរិវេណអគារពន្ធនាគារ កាលពីល្ងាចថ្ងៃទី២១ កញ្ញា ។ លោកនិយាយថា រយៈពេល១យប់ប៉ុណ្ណោះទឹកមានកម្ពស់ប្រមាណ៦តឹក លុះមកដល់ព្រឹកថ្ងៃទី២៣ កញ្ញា ឆ្នាំ២០១២ ទឹកអាចឈានដល់កម្ពស់៨តឹករហូតដល់១ម៉ែត្រថែមទៀត ។
លោកបានបញ្ជាក់ឱ្យដឹងទៀតថា ក្នុងបន្ទប់ឃុំខ្លួនរបស់អ្នកទោស ទឹកពុំទាន់ហូរចូលជ្រាបដល់ក្នុងនៅឡើយទេ ដោយយើងមានម៉ាស៊ីនបូមទឹកចំនួន២គ្រឿងកំពុងដំណើរការបញ្ឆេះ២៤ម៉ោងទល់នឹង២៤ម៉ោង ដើម្បីបូមរំដោះទឹកចេញ ។លោកវរសេនីយ៍ឯក ហ៊ិន សុផល ប្រធានពន្ធនាគារខេត្តបានឱ្យដឹងទៀតថា យើងបានត្រៀមការុងចំនួន១ម៉ឺន និងដីចំនួន១០រថយន្តហើយជាស្រេច ដើម្បីធ្វើការទប់ទឹក និងត្រៀមខ្ចីម៉ាស៊ីនបូមទឹកពីប្រជាពលរដ្ឋមួយចំនួនទុកសម្រាប់បូមរំដោះទឹក ប្រសិនជាស្ថានភាពទឹកនៅតែបន្តកើនឡើងតទៅទៀតនោះ ។
លោកបានបញ្ជាក់ទៀតថា ទណ្ឌិត និងពិរុទ្ធជនដែលឃុំខ្លួនក្នុងពន្ធនាគារមានចំនួនសរុប៩៧០នាក់ ហើយពន្ធនាគារខេត្តត្រូវរងគ្រោះដោយទឹកជំនន់៣ឆ្នាំជាប់គ្នាចាប់ពីឆ្នាំ២០១០,២០១១ និង២០១២នេះ ។ ក្នុងនោះឃើញថាឆ្នាំ២០១០ទទួលរងគ្រោះធ្ងន់ធ្ងរជាងគេ ។ ឆ្នាំនេះលោកបានធ្វើការលើកទំនប់ទប់ទឹកតាមរបងជុំវិញអគារ សង្ឃឹមថាឆ្នាំនេះប្រហែលពុំមានការរងប៉ះពាល់ធ្ងន់ធ្ងរដូចឆ្នាំ២០១០នេះទេ ។ ប៉ុន្តែអ្វីដែលជាការព្រួយបារម្ភនោះគឺ ខាងពន្ធនាគារកំពុងមានការខ្វះខាតចំណាយថវិកាទិញប្រេងមា៉ស៊ូតសម្រាប់បូមទឹករំដោះចេញ ពីព្រោះម៉ាស៊ីនបូមទឹក២គ្រឿងដំណើរការ២៤ទល់២៤ម៉ោង ចាប់ពីថ្ងៃទី២១ ខែកញ្ញា រហូតដល់ថ្ងៃទី២៣ មានរយៈពេល៣ថ្ងៃ និងបន្តដំណើរការរហូតដល់ពេលទឹកស្រកវិញអស់ ។
ទឹកជំនន់ក្នុងខេត្តបន្ទាយមានជ័យចាប់ផ្តើមជន់លិចជាបន្តបន្ទាប់ចាប់ពីថ្ងៃទី១៥ ខែកញ្ញា ឆ្នាំ២០១២ មកដល់ថ្ងៃនេះបង្កឱ្យមានផលប៉ះពាល់លិចលង់មួយចំនួនដល់ដំណាំកសិកម្ម ប្រព័ន្ធហេដ្ឋារចនាសម្ព័ន្ធដូចជា សំណង់ ធារាសាស្ត្រ ស្ពាន ថ្នល់ សាលារៀន វត្តអារាម និងលំនៅឋានប្រជាពលរដ្ឋ ។ ក្នុងនោះប្រជាពលរដ្ឋមួយចំនួនត្រូវបានអាជ្ញាធរជម្លៀសចេញទៅរកទីទួលសុវត្ថិភាព ។ ក្នុងចំណោមស្រុក-ក្រុងទាំង៩ របស់ខេត្តបន្ទាយមានជ័យ ស្រុកចំនួន២ និងក្រុងចំនួន២ទទួលរងគ្រោះ ។ រួមមានក្រុងប៉ោយប៉ែត ស្រុកអូរជ្រៅ ស្រុកម៉ាឡៃ និងក្រុងសិរីសោភ័ណ ដោយក្រុងសិរីសោភ័ណជន់លិចក្រោយគេ ។
បើតាមប្រភពព័ត៌មានពីអាជ្ញាធរខេត្តបន្ទាយមានជ័យនិយាយថា មានមនុស្សក្មេងចាស់ចំនួន៨នាក់ត្រូវលង់ទឹកស្លាប់ និងឆក់ខ្សែភ្លើងស្លាប់គ្រាដែលទឹកឡើងនេះ ។ប្រភពដដែលបានឱ្យដឹងថា មកដល់ថ្ងៃទី២៣ ខែកញ្ញា ឆ្នាំ២០១២ ស្ថានភាពទឹកក្រុងប៉ោយប៉ែត និងស្រុកអូរជ្រៅមានការស្រកចុះមួយចំនួនហើយ ។ ចំណែកឯក្រុងសិរីសោភ័ណវិញទឹកមានការកើនឡើងទទួលរងពីក្រុងប៉ោយប៉ែត និងស្រុកអូរជ្រៅ ៕
ចែករំលែកព័តមាននេះ