លោក Pat McQuaidកាលពីថ្ងៃសៅរ៍ទី២២កញ្ញាបានទាត់ចោលនូវសំណើរសុំឱ្យមានការលើកលែងទោសដល់បណ្តាកីឡាករដែលប្រើសារធាតុហាមឃាត់អំឡុងខ្លួនកំពុងស្ថិតក្នុងអាជីព ។ការថ្លែងរបស់លោក McQuaidបានធ្វើឡើងមួយថ្ងៃបន្ទាប់ពីសហព័ន្ធប្រណាំងកង់អន្តរជាតិ (UCI) នៅក្នុងសមាជប្រចាំឆ្នាំរបស់ខ្លួនបានសម្រេចបង្កើតជាចលនាមួយដែលផ្តោតលើកិច្ចខិតខំប្រឹងប្រែងប្រឆាំងសារធាតុញៀនក្នុងគោលបំណងនូវបរិស្ថានស្អាតស្អំមួយសម្រាប់ជំនាន់ក្រោយ ។
លោកបាននិយាយថា ៖«គណៈកម្មាធិការអចិន្ត្រៃយ៍បានពិភាគ្សាគ្នាអំពីលទ្ធភាពនៃកិច្ចប្រតិបត្តិការណ៍មួយដែលប្រហាក់ប្រហែលនឹងអ្វីប្រទេសអាហ្វ្រិកខាងត្បូងបានដឹងនៅទីបញ្ចប់នៃប្រព័ន្ធនយោបាយបែងចែកជាតិសាសន៍ជាមួយនឹងគណៈកម្មការការស្វែងយល់ការពិតនិងផ្សះផ្សារ ។ ជាការសន្និដ្ឋានគឺថា ដំបូងឡើយវាមិនមែនជារឿងសមរម្យដែលចាត់វិធានការណាមួយខណៈបញ្ហារវាងភ្នាក់ងារប្រឆាំងសារធាតុញៀនអាមេរិក (USADA)និងកីឡាករអាមស្ត្រងកំពុងតែដំណើរការនោះ ។
ច្បាប់ប្រឆាំងសារធាតុញៀនអន្តរជាតិមិនមាននិយាយពីការលើកលែងទោសឱ្យកីឡាករណាម្នាក់ទេ ។ យើងទាំងអស់គ្នាមិនស្ថិតនៅក្នុងស្ថានភាពដូចក្នុងប្រទេសអាហ្វ្រិកខាងត្បូងឡើយ ហើយយោបល់ដែលបានស្នើឡើងក៏ត្រូវបានទាត់ចោលផងដែរ »។
លោក McQuaidបានថ្លែងទៀតថា សហព័ន្ធប្រណាំងកង់អន្តរជាតិនៅកំពុងរង់ចាំរបាយការណ៍មួយពីភ្នាក់ងារ USADAចំពោះករណីកីឡាករអាមស្រ្តងដែលត្រូវបានចោទប្រកាន់ថា លួចប្រើប្រាស់សារធាតុហាមឃាត់ ។ លោកថា ក្រោយពីទទួលបានសាលក្រមចុងក្រោយរបស់ USADA សហព័ន្ធប្រណាំងកង់អន្តរជាតិមានរយៈរយៈពេល២១ថ្ងៃដើម្បីធ្វើការសម្រេចចិត្ត ។«លើកលែងប្រសិនជាពិនិត្យមើលឯកសារពាក់ព័ន្ធឃើញមានបញ្ហាសំខាន់ណាមួយ ប្រសិនជាគ្មានទេ សហព័ន្ធគ្មានបំណងប្តឹងឧទ្ធរណ៍នោះទេ»។
សូមបញ្ជាក់ថា លោក McQuaidបានកាន់តំណែងជាប្រធានសហព័ន្ធប្រណាំងកង់អន្តរជាតិចាប់តាំងពីឆ្នាំ២០០៥មកម្លេះ ហើយសម្រាប់អាណត្តិជាប្រធានរយៈពេល៤ឆ្នាំទៅមុខទៀត លោកបានជ្រើសរើសយកការប្រើប្រាស់សារធាតុហាមឃាត់ជាអាទិភាពទី១ដែលត្រូវលុបបំបាត់ចោល ៕
ចែករំលែកព័តមាននេះ