រាជធានីភ្នំពេញ ៖ នៅលើសង្វៀនទូរទស្សន៍បាយ័នព័ត៌មានកោះពេជ្រ កាលពីរាត្រីថ្ងៃអាទិត្យទី២៣ កញ្ញា កន្លងទៅពិតជាបង្កឱ្យមានភាពទាក់ទាញមិនធម្មតា ដោយសារអ្នកប្រដាល់ដែលចាប់ដៃគូប្រកួតសុទ្ធតែបានបញ្ចេញស្នៀតប្រយុទ្ធគួរឱ្យញាក់សាច់ ។ កាន់តែជក់ចិត្តជាងនេះគឺការប្រកួតគូពិសេសដែលធ្វើឱ្យអ្នកទស្សនាជក់ចិត្តស្រែកហ៊ោកក្រើកសង្វៀននោះ គឺអ្នកប្រដាល់ជើងខ្លាំងមកពីក្លិបបុរីនាគរាជ ឃឹម ពេជ្រចិន្តា បែរជាប្រកួតចាញ់សិស្សប្អូន ផន ប៊ុនម៉ៅ មកពីក្លិបបុរីរាជសីហ៍មានឫទ្ធិ យ៉ាងអាម៉ាស់នៅក្នុងទឹកទី៤ មិនគួរឱ្យជឿ ។
ការប្រកួតរវាងកីឡាករ ឃឹម ពេជ្រចិន្តា និងកីឡាករផន ប៊ុនម៉ៅ បានធ្វើឱ្យមានសំឡេងហ៊ោកញ្ជ្រៀវពីសំណាក់អ្នកស្នេហាវិស័យប្រដាល់យ៉ាងច្រើនលើសលប់ដោយសារតែគូឯកនេះមានប្រវត្តិធ្លាប់ជួបគ្នាសាកកណ្តាប់ដៃបានបីដងមានឈ្នះមានចាញ់ទៅវិញទៅមក ធ្វើឱ្យក្រុមអ្នកគាំទ្រមានការកត់សម្គាល់ជាប់រហូតព្រោះសមត្ថភាពវាយលុកប្រហែលគ្នា ទោះជាម្នាក់មានប្រវត្តិឡើងសង្វៀនមុនក៏ដោយ ។ រវាងគូសងសឹកមួយនេះបានបង្ហាញកាន់តែច្បាស់ថា សិស្សប្អូនផន ប៊ុនម៉ៅ គឺជាអ្នកមានប្រៀបជាងមុនទ្វេដង បន្ទាប់ពីគូប្រកួតស៊ីសាច់ហុតឈាមទាំងពីរចាប់ផ្តើមវាយលុកដាក់គ្នាតាំងពីទឹកទី១តែម្តង ។ ក្នុងពេលប្រកួតគេឃើញឃឹម ពេជ្រចិន្តា ម៉ាត់ត្រូវចំៗមុខគូប្រកួតលាន់ឮពេញរេញបង្កឱ្យមានសំឡេងទះដៃអបអរយ៉ាងច្រើនធ្វើឱ្យមហាជនដែលលម្អៀងមកលើកីឡាកររូបនេះមានសង្ឃឹមទុកមុនថា ពេជ្រចិន្តា ច្បាស់ជាដណ្តើមបានជ័យជម្នះលើសិស្សប្អូន ផន ប៊ុនម៉ៅ ជាក់ជាមិនខាន។ ប៉ុន្តែសំណាងមើលមិនឃើញមែន ឃឹម ពេជ្រចិន្តា ដែលគេគិតថាវាយបានល្អនៅទឹកដំបូងនោះបែរជាធ្វើមិនបានល្អទៅវិញធ្វើឱ្យអ្នកគាំទ្រស្រឡាំងកាំងមិននឹកស្មានដល់ ខណៈកីឡាករផន ប៊ុនម៉ៅ ចាប់ផ្តើមវាយមិនសំចៃកម្លាំងដោយប្រើស្នៀតទាត់បំបាក់ជើងក្រោមម្តងជាពីរដងបណ្តាលឱ្យឃឹម ពេជ្រចិន្តា ទន់ល្វែងក្រោមបាត់ជំហរខ្សោយទៅៗប្រយុទ្ធទាំងប្រឹង ។ ព្រោះតែត្រូវសិស្សប្អូនប្រើក្បាច់ទាត់បំបាក់ជើងបណ្តាលឱ្យដួលត្រឡប់ត្រឡិនញយដងពេក ទីបំផុតកីឡាករឃឹម ពេជ្រចិន្តា បានគ្រវីក្បាលសុំអាជ្ញាកណ្តាលចុះចាញ់ត្រឹមទឹកទី៤ ក្រោយពីយល់ថាខ្លួនមិនអាចទៅរួចទៀតឡើយ ។
ចំណែកឯគូល្អមើលមួយទៀតដែលបងប្អូននៅទីនោះតាមដានស្ទើរមិនចង់ចេញទៅណានោះ គឺកីឡាករបារាំងដេ រិច ស្ថិតក្នុងក្លិបតាព្រហ្មមានជ័យបង្ក្រាបគ្រឿងញៀន ប៉ះជាមួយកីឡាករចាន់ សុខហួន មកពីក្លិបនិរោធមានជ័យ ។ គូប្រដាល់ខុសសាសន៍គ្នានេះបានទទួលការទាក់ទាញមិនធម្មតាដែរ ដោយសារតែពន្លះគ្នាទៅវិញទៅមកយ៉ាងចាស់ដៃគ្រប់សកម្មភាពនៃទឹកនីមួយៗ ។ កាន់តែអស្ចារ្យនោះកីឡាករដេ រិច ដែលបានបាត់មុខមួយឆ្នាំមកហើយ ព្រោះមានបញ្ហាផ្ទាល់ខ្លួន ស្រាប់តែលេងស្នៀតកែងឆេះវាយត្រូវចំចិញ្ចើមកីឡាករចាន់ សុខហួន បណ្តាលឱ្យបែកចេញឈាម ។ ដោយសារមានប្រៀបវាយដៃគូឱ្យបែកចិញ្ចើមបែបនេះ ដេ រិច កាន់តែបញ្ចេញស្នៀតវាយសន្ធាប់ជាប់លើដៃគូមិនឱ្យហើបរួច ទើបអាចទាក់យកពិន្ទុពីគណៈកម្មការបានបន្តបន្ទាប់រហូតឈ្នះកីឡាករចាន់ សុខហួន ក្នុងនាទីចុងក្រោយ ។
រីឯលទ្ធផលគូផ្សេងទៀត កីឡាករនុត នីសា មកពីក្លិបយុវជនកម្ពុជាមានជ័យ ចាញ់កីឡាករសាញ់ ណាគីន មកពីក្លិបរស្មីភូមិគាប ។ កីឡាការិនី អេ យ៉ានុត មកពីក្លិបអេភូថងកីឡា ឈ្នះកីឡាការិនី សូយ គឹមហៀង មកពីក្លិបអូដឹមកីឡា និងគូចុងក្រោយកីឡាករ បឿត រិទ្ធី មកពីក្លិបនិរោធមានជ័យ ចាញ់កីឡាកររ៉ាក់ វិឆ័យ មកពីក្លិបកងពលតូចលេខ៧០ ៕
ចែករំលែកព័តមាននេះ