ខេត្តតាកែវ ៖ ទំនងជាមានការឃុបឃិតគ្នាជាខ្សែសង្វាក់មួយ ទើបបានជាមានការហា៊នផ្គើនទៅនឹងបទបញ្ជាយ៉ាងម៉ឺងម៉ាត់របស់ប្រមុខរាជរដ្ឋាភិបាលកម្ពុជា ដែលបានកាត់រំសាយដែនឡូត៍នេសាទទាំងអស់នៅខេត្តតាកែវឱ្យប្រជាពលរដ្ឋនេសាទត្រីជាលក្ខណៈគ្រួសារ ពិសេសដើម្បីឱ្យត្រីកាន់តែសម្បូរពីមួយឆ្នាំទៅមួយឆ្នាំ សម្រាប់ទ្រទ្រង់ជីវភាពរស់នៅរបស់ប្រជាពលរដ្ឋ ។
ប្រភពព័ត៌មានពីស្រុកបុរីជលសា បានឱ្យដឹងថា ឡូត៍នេសាទនៅខេត្តតាកែវ មានតែនៅ២ស្រុកប៉ុណ្ណោះ គឺស្រុកអង្គរបុរី និងស្រុកបុរីជលសា ដែលជារៀងរាល់ឆ្នាំនៅពេលរដូវទឹកឡើងនៅតាមឡូត៍នេសាទទាំងនោះ ទូកនេសាទរបស់វៀតណាមតែងតែចូលមកដាក់សៃយ៉ឺន និងដាក់ដាយចាប់ត្រីយកទៅស្រុកគេវិញយ៉ាងគគ្រឹកគគ្រេង តែមិនឃើញមានការចាត់វិធានការបង្ក្រាបនោះទេ ។
ប្រភពដដែលបានបន្តទៀតថា ចំណែកនៅឆ្នាំនេះនៅតាមអតីតឡូត៍នេសាទមួយចំនួនក្នុងស្រុកទាំង២នេះក៏មិនខុសគ្នាប៉ុន្មានពីឆ្នាំមុនដែរ បទល្មើសនេសាទនៅតែបន្តកើតមានដដែល បើទោះជាប្រមុខរាជរដ្ឋាភិបាលបានបញ្ជាឱ្យរំលាយឡូត៍នេសាទទាំងអស់យ៉ាងណាក៏ដោយ ក៏គេឃើញមានទូកនេសាទវៀតណាមចូលមកនេសាទត្រីដោយខុសច្បាប់ជារៀងរាល់ថ្ងៃ ។ ពួកអ្នកនេសាទវៀតណាមទាំងនោះបានចូលមកដាក់ដាយនៅចំណុចពីមុខស្នាក់ការរបស់វរលេខ៣០១ការពារព្រំដែន ក្នុងឃុំកំពង់ក្រសាំង ស្រុកបុរីជលសា រយៈពេលជាង១ខែមកហើយដោយ ក្នុង១ថ្ងៃៗដាក់ត្រីតូចៗយកទៅវៀតណាមមិនតិចជាង៥ទៅ៧តោនទេ ។ ចំពោះករណីនេះមន្ត្រីខិលខូចមួយចំនួនដែលបានសើមមាត់សើម.កបានយកលេសថាជារបស់សហគមន៍ទៅវិញដើម្បី បិទបាំងពីបទ ល្មើសរបស់ខ្លួនដែលឃុបឃិត ។
មន្ត្រីជលផលខេត្តមួយរូបបានខ្សឹបប្រាប់កោះសន្តិភាពថា ដាយនេះត្រូវគេលក់បន្តទៅឱ្យឈ្មួញវៀតណាមដាក់ជាង១ខែមកហើយ ថ្នាក់លើអត់បានដឹងទេ ទើបតែរត់ច្បាប់ចូលមកដល់ខេត្តប៉ុណ្ណោះ ៕
ចែករំលែកព័តមាននេះ