រាជធានីភ្នំពេញ ៖ កីឡាករ អាំង សំអាត មកពីក្លិបតាព្រហ្មមានជ័យបង្ក្រាបគ្រឿងញៀន ប្រកួតឈ្នះកីឡាករ ចេង រិទ្ធី មកពីក្លិបសាលវ័ន្តកីឡា ដោយពិន្ទុ សម្រាប់ការជួបគ្នានៅលើសង្វៀនស្ថានីយទូរទស្សន៍ CTN កាលពីថ្ងៃអាទិត្យ ទី២៣ កញ្ញា ក្នុងវគ្គប្រកួតជម្រុះវិលជុំ ដើម្បីឈានទៅដណ្តើមខ្សែក្រវាត់ K-cement ទម្ងន់៥៤គីឡូក្រាម ។
គូនេះស្ថិតក្នុងពូល B ឆ្លងកាត់ការប្រកួតបានមួយលើកម្នាក់កន្លងមកនោះអត់ទាន់ស្គាល់ចាញ់ដូចគ្នា ប៉ុន្តែជ័យជម្នះរបស់ សំអាត លើកនេះធ្វើឱ្យគេកើនបាន៦ពិន្ទុហើយ ខណៈការប្រកួតកាលពីលើកមុនឈ្នះពិន្ទុ ពៅ សីុយ៉េត មកពីក្លិបក្រុងប៉ោយប៉ែត ។ ចំណែក ចេង រិទ្ធី វិញ បានយកឈ្នះកីឡាករ សារឹម ង៉ា មកពីសមាគមកីឡាប្រដាល់ក្រសួងការពារជាតិ ដោយពិន្ទុដូចគ្នា ប៉ុន្តែការបរាជ័យលើកនេះធ្វើឱ្យគេមានការព្រួយបារម្ភយ៉ាងខ្លាំងខ្លាចគេចមិនផុតពីការហាលខោនៅវគ្គជម្រុះវិលជុំក្នុងពូល ព្រោះថាបើសិនជាការប្រកួតមួយលើកចុងក្រោយចាញ់ម្តងទៀតនោះ គឺមានតែផ្លូវហាលខោប៉ុណ្ណោះ ។
ចំណែក សំអាត វិញ គេមានសង្ឃឹមច្រើនក្នុងការស្វែងរកកន្លែងទៅវគ្គប្រកួតពាក់កណ្តាលផ្តាច់ព្រ័ត្រជាបន្តទៀត ដោយសារតែគេទទួលបានជ័យជម្នះទាំងពីរប្រកួតរួចមកហើយ ។ ប៉ុន្តែសម្រាប់ការយកឈ្នះលើ ចេង រិទ្ធី លើកនេះ គឺឈ្នះទាំងប្រផិតប្រផើយបំផុតដោយប្រកួតគ្នា៥ទឹកពេញទាំងសងខាងសុទ្ធតែបានបញ្ចេញស្នៀតកែង និងជង្គង់ វាយបកសងទៅសងមកយ៉ាងសាហាវបំផុត។
រីឯគូប្រកួតមិត្តភាពវិញ ហ៊ុល ដារ៉ា មកពីក្លិបសាលវ័ន្តកីឡា សងសឹក ជិន រ៉ា មកពីសមាគមកីឡាប្រដាល់ក្រសួងការពារជាតិបានសម្រេច ។ ជំនួបគ្នាពីរលើកកន្លងមកនោះ ដារ៉ា ចាញ់ ជិន រ៉ា ទាំងពីរលើកជាប់ៗគ្នា ទើបលើកនេះគណៈកម្មការរៀបចំការប្រកួតឱ្យពួកគេទាំងពីរបានជួបគ្នាប្រកួតសងសឹកម្តងទៀត ហើយលទ្ធផលគឺ ដារ៉ា សងសឹកបានសម្រេចក្នុងស្ថានភាពតឹងតែងបំផុត ។
ហ៊ុន គិរី មកពីក្លិបតាព្រហ្មមានជ័យ ប្រកួតឈ្នះពិន្ទុ យ៉ាម រ៉េត មកពីក្លិបរស្មីកុមារកំព្រា ។ សីុវ ឌីណា មកពីក្លិបកងពលតូចឆត្រយោង៩១១ ប្រកួតឈ្នះពិន្ទុ សិងហ្ហសាវ៉ន មកពីក្លិបសិង្ហកីឡា។ ជ័យ ប៊ុនសុង មកពីក្លិបខេមរិន្ទមានប្ញទ្ធិ បានចំណាយពេលតែមួយទឹកប៉ុណ្ណោះ ផ្តួល សុខ វាសនា មកពីក្លិបឃ្លាំងមឿងកីឡា ឱ្យសន្លប់នៅលើសង្វៀនបានយ៉ាងងាយបំផុត ៕
ចែករំលែកព័តមាននេះ