ការចាក់បញ្ចូលទឹកប្រាក់ជំរុញសេដ្ឋកិច្ចទៅក្នុងទីផ្សារហិរញ្ញវត្ថុរបស់បណ្តាធនាគារកណ្តាលធំៗនានាកំពុងបង្កើតឱ្យមានឥទ្ធិពលដូមីណូ ឬស្ថានភាពរាលដាលនៅជុំវិញពិភពលោក ដែលញ៉ាំងឱ្យរដ្ឋាភិបាលនានារាប់ចាប់ពីប្រទេសប្រេស៊ីល ដល់តួកគី នាំគ្នាចាត់វិធានការរក្សាសាច់ប្រាក់មិនឱ្យប៉ះពាល់ដល់រូបិយប័ណ្ណរបស់ខ្លួន ។
ការចាក់បញ្ចូលទឹកប្រាក់ជំរុញសេដ្ឋកិច្ចទៅក្នុងទីផ្សារហិរញ្ញវត្ថុរបស់បណ្តាធនាគារកណ្តាលធំៗនានាកំពុងបង្កើតឱ្យមានឥទ្ធិពលដូមីណូ ឬស្ថានភាពរាលដាលនៅជុំវិញពិភពលោក ដែលញ៉ាំងឱ្យរដ្ឋាភិបាលនានារាប់ចាប់ពីប្រទេសប្រេស៊ីល ដល់តួកគី នាំគ្នាចាត់វិធានការរក្សាសាច់ប្រាក់មិនឱ្យប៉ះពាល់ដល់រូបិយប័ណ្ណរបស់ខ្លួន ។
កាលពីថ្ងៃពុធ ទី១៩ កញ្ញា កន្លងទៅ ធនាគារជប៉ុនបានក្លាយជាធនាគារចុងក្រោយដែលបន្ធូរបន្ថយគោលនយោបាយរូបិយវត្ថុ ។ ធនាគារនេះធ្វើដូច្នេះគឺបន្ទាប់ពីធនាគារកណ្តាលធំ២របស់ពិភពលោកបានចាប់ផ្តើមកម្មវិធីសង្គ្រោះសេដ្ឋកិច្ចគ្មានកាលកំណត់ ។ កិច្ចប្រឹងប្រែងរបស់ធនាគារកណ្តាលជប៉ុន គឺដើម្បីជំរុញសេដ្ឋកិច្ចក្នុងប្រទេសរបស់ខ្លួនដែលស្ទើរតែផុតដង្ហើម តាមរយៈការចាក់បញ្ចូលទឹកប្រាក់បន្ថែមក្នុងទីផ្សារហិរញ្ញវត្ថុ ក៏ដូចជាទម្លាក់ថ្លៃប្រាក់យ៉េនដើម្បីសង្គ្រោះការនាំចេញក្រៅប្រទេស ។ ធនាគារនេះបន្ថែមទំហំកម្មវិធីទិញទ្រព្យសកម្មរហូតដល់៨០លានលានយ៉េន ស្មើនឹង១លានលានដុល្លារពីទឹកប្រាក់ពីមុនចំនួន៧០លានលានយ៉េន ហើយពង្រីកកម្មវិធីនេះចំនួន៦ខែរហូតដល់ដំណាច់ឆ្នាំ២០១៣ ។
គួរបញ្ជាក់ថា កាលពីដើមខែនេះធនាគារកណ្តាលអឺរ៉ុបបានត្រៀមខ្លួនទិញបំណុលពីប្រទេសដែលជាប់បំណុលវ័ណ្ឌ.កនៅអឺរ៉ុប ដែលអាចជួយប្រទេសទាំងនោះក្នុងការត្រួតពិនិត្យតម្លៃប្រាក់កម្ចីរបស់គេ ។ ចំណែកធនាគារកណ្តាលអាមេរិកកាលពីសប្តាហ៍មុនបានប្រកាសគម្រោងទិញសញ្ញាប័ណ្ណដែលមានទឹកប្រាក់៤០ពាន់លានដុល្លារក្នុង១ខែម្តងរហូតដល់សេដ្ឋកិច្ចក្នុងប្រទេសងើបឡើងវិញ ។ បណ្តាក្រុមវិនិយោគិនរំពឹងថា ធនាគារកណ្តាលអង់គ្លេសក៏នឹងប្រកាសវិធានការបន្ថែមដើម្បីជំរុញកំណើនសេដ្ឋកិច្ចផងដែរ ។ ក្រុមអ្នកវិនិយោគកត់សម្គាល់ឃើញថា គ្រាន់តែឬដំណឹងពីការចេញវិធានការពីធនាគារកណ្តាលស្តីពីការបន្ធូរបន្ថយរូបិយវត្ថុភ្លាមស្រាប់តែផ្សារហ៊ុន និងការវិនិយោគនានាចាប់ផ្តើមឡើងស្រឺតភ្លាម ជាក់ស្តែងសន្ទស្សន៍ផ្សារហ៊ុន Standard & Poor 500 កើន1,7%កាលពីថ្ងៃពុធ។
ក្រោយពីមានវិធានការពីសំណាក់ធនាគារកណ្តាលអាមេរិក ប្រាក់រៀល (real) របស់ប្រេស៊ីលឡើងថ្លៃ០,៧% ខណៈដែលប្រាក់ប៉េសូរបស់ម៉ិកស៊ិកឡើងថ្លៃ២,៧% កាលពីសប្តាហ៍មុន ។ ចំណែកប្រាក់ស្លូទី (Zloty) របស់ប៉ូឡូញកើន៤,៣% ហើយប្រាក់វ៉ុនរបស់កូរ៉េខាងត្បូងកើន១,៦% ។ កាលពីថ្ងៃចន្ទ ប្រទេសេប្រស៊ីលបានចាត់វិធានការដើម្បីបង្ការមិនឱ្យមានរលកនៃការបន្ធូរបន្ថយរូបិយវត្ថុរបស់ធនាគារកណ្តាលអាមេរិកប៉ះពាល់ដល់រូបិយវត្ថុរបស់ខ្លួន ដោយបង្កើតអ្វីដែលហៅថា ការបង្វែរការដោះដូរប្រាក់ដុល្លារដើម្បីការពារប្រាក់រៀលរបស់ខ្លួនមិនឱ្យឡើងថ្លៃ។ កាលពីថ្ងៃចន្ទ នេះដែរ ប្រទេសប៉េរូ ក៏បានចេញវិធានការអន្តរាគមន៍សំដៅទម្លាក់ថ្លៃប្រាក់សូល (Sol) របស់ខ្លួន ខណៈដែលប្រទេសតួកគីកាត់បន្ថយអត្រាការប្រាក់ច្រើនជាងការរំពឹងទុក។ ដូចគ្នាដែរ ក្រុមមន្ត្រីនៅកូរ៉េខាងត្បូង ថៃ សិង្ហបុរី និងហ្វ៊ីលីពីន បានចេញនូវការក្រើនរំលឹកឱ្យមានការប្រុងប្រយ័ត្នចំពោះការឡើងថ្លៃរូបិយប័ណ្ណរបស់ខ្លួនដែរ ក្រោយពីមានសេចក្តីប្រកាសរបស់ធនាគារកណ្តាលអាមេរិករួចមក ៕
ចែករំលែកព័តមាននេះ