ខេត្តកំពង់ចាម ៖ នគរបាលការិយាល័យសេដ្ឋកិច្ចសហការជាមួយនឹងនគរបាលស្រុកបាធាយ បានឃាត់ខ្លួនក្រុមអ្នកលក់សត្វព្រៃនៅលើកំណាត់ផ្លូវជាតិលេខ៦ ស្ថិតក្នុងឃុំជាលា ស្រុកបាធាយ ចំនួន៤នាក់ និងដកហូតបានសត្វព្រៃមួយចំនួន រួចបញ្ជូនមកស្នងការដ្ឋាននគរបាលខេត្ត កាលពីរសៀលថ្ងៃទី២០ កញ្ញា ។ អ្នកលក់សត្វព្រៃទាំង៤នាក់នេះមាន ១-ឈ្មោះវន់ វី ភេទប្រុស អាយុ២១
ខេត្តកំពង់ចាម ៖ នគរបាលការិយាល័យសេដ្ឋកិច្ចសហការជាមួយនឹងនគរបាលស្រុកបាធាយ បានឃាត់ខ្លួនក្រុមអ្នកលក់សត្វព្រៃនៅលើកំណាត់ផ្លូវជាតិលេខ៦ ស្ថិតក្នុងឃុំជាលា ស្រុកបាធាយ ចំនួន៤នាក់ និងដកហូតបានសត្វព្រៃមួយចំនួន រួចបញ្ជូនមកស្នងការដ្ឋាននគរបាលខេត្ត កាលពីរសៀលថ្ងៃទី២០ កញ្ញា ។ អ្នកលក់សត្វព្រៃទាំង៤នាក់នេះមាន ១-ឈ្មោះវន់ វី ភេទប្រុស អាយុ២១ឆ្នាំ ២ -ឈ្មោះខេម សុផល ភេទប្រុស អាយុ១៦ឆ្នាំ ៣-ឈ្មោះឯក កញ្ញារិទ្ធ ភេទប្រុស អាយុ១៤ឆ្នាំ ៤-ឈ្មោះគឹម លឹមហួរ ភេទប្រុស អាយុ១៤ឆ្នាំ ទាំងអស់គ្នារស់នៅភូមិបែកពាង ឃុំជាលា ស្រុកបាធាយ ។
មន្ត្រីនគរបាលសដ្ឋកិច្ចខេត្តបានឱ្យដឹងថា ជារៀងរាល់ថ្ងៃនៅតាមចិញ្ចើមផ្លូវជាតិលេខ៦ តែងឃើញមានប្រជាពលរដ្ឋដាក់ទាស្រុកបន្លំធ្វើជាទាព្រៃព្យួរលក់តាមកង់ រាយបណ្តាក់គ្នាដូចខ្យងពីកន្លែងមួយទៅកន្លែងមួយ ។ ដោយមើលឃើញសកម្មភាពបែបនេះ ទើបថ្នាក់លើបញ្ជាឱ្យចុះបង្ក្រាបកាលពីព្រឹកថ្ងៃទី២០ កញ្ញា និងដកហូតសត្វព្រៃបានមួយចំនួនមានដូជា លលក១០ក្បាល រនាលខ្ចង២ក្បាល ខ្វែកទ្រក១៨ក្បាល រួចបញ្ជូនមកកាន់ស្នងការដ្ឋាននគរបាលខេត្តដើម្បីធ្វើការសួរនាំ ។
យុវជនឈ្មោះវន់ វី បានឆ្លើយថា សត្វខ្វែកទ្រកចំនួន១៨ក្បាលនេះគឺរូបគេទិញពីមនុស្សម្នាក់យកមកលក់ឱ្យ ក្នុង១ក្បាលតម្លៃ២.៥០០រៀល ហើយលក់វិញបាន១ក្បាលតម្លៃ៣.៥០០រៀល ។ គេនិយាយថា ជាមធ្យមក្នុង១ថ្ងៃលក់បានប្រហែលជាង១០ក្បាល ដើម្បីយកលុយទិញអង្ករដាំបាយហូប ហើយរូបគេទើបតែលក់សត្វព្រៃបាន៤ទៅ៥ថ្ងៃប៉ុណ្ណោះ ។
ក្រុមអ្នកលក់សត្វព្រៃបានធ្លោយមាត់ប្រាប់ថា កាលពីមុនពួកគេបានយកកូនទាស្រុកមកលក់បន្លំថាជាទាព្រៃ ហើយក៏មានគេមកប្រាប់ថា ម្តេចបានជារកស៊ីចូលចិត្តបន្លំបែបនេះ ម្តេចក៏មិនយកសត្វព្រៃពិតមកលក់ទៅ លុះពេលយកសត្វព្រៃមកលក់បែរជាត្រូវសមត្ថកិច្ចចាប់ទៅវិញ ។
នគរបាលសេដ្ឋកិច្ចខេត្តបញ្ជាក់ថា ជនទាំង៤នាក់ខាងលើត្រូវបានសាលាដំបូងខេត្ត ធ្វើការអប់រំនាព្រឹកថ្ងៃទី២១ កញ្ញា ឱ្យបញ្ឈប់របរនេះ ព្រោះជាទង្វើខុសច្បាប់ ៕
ចែករំលែកព័តមាននេះ