រដ្ឋមន្ត្រីប្រតិភូអីុរ៉ង់ទទួលបន្ទុកគមនាគមន៍ និងបច្ចេកវិទ្យាព័ត៌មានវិទ្យាអះអាងថា អីុរ៉ង់បានបញ្ចប់កាលពីថ្ងៃទី២៣ កញ្ញា នូវការតភ្ជាប់បណ្តាញអីុនធើរណេតជាតិដាច់ដោយឡែកពីប្រព័ន្ធអីុនធើរណេតពិភពលោកដល់គ្រប់ប្រព័ន្ធរដ្ឋបាលរបស់ខ្លួនហើយ ។
រដ្ឋមន្ត្រីប្រតិភូរូបនេះលោកអាលី យ៉ាគីម ហ្សាវ៉ាឌីថ្លែងថា រយៈពេលប៉ុន្មានថ្ងៃចុងក្រោយនេះគ្រប់ប្រព័ន្ធរដ្ឋបាលរបស់យើងបានភ្ជាប់បណ្តាញព័ត៌មានវិទ្យាជាតិ ។
ការប្រកាសនេះធ្វើឡើងនាថ្ងៃដែលទូរទស្សន៍រដ្ឋអីុរ៉ង់អះអាងថា ក្បាលម៉ាស៊ីនស្រាវជ្រាវ និងសេវាកម្មអីុមែលរបស់GOOGLEនឹងត្រូវរាំងខ្ទប់ប៉ុន្មានម៉ោងទៀត ។ GOOGLEនិងGMAILនឹងត្រូវរាំងខ្ទប់ទូទាំងប្រទេសរហូតដល់មានបទបញ្ជាជាថ្មី ។
ទីភ្នាក់ងារព័ត៌មានអីុរ៉ង់ISNAរាយការណ៍ថាការហាមឃាត់GOOGLEទាក់ទិនដល់ការចេញផ្សាយតាមបណ្តាញនេះនូវវីដេអូប្រឆាំងអ៊ិស្លាមតាមYOUTUBE ។
អាជ្ញាធរអីុរ៉ង់លើកហេតុផលពីការប្រើប្រាស់ប្រព័ន្ធអីុនធើរណេតជាតិមួយព្រោះនោះជាសេចក្តីត្រូវការបង្កើនសន្តិសុខព័ត៌មានវិទ្យានៅអីុរ៉ង់ ជាពិសេសក្រោយការវាយប្រហារលើកម្មវិធីនុយក្លេអ៊ែររបស់ខ្លួន កាលពីខែមីនាឆ្នាំ២០១០ដោយវីវុសព័ត៌មានវិទ្យាឈ្មោះSTUXNETរបស់អាមេរិករួមទាំងអីុស្រាអែលដែលបណ្តាលឱ្យមានការបញ្ឈប់សកម្មភាពបណ្តាឡចម្រាញ់អ៊ុយរ៉ានីញ៉ូមអីុរ៉ង់ក្នុងទីតាំងចម្រាញ់អ៊ុយរ៉ានីញ៉ូមពិសេសមួយ ៕
ចែករំលែកព័តមាននេះ