រាជធានីភ្នំពេញ ៖ ព្រឹកថ្ងៃទី២៤ កញ្ញា ២០១២ សាលាមត្តេយ្យអន្តរជាតិអែដវែនស្ទែមហ្វត ដែលមានទីតាំងលេខ៤០ ផ្លូវលេខ៥៧០ សង្កាត់បឹងកក់ទី២ ខណ្ឌទួលគោក បានប្រារព្ធពិធីបើកសម្ពោធ ក្រោមអធិបតីភាពលោកឧត្តមសេនីយ៍ទោ ហ៊ុន ម៉ាណែត នាយរងសេនាធិការចម្រុះ និងជាមេបញ្ជាការរងកងទ័ពជើងគោក និងមានការចូលរួមពីលោកស្រី ឆាយ លក្ខិណា ប្រធានក្រុមប្រឹក្សាភិបាលសាលាមត្តេយ្យអន្តរជាតិអែដវែនស្ទែមហ្វត ។
លោកស្រី ឆាយ លក្ខិណា បានមានប្រសាសន៍ក្នុងពិធីសម្ពោធសាលាមត្តេយ្យអន្តរជាតិអែដវែនស្ទែមហ្វត នោះថា ថ្ងៃនេះពិតជាសក្ខីភាពនៃការគាំទ្រចំពោះសាលាមត្តេយ្យអន្តរជាតិអែដវែនស្ទែមហ្វត និងបានផ្តល់នូវថាមពលជំរុញលើកទឹកចិត្តឱ្យលោកស្រីជាគណៈគ្រប់គ្រងសាលាខិតខំតស៊ូព្យាយាមដើម្បីសម្រេចបាននូវគោលដៅនៃការវិនិយោគ។
ក្នុងឱកាសនោះលោកឧត្តមសេនីយ៍ទោ ហ៊ុន ម៉ាណែត ដែលជាគណៈអធិបតីបានមានមតិផ្តាំផ្ញើថា ការបង្កើតសាលាអន្តរជាតិដែលនឹងត្រូវសម្ពោធដាក់ឱ្យប្រើប្រាស់ថ្ងៃនេះបានបញ្ជាក់ឱ្យឃើញកាន់តែច្បាស់ពីសារសំខាន់នៃការចូលរួមរបស់វិស័យឯកជនជាមួយរាជរដ្ឋាភិបាលក្នុងការអភិវឌ្ឍវិស័យអប់រំនៅកម្ពុជាឱ្យកាន់តែមានគុណភាពតាមស្តង់ដាអន្តរជាតិ ហើយក៏ជាការបង្ហាញឱ្យឃើញពីការរីកចម្រើននៃជីវភាពរបស់ប្រជាជនកម្ពុជា ក៏ដូចជាកំណើនសេដ្ឋកិច្ចជាតិ ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ