ក្រុមហ៊ុន AU Optronics ជាផ្នែកមួយក្នុងចំណោមអ្នកផលិតអេក្រង់ទូរទស្សន៍ LCD ឈានមុខនៅតៃវ៉ាន់ ត្រូវតុលាការសហរដ្ឋអាមេរិកពិន័យជាប្រាក់ជាង៥០០លានដុល្លារពីបទផ្សំគំនិតក្នុងការទ្រឹងថ្លៃអេក្រង់ LCD នៅក្នុងទីផ្សារពិភពលោក ។តុលាការក្នុងទីក្រុងសាន់ហ្វ្រាន់ស៊ីស្កូ សហរដ្ឋអាមេរិកបានពិន័យប្រាក់លើក្រុមហ៊ុនរបស់តៃវ៉ាន់ និងដាក់ពន្ធនាគារអតីតអ្នកគ្រប់គ្រងចំនួន២រូប រយៈពេល៣ឆ្នាំ រួមទាំងពិន័យជាទឹកប្រាក់បន្ថែមក្នុងម្នាក់២០០.០០០ដុល្លារ ពីបទផ្សំគំនិតជាមួយក្រុមហ៊ុនគូប្រជែងក្នុងការទ្រឹងលើតម្លៃរបស់អេក្រង់ LCD នៅក្នុងទីផ្សារពិភពលោក ដើម្បីឱ្យមានតម្លៃខ្ពស់ និងធ្វើឱ្យអ្នកប្រើប្រាស់ ត្រូវចំណាយប្រាក់ទិញផលិតផលក្នុងតម្លៃថ្លៃ។
ចំពោះថ្លៃពិន័យនោះចាត់ទុកថា ជាផ្នែកមួយក្នុងចំនួនប្រាក់ដ៏ខ្ពស់ ដូចដែលតុលាការអាមេរិកធ្លាប់ធ្វើទៅលើរឿងក្តីទ្រឹងលើថ្លៃទំនិញ។ចៅក្រមបញ្ជាក់ថា ជនជាប់ចោទបានកែបំភ័ន្តឯកសារ និងធ្វើឱ្យមានផលប៉ះពាល់ដ៏ធំរួមទាំងពិនិត្យឃើញយ៉ាងច្បាស់ពីអំពើដែលមានលក្ខណៈផ្សំគំនិត ដើម្បីទ្រឹងលើថ្លៃទំនិញយ៉ាងពិតប្រាកដ ។ក្រុមហ៊ុន AU Optromics ជាប់ចោទថា បានបញ្ជូនអ្នកគ្រប់គ្រង២នាក់ចូលរួមប្រជុំជាច្រើនលើកពីឆ្នាំ២០០១ដល់២០០៦ ដើម្បីចរចាទាក់ទងនឹងការកំណត់ថ្លៃ និងកំរិតលើការផលិតជាមួយក្រុមហ៊ុនកុំព្យូទ័រដ៏ធំនៅលើពិភពលោក ដូចជាក្រុមហ៊ុន អេបផល និងដេល កុំព្យូទ័រ ។
តុលាការបានចេញសាលក្រមដល់អតីតអ្នកគ្រប់គ្រង AU Optronics ចូលប្រគល់ខ្លួននៅថ្ងៃទី៣០ វិច្ឆិកា ប៉ុន្តែមេធាវីរបស់ក្រុមហ៊ុនបញ្ជាក់ថា នឹងប្តឹងទៅឧទ្ធរណ៍ពីការកាត់ក្តីនោះ ។កាលពីឆ្នាំមុន តុលាការអាមេរិកបានដំណើរការរឿងក្តីប្រភេទដូចគ្នានេះ ជាមួយក្រុមហ៊ុនផលិតLCD ចំនួន៧កន្លែង រួមមានទាំងក្រុមហ៊ុន Samsung របស់កូរ៉េ ពីបទផ្សំគំនិត ទ្រឹងថ្លៃទំនិញជាទឹកប្រាក់សរុបជាង៥៥៣លានដុល្លារ ៕
ចែករំលែកព័តមាននេះ