រាជធានីភ្នំពេញ ៖ បុរសម្នាក់បានស្លា.ប់បាត់បង់ជីវិតភ្លាមៗនៅនឹងកន្លែង ឯពីរនាក់រងរបួសធ្ងន់និងម្នាក់ទៀតរបួសស្រាលត្រូវបានបញ្ជូនទៅកាន់មន្ទីរពេទ្យភ្លាម ក្រោយពេលពួកគេជួបឧប្បត្តិហេតុគ្រោះថ្នាក់ចរាចរណ៍ជិះម៉ូតូពីរគ្រឿងបុកគ្នាពេញទំហឹងលាន់សូរដូចរន្ទះពេលកំពុងធ្វើដំណើរបញ្ច្រាសទិសគ្នា ។
រាជធានីភ្នំពេញ ៖ បុរសម្នាក់បានស្លាប់បាត់បង់ជីវិតភ្លាមៗនៅនឹងកន្លែង ឯពីរនាក់រងរបួសធ្ងន់និងម្នាក់ទៀតរបួសស្រាលត្រូវបានបញ្ជូនទៅកាន់មន្ទីរពេទ្យភ្លាម ក្រោយពេលពួកគេជួបឧប្បត្តិហេតុគ្រោះថ្នាក់ចរាចរណ៍ជិះម៉ូតូពីរគ្រឿងបុកគ្នាពេញទំហឹងលាន់សូរដូចរន្ទះពេលកំពុងធ្វើដំណើរបញ្ច្រាសទិសគ្នា ។
ឧបទ្ទវហេតុនោះបានកើតឡើងកាលពីវេលាម៉ោង៣និង១០នាទីរសៀលថ្ងៃទី២៣ កញ្ញា លើកំណាត់ផ្លូវជាតិលេខ៣ត្រង់ចំណុច ភូមិវត្តស្លែង សង្កាត់ពងទឹក ខណ្ឌដង្កោ រាជទិធានីភ្នំពេញ ។ ម៉ូតូពីរគ្រឿងនោះ ម៉ាកហុងដាស្គូពីពណ៌ក្រហម ជិះគ្នាពីរនាក់បើកបរដោយបុរសឈ្មោះ នូវ រ៉េត អាយុ២៥ឆ្នាំ មានទីលំនៅភូមិគគីរធំ ឃុំគគីរធំ ស្រុកកៀនស្វាយ ខេត្តកណ្តាល បានស្លាប់បាត់បង់ជីវិតភ្លាមៗនៅនឹងកន្លែង ឯអ្នកជិះពីក្រោយរងរបួសស្រាល ។ ចំណែកម៉ូតូមួយគ្រឿងទៀត ម៉ាកស៊ុយហ្សុ៊យគី វីវ៉ា ពណ៌ខ្មៅ ជិះគ្នាពីរនាក់ជាបុរសបានរងរបួសធ្ងន់ត្រូវគេបញ្ជូនទៅកាន់មន្ទីរពេទ្យ ។
តាមប្រភពព័ត៌មានបានឱ្យដឹងថា មុនពេលកើតហេតុគេឃើញម៉ូតូទាំងពីរគ្រឿងបើកបរបញ្ច្រាសទិសគ្នា ដោយម៉ូតូស្គូពីជិះគ្នាពីរនាក់បើកបរដោយបុរសឈ្មោះ នូវ រ៉េត (អ្នកស្លាប់)ធ្វើដំណើរពីត្បូងទៅជើងស្របគ្នាជាមួួយរថយន្តម៉ាកកូរ៉ូឡាមួយគ្រឿង ។ ចំណែកឯម៉ូតូ១គ្រឿងទៀតម៉ាកវីវ៉ាជិះគ្នាពីរនាក់ បើកពីជើងទៅត្បូងក្នុងល្បឿនលឿន ពេលទៅដល់ចំណុចកើតហេតុរថយន្តកូរ៉ូឡាដែលបើកស្របគ្នាជាមួួយម៉ូតូស្គូពីបានបត់ឆ្វេងឆ្លងផ្លូវចូលទៅកន្លែងលក់សាច់ក្រកអាំង ធ្វើឱ្យអ្នកជិះម៉ូតូវីវ៉ាដែលកំពុងបើកយ៉ាងលឿននោះវាក់ទាញចង្កូតគេចចេញពីរថយន្តក៏ជ្រុលទៅបុកម៉ូតូសស្គូពីពេញទំហឹងលាន់សូរដូចរន្ទះតែម្តង ។
ប្រភពដដែលបានបន្តថា ខណៈនោះគេឃើញម៉ូតូទាំងពីរគ្រឿងនិងអ្នកបើកបរព្រមទាំងអ្នករួមដំណើរខ្ទាតចេញឆ្ងាយពីម៉ូតូដូចគ្នាបណ្តាលឱ្យម្នាក់បានស្លាប់បាត់បង់ជីវិត ពីរនាក់រងរបួសធ្ងន់ធ្ងរ និងម្នាក់ទៀតរងរបួសស្រាល ។ បន្ទាប់មកសពត្រូវបានក្រុមគ្រួសារជួលរថយន្តដឹកយកទៅកាន់ស្រុកកំណើតដើម្បីធ្វើបុណ្យ ឯអ្នករបួសត្រូវបានបញ្ជូនទៅសង្គ្រោះនៅមន្ទីរពេទ្យ ។ ម៉ូតូទាំងពីរគ្រឿងត្រូវប៉ូលិសការិយាល័យចរាចរណ៍ផ្លូវគោករាជធានីភ្នំពេញកសាងសំណុំរឿងចាត់ការតាមផ្លូវច្បាប់ ៕
ចែករំលែកព័តមាននេះ