រាជធានីភ្នំពេញ ៖ ជំនួបសងសឹករបស់កីឡាករជើងខ្លាំង កែវ វិរៈ មកពីក្លិបគជសារកីឡា ជាមួយកីឡាករតក់ សោភ័ណ្ឌ មកពីក្លិបអេភូថងកីឡា នៅលើសង្វៀនបាយ័នបឹងស្នោ កាលពីរាត្រីថ្ងៃសៅរ៍ទី២២ កញ្ញា កន្លងទៅបានទទួលការចាប់អារម្មណ៍ជាខ្លាំងពីអ្នកទស្សនា ដោយសារតែអ្នកប្រដាល់ពីររូបនេះវាយលុកគ្នាគួរឱ្យញាក់សាច់នៅគ្រប់ទឹកនៃការប្រកួត។ ទីបំផុត កីឡាករកែវ វិរៈ ដែលធ្លាប់ចាញ់ក្រោមកណ្តាប់ដៃតក់ សោភ័ណ្ឌ ចំនួនបីលើកស្ទើរមិនគួរឱ្យជឿនោះ នៅតែទទួលបរាជ័យពីដៃគូប្រកួតចាស់របស់ខ្លួនសាជាថ្មីធ្វើឱ្យធ្លាក់ក្នុងដានចាស់ប្រវត្តិច្រំដែលម្តងទៀត ។
កីឡាករកែវ វិរៈ បានបំផ្លាញកី្តីសង្ឃឹមរបស់មហាជនដែលគាំទ្រដោយសារតែធ្វើមិនបានល្អក្នុងជំនួបសងសឹកលើកទី៤មិនបានសម្រេចតាមការអះអាងកាលពីមិនទាន់ឡើងប្រកួត ។ ការរងនូវភាពអាម៉ាស់ម្តងទៀតនេះមិនដឹងថា កីឡាករកែវ វិរៈ បាត់បង់ប្រជាប្រិយភាពប៉ុនណាទេ ពិសេសអ្នកដែលលម្អៀងស្រឡាញ់ក្បាច់ប្រដាល់របស់កីឡាកររូបនេះកាន់តែបាត់ជំនឿ បន្ទាប់ពីរងការខកបំណងសាជាថ្មី ។ បញ្ហាមួយនេះកីឡាករកែវ វិរៈ ត្រូវតែខំបញ្ចេញស្នាដៃឡើងវិញតាមរយៈហ្វឹកហាត់ឱ្យល្អមែនទែនដើម្បីស្តារមុខមាត់ដែលបានខូចខាតសម្រាប់ស្វែងរកសំឡេងគាំទ្រដូចដំណាក់កាលដែលបានប្រឡូកអាជីពនេះពីដំបូង ។ ក្នុងពេលឆាកប្រយុទ្ធឈានចូលមកដល់កីឡាករកែវ វិរៈ បានខិតខំបញ្ចេញស្នៀតវាយពិសេសៗបង្ក្រាបដៃគូ បន្ទាប់ពីបានសម្ងំហាត់រៀនមុនពេលប្រកួត។
ចាប់ពីទឹកទី២ដល់ទី៤ អ្នកប្រដាល់ចិត្តមុតកែវ វិរៈ ដែលប្តេជ្ញាយកឈ្នះក្នុងន័យលាងជម្រះរឿងអាម៉ាស់នាអតីតកាលគឺធ្វើបានល្អមែន សូម្បីតែអ្នកទស្សនានៅទីនោះក៏ភ្ញាក់ផ្អើលដែរ ដែលគេមានស្នៀតប្លែកៗវាយកីឡាករតក់ សោភ័ណ្ឌ ឱ្យដួលផ្ងារជើងផ្ងារដៃបោកផ្ទប់ទៅនឹងរេញញឹកញាប់បង្កឱ្យតក់ សោភ័ណ្ឌ យ៉ាប់ម្តងៗរហូតធ្វើឱ្យគ្រូបង្វឹកគឺលោកអេភូថង ស្លន់ស្លោ ហើយស្រែកបញ្ជាឱ្យខំតស៊ូពីក្រោមរេញដោយថែមទាំងធានាផ្តល់ប្រាក់រង្វាន់លើកទឹកចិត្តភ្លាមៗបន្ថែមប្រាក់កម្រៃប្រចាំសប្តាហ៍ ។ ទំនងមិនចង់ឱ្យធ្លាក់ក្នុងសភាពបរាជ័យដែលធ្លាប់តែមានប្រៀបបីលើកផ្ទួនៗកីឡាករតក់ សោភ័ណ្ឌ ដែលបានឮគ្រូបង្វឹកស្រែកផ្តល់កាដូជូន ស្រាប់តែហាក់មានកម្លាំងចិត្ត ។
បន្ទាប់ពីទឹកទី៥ចូលមកដល់ភ្លាមតក់ សោភ័ណ្ឌ បានវាយសម្រុកម៉ាត់ផង កែងផង ហើយកាន់តែល្អជាងនេះ គឺហាក់ដូចជាចាប់ចំណុចខ្សោយកីឡាករកែវ វិរៈ បានដោយសារតែលេងស្ទីលទាត់ជើងឱ្យដួលបានពីរបីដងធ្វើឱ្យវិរៈខាតពិន្ទុមិនស្ទើរទេនៅទឹកទី៥ ព្រោះទន់ជើងក្រោម ។ ដោយសារអស់លទ្ធភាពទប់ទល់ កីឡាករកែវ វិរៈ ត្រូវស៊យចាញ់ពិន្ទុកីឡាករតក់ សោភ័ណ្ឌ ដដែលធ្វើឱ្យកីឡាកររូបនេះសោកស្តាយបំផុតដែលមិនអាចងើមមុខបាន ។
កីឡាករតក់ សោភ័ណ្ឌ ដែលនៅតែមានប្រៀបលើដៃគូចាស់បានប្រាប់កោះសន្តិភាពថា ការពិតលោកមិនចង់ប្រកួតជាមួយកីឡាករកែវ វិរៈ ប៉ុន្មានទេ បើសិនជាលោកមិនបានប្រកែកវិញប្រហែលជាត្រូវជួបគ្នាប្រាំ-ប្រាំមួយលើកមកហើយតែនេះលោកធ្លាប់បដិសេធពីរដងដើម្បីគេចចេញមិនចង់ប៉ះដៃគូចាស់ ។ កីឡាកររូបនេះបាននិយាយបែបអួតអាងថា បើកុំកែវ វិរៈ ជាមិត្តភក្តិកុំអីលោកលេងម៉ាអស់ដៃបាត់ទៅហើយបើអ្នកផ្សេងលោកមិនយោគយល់បន្ធូរដៃឱ្យឡើយ ។ ប្រសិនបើលើកក្រោយមានការរៀបចំឱ្យលោកជួបប្រកួតជាមួយកីឡាករកែវ វិរៈ ម្តងទៀតលោកស្វាគមន៍ជានិច្ចមិនរាថយឡើយ ។
រីឯការប្រកួតរវាងគូផ្សេងទៀត កីឡាករចាន់ ភារិន្ទ មកពីក្លិបនិរោធមានជ័យ ឈ្នះកីឡាករហា៊ន ហាន មកពីក្លិបមិត្តប៉ូលិស ។ កីឡាការិនីវី អិច មកពីក្លិបអេភូងកីឡា ឈ្នះកីឡាការិនីសឹង តុ មកពីក្លិបតាឡីដំរីមានឫទ្ធិ ។ ដោយឡែកកីឡាករថាន់ ថាត មកពីក្លិបមជ្ឈមណ្ឌលកីឡាខេមរភូមិន្ទ ប្រកួតជាមួយកីឡាករចាន់ ស៊ីណាត មកពីក្លិបនិរោធមានជ័យ ត្រូវគណៈកម្មការសម្រេចមិនប្រកាសលទ្ធផល ព្រោះប្រកួតខុសលក្ខខណ្ឌ និងគូចុងក្រោយកីឡាករយ៉ាម ពិសិដ្ឋ មកពីក្លិបរស្មីកុមារកំព្រា ឈ្នះកីឡាករស៊ីថា សារ៉ាន់ មកពីក្លិបមជ្ឈមណ្ឌលកម្ចាត់មីនកម្ពុជា ៕
ចែករំលែកព័តមាននេះ