ខេត្តឧត្តរមានជ័យ ៖ សមត្ថកិច្ចប៉េអឹមស្រុកអន្លង់វែង បានឃាត់ខ្លួនបុរសម្នាក់ឈ្មោះដួង សីមា អាយុ២៥ឆ្នាំ មានស្រុកកំណើតនៅភូមិទួលគគីរ ឃុំព្រៃត្រឡាច ស្រុករុក្ខគិរី ខេត្តបាត់ដំបង បច្ចុប្បន្នមកស្នាក់នៅភូមិអូរចិញ្ចៀន ឃុំអន្លង់វែង ស្រុកអន្លង់វែង ដោយយោងតាមពាក្យបណ្តឹងរបស់ស្ត្រីម្នាក់ឈ្មោះចក់ ស៊ុនអី អាយុ២០ឆ្នាំ ។ ការចាប់ខ្លួននេះបានធ្វើឡើងនៅក្នុងភូមិអូរចិញ្ចៀន ឃុំអន្លង់វែង ស្រុកអន្លង់វែង កាលពីវេលាម៉ោង១១ព្រឹកថ្ងៃទី២០ កញ្ញា កន្លងទៅនេះ ។
លោកវរសេនីយ៍ត្រី ងួន ទ្ធីរិទ្ធ មេបញ្ជាការកងរាជអាវុធហត្ថស្រុកអន្លង់វែងឱ្យដឹងថា ការឃាត់ខ្លួនជនសង្ស័យរូបនេះ គឺយោងតាមពាក្យបណ្តឹង និងយោងទៅលើចម្លើយបំភ្លឺបន្ថែមពីស្ត្រីជាដើមបណ្តឹងថា បុរសរូបនេះបានប្រើសម្រស់សង្ហារបស់ខ្លួនមកលួងលោមសុំស្នេហាពីនាងជាច្រើនលើកមកហើយ រហូតរូបនាងដាក់ចិត្តអាណិតស្រឡាញ់បុរសនោះវិញ បន្ទាប់មកបុរសរូបនេះក៏ចេះតែលួងលោមថារូបគេមានការខ្វះខាតលុយកាក់ធ្វើសោហ៊ុយទៅប្រឡងធ្វើជាតារាចម្រៀងនឹងគេ ។ តាមស្ត្រីរូបនេះរៀបរាប់ថា បន្ទាប់ពីបានស្រឡាញ់គ្នាហើយ នាងក៏ដោះខ្សែចង្កេះមានទម្ងន់៥ជី១ខ្សែ ខ្សែជើង១ខ្សែទម្ងន់២ជី ចិញ្ចៀនពេជ្រ១វង់ ទាំងអស់នេះធ្វើអំពីប្លាទីន និងខ្សែដៃមាសទម្ងន់៣ជី លុយ៨០០ដុល្លារអាមេរិក បើសរុបជាទឹកប្រាក់ចំនួនជាង៧ពាន់ដុល្លារអាមេរិកទៅឱ្យបុរសនេះ ។ ស្ត្រីជាដើមបណ្តឹងបញ្ជាក់ថា បន្ទាប់ពីបានប្រគល់គ្រឿងអលង្ការឱ្យរួចហើយ ទើបដឹងថាជាបុរសឆបោក ក៏បានមកដាក់ពាក្យបណ្តឹងនៅទីបញ្ជាការកងរាជអាវុធហត្ថស្រុកអន្លង់វែង ។
លោកវរសេនីយ៍ត្រីងួន ទ្ធីរិទ្ធ បានបន្តថា បន្ទាប់ពីបានទទួលពាក្យបណ្តឹង លោកក៏ឱ្យលោកអនុសេនីយ៍ទោ ហ៊ើន សំបោន ដឹកនាំកម្លាំងកងរាជអាវុធហត្ថចុះទៅឃាត់ខ្លួនបុរសរូបនោះនាំមកទីបញ្ជាការកងរាជអាវុធហត្ថស្រុក ដើម្បីសាកសួរ ហើយជនជាប់ចោទបានឆ្លើយសារភាពដូចការចោទប្រកាន់មែន ។ យោងតាមចម្លើយសារភាព និងយោងទៅតាមវត្ថុតាងជាក់ស្តែង លោកក៏បានកសាងសំណុំរឿងបញ្ជូនជនសង្ស័យរូបនេះទៅសាលាដំបូងខេត្ត ចំណែកលុយចំនួន៦០០ដុល្លារអាមេរិក និងគ្រឿងអលង្ការមួយចំនួនបានប្រគល់ទៅឱ្យម្ចាស់ដើមវិញ ៕
ចែករំលែកព័តមាននេះ