រាជធានីភ្នំពេញ ៖ ខុសពីកីឡាករភាគច្រើន ដែលទទួលជ័យជម្នះក្រោមសំឡេងទះដៃបន្ទរលើកទឹកចិត្តកីឡាករជើងខ្លាំងសារឿន ចាន់ មកក្លិបសម្រែករាជសីហ៍បង្ក្រាបគ្រឿងញឿន បែរជាបានលទ្ធផលឈ្នះកីឡាករ ផាន់ គ្រាន់ មកពីក្លិបព្រះខ័នរាជ ដោយសំឡេងរិះគន់ទៅវិញ។ អ្នកទស្សនាដោយផ្ទាល់មិនតិចឡើយ ដែលសម្ដែងប្រតិកម្មថា លទ្ធផលចាញ់ឈ្នះនាឱកាសនោះមិនមាន
រាជធានីភ្នំពេញ ៖ ខុសពីកីឡាករភាគច្រើន ដែលទទួលជ័យជម្នះក្រោមសំឡេងទះដៃបន្ទរលើកទឹកចិត្តកីឡាករជើងខ្លាំងសារឿន ចាន់ មកក្លិបសម្រែករាជសីហ៍បង្ក្រាបគ្រឿងញឿន បែរជាបានលទ្ធផលឈ្នះកីឡាករ ផាន់ គ្រាន់ មកពីក្លិបព្រះខ័នរាជ ដោយសំឡេងរិះគន់ទៅវិញ។ អ្នកទស្សនាដោយផ្ទាល់មិនតិចឡើយ ដែលសម្ដែងប្រតិកម្មថា លទ្ធផលចាញ់ឈ្នះនាឱកាសនោះមិនមានភាពយុត្តិធម៌ទេ ។
មិនខុសពីការតាំងចិត្តរបស់កីឡាករ ផាន់ គ្រាន់ មែនទើបពេលប្រកួតនៅលើសង្វៀនបឹងស្នោរបស់ទូរទស្សន៍បាយ័នកាលពីថ្ងៃអាទិត្យ ទី២៣ កញ្ញា នោះ គឺលោកនៅតែអាចទប់ស្នៀតរបស់កីឡាករ សារឿន ចាន់ និងបានវាយសង្រ្គប់លើរៀមច្បងរូបនេះស្ទើររកពេលតដៃគ្មាន ។ កីឡាករ ផាន់ គ្រាន់ ត្រូវគេមើលឃើញថា ចាញ់ប្រៀបគូប្រកួតបន្តិចដោយសារតែលោកវាយដើរថយក្រោយ ហើយបណ្ដោយឲ្យកីឡាករ សារឿន ចាន់ដេញវាយជាប់រហូតចាប់តាំងពីទឹកទី១ឈានចូលមកដល់ ។
គូប្រកួតទាំងពីរនេះ ដ្បិតថាទើបតែជួបប្រកួតគ្នាលើកទី១ ប៉ុន្តែពួកគេវាយសម្រុកគ្នាទៅវិញទៅមកដោយមិនសំចៃដៃឡើយ ដោយម្នាក់ៗប្រឹងបញ្ចេញស្នៀតញាក់សាច់ដាក់គ្នាធ្វើឲ្យអ្នកទស្សនាផ្ទាល់ជក់ចិត្តស្រែកបន្ទរចង់រញ្ជូយសង្វៀនប្រដាល់ទៀតផង ។ ចាប់តាំងពីទី២មក គេចាប់អារម្មណ៍ថា កីឡាករសារឿន ចាន់ ត្រូវម៉ាត់ និងទ្រមកម្លាំងទាត់ធាក់ក្រោមដៃកីឡាករ ផាន់ គ្រាន់ច្រើន ប៉ុន្តែកីឡាករ សារឿន ចាន់ ក៏បញ្ចេញស្នៀតកែង និងអុកជង្គង់សង្រ្គប់លើកីឡាករ ផាន់ គ្រាន់ វិញដែរ ធ្វើឲ្យសិស្សប្អូនរូបនេះ ពិបាកសម្ញែងក្បាច់នាគវាត់កន្ទុយដូចដែលលោកធ្លាប់ប្រើដើម្បីផ្ដួលគូប្រកួតនោះផងដែរ ។ ការប្រកួតរវាងកីឡាករទាំងពីរ បើមើលមួយភ្លែតគឺកីឡាករ សារឿន ចាន់ ដែលជាអ្នកដេញវាយមានប្រៀបជាង ប៉ុន្តែបើនិយាយពីការវាយចូលវិញ គឺកីឡាករ ផាន់ គ្រាន់ ត្រូវគេមើលឃើញថាម៉ាត់ចូលចំៗគោលដៅបានល្អ ។
អីុចឹងហើយទើបគ្រាន់តែមានការប្រកាសថា កីឡាករ សារឿន ចាន់ ឈ្នះពិន្ទុកីឡាកររូបនេះភ្លាមក៏មានសម្រែករិះគន់ ពីសំណាក់អ្នកទស្សនាផ្ទាល់ក្នុងពេលដែលពួកគេស្ទុះដើរចេញពីសង្វៀនប្រដាល់ ដើម្បីទៅផ្ទះវិញតែម្ដង ។ អ្នកទស្សនាជាច្រើននាំគ្នាបន្លឺសំឡេងខ្លាំងៗប្រណាំងនឹងសំឡេងមេក្រូថា ជារឿងមិនសមឡើយ ដែលបង្គោលខៀវគឺកីឡាករ ផាន់ គ្រាន់ គ្នាខំវាយធ្វើឲ្យបង្គោលក្រហមចង់ទក់សាច់ម្ដងៗប៉ុណ្ណឹងហើយ ស្រាប់តែឲ្យចាញ់បែបនេះ។ សំឡេងនេះ ត្រូវគេឮយ៉ាងអឺងកងក្នុងពេលអ្នកទស្សនាស្ទុះងើបចេញពីសង្វៀន និងក្នុងពេលពួកគេប្រជ្រៀតគ្នាដើរចេញមកខាងក្រៅ ។
ដកស្រង់សម្ដីរិះគន់ពីអ្នកទស្សនាទាំងនោះ ពួកគេនិយាយថា «អាខៀវ(ផាន់ គ្រាន់)វាយអាក្រហមប៉ុណ្ណឹងហើយនៅឲ្យអាក្រហមឈ្នះទៀត អីក៏អយុត្តិធម៌ម៉្លេះ!»។ មិនមែនត្រឹមតែអ្នកទស្សនាជាបុរសប៉ុណ្ណោះទេ ដែលលើកឡើងបែបនេះ ពោលគឺសូម្បីតែអ្នកទស្សនាជានារីក្មេងក៏ដើរបណ្ដើរ និយាយរិះគន់បណ្ដើរថា នោះជាការកាត់ក្តីមិនសមទំនងសោះ ។ ស្រី្តម្នាក់ដែលបីកូនបណ្ដើរ ដើរប្រជ្រៀតគេឯងមកខាងក្រៅបណ្ដើរនិយាយថា អត់សមសោះដែលអាក្រហម(សារឿន ចាន់) ត្រូវអាខៀវ(ផាន់ គ្រាន់) វាយឡើងផ្ងាកៗប៉ុណ្ណឹងទៅហើយ នៅឲ្យអាក្រហមឈ្នះទៀត ។ ទោះយ៉ាងណា ប្រឆាំងតបនឹងការរិះគន់នេះ ក៏មានអ្នកទស្សនាមួយក្រុមទៀតទទួលយកលទ្ធផលដែលបានប្រកាសនេះផងដែរ ដោយពួកគេដើរបណ្ដើរ ឆ្លើយតបទៅកាន់ក្រុមអ្នករិះគន់បណ្ដើរថា ប្រហែលមកពីបង្គោលខៀវ ផាន់ គ្រាន់ វាយលុកបានច្រើន ប៉ុន្តែមិនសូវត្រូវចំគោលដៅហើយទើបចាញ់បង្គោលក្រហមបែបហ្នឹង ។
ក្រុមអ្នកប្រកាន់ទស្សនៈស្របនឹងលទ្ធផលនេះនិយាយថា «គេឲ្យអាក្រហម(សារឿន ចាន់) ឈ្នះអីុចឹងក៏ត្រូវដែរ ព្រោះវាប្រកួតដេញរហូត ហើយអាខៀវ ដ្បិតថាវាយបានច្រើន តែមិនសូវត្រូវឯណា គឺត្រូវតែដៃអាក្រហមហ្នឹង!»។ ទោះបីយ៉ាងណា សំឡេងចម្រូងចម្រាសនេះគេស្ដាប់ឮពេញៗត្រចៀកថា សំឡេងរិះគន់ច្រើនជាងសំឡេងស្រប ខណៈដែលអ្នកទស្សនាភាគច្រើន ហាក់មិនទទួលយកការកំណត់ឲ្យកីឡាករ សារឿន ចាន់ ឈ្នះពិន្ទុកីឡាករផាន់ គ្រាន់ នោះឡើយ ។
លោកនាង ស៊ីវត្ថា អ្នករៀបចំការប្រកួតប្រដាល់មិនឃើញបង្ហាញមុខក្នុងពេលប្រកួតនោះឡើយ ប៉ុន្តែយោងតាមមន្ត្រីអ្នកផ្ដល់ពិន្ទុបានអះអាងថា ការកំណត់ឲ្យ សារឿន ចាន់ ឈ្នះពិន្ទុកីឡាករ ផាន់ គ្រាន់ គឺជារឿងយុត្តិធម៌ផ្អែកតាមបច្ចេកទេសដែលបានកំណត់ឡើង ។ លោកបញ្ជាក់ថា អ្នកគាំទ្រកីឡាករ ផាន់ គ្រាន់ និយាយអីុចឹងចេះតែបានហើយ ប៉ុន្តែធាតុពិតគេមើលបច្ចេកទេសប្រកួត និងការវាយលុក គឺមិនមែនឲ្យតែវាយបានច្រើនទាត់បានច្រើនកំណត់ថាជាអ្នកឈ្នះនោះឡើយ ។ ទោះបីជាយ៉ាងណា អ្នកទស្សនាដោយផ្ទាល់មួយចំនួនធំនៅតែយល់ថា កីឡាករផាន់ គ្រាន់ មិនសមនឹងចាញ់ទេ ។
ដោយឡែក នាថ្ងៃអាទិត្យនោះដែរ កីឡាកររឿន ស្មាច់ មកពីក្លិបកងរាជអាវុធហត្ថរាជធានីភ្នំពេញ ត្រូវសន្លប់ក្នុងទឹកទី៣ក្រោមដៃកីឡាករស៊ីន ជីវ័ន មកពីក្លិបរកាខ្នុរគ្រឿងញៀន ។ កីឡាករ សួស យ៉ាត មកពីក្លិបទ័ពជើងទឹក ឈ្នះពិន្ទុកីឡាករឯម ពិភ័ត មកពីក្លិបគ្រុឌមានជ័យ។ កីឡាករពេជ្រ សំពៅ មកពីក្លិបខេមរភូមិន្ទ ផ្ដួលកីឡាករស្រិល ទ្រី មកពីក្លិបគជសារកីឡា ឲ្យសន្លប់ក្នុងទឹកទី៥ និងការប្រកួតគូចុងក្រោយគឺរវាងកីឡាករព្រំ វី មកពីក្លិបស្រុកស្ទោងខេត្តកំពង់ធំ សន្លប់ក្រោមដៃកីឡាករគួន ប៊ុនហ៊ីម មកពីក្លិបពន្លឺសាមគ្គីក្នុងទឹកទី២ ៕
ចែករំលែកព័តមាននេះ