ខេត្តកំពង់ចាម ៖ វិហារអ៊ិស្លាមអាល់មូហាជីរីន ស្ថិតនៅភូមិបេងថ្មី ឃុំសេដា ស្រុកតំបែរខេត្តកំពង់ចាម ត្រូវបានបើកការដ្ឋានសាងសង់កាលពីវេលាព្រឹកថ្ងៃទី២២ ខែកញ្ញា ឆ្នាំ២០១២ ក្រោមអធិបតីភាព លោកឧកញ៉ាអូស្មាន ហាស្សាន់ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈទីប្រឹក្សាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានអង្គការមូលនិធិអភិវឌ្ឍន៍មូស្លីមកម្ពុជា ។
នៅក្នុងឱកាសនោះក៏មានការអញ្ជើញចូលរួមពីសំណាក់លោកឧកញ៉ាសុះ កំរី ចាងហា្វងនៃគណៈដឹកនាំជាន់ខ្ពស់នៃសាសនាអ៊ិស្លាមកម្ពុជា លោកហ្សាការីយ៉ាអាដាម សមាជិករដ្ឋសភា និងជាអនុប្រធានអង្គការមូលនិធិអភិវឌ្ឍន៍មូស្លីមកម្ពុជា លោកស្មាន ទៀត សមាជិករដ្ឋសភា និងជាអនុប្រធានអង្គការមូលនិធិអភិវឌ្ឍន៍មូស្លីមកម្ពុជា ព្រមទាំងមានការចូលរួមពីសប្បុរសជននៃប្រទេសម៉ាឡេស៊ី អស់លោក លោកស្រីខ្លះជាសមាជិករដ្ឋសភា សមាជិករាជរដ្ឋាភិបាល អាជ្ញាធរមូលដ្ឋាន លោកគ្រូ អ្នកគ្រូ សិស្សានុសិស្ស ហាកឹមទួន និងបងប្អូនប្រជាពលរដ្ឋយ៉ាងច្រើនកុះករ ។
លោកសឹម សុខព្រី អភិបាលរងខេត្តកំពង់ចាមបានអានរបាយការណ៍ស្វាគមន៍ និងបានរៀបរាប់ពីស្ថានភាពភូមិសាស្រ្តក៏ដូចជាការងារកំពុងប្រឈមមុខ និងការប្រកបមុខរបររកស៊ីរបស់ប្រជាពលរដ្ឋ ។ លោកអភិបាលរងបានឱ្យដឹងថាវិហារអ៊ិស្លាមដែលត្រូវបើកការដ្ឋានស្ថាបនានៅពេលនេះមានបណ្តោយប្រវែង២២ម៉ែត្រ និងទទឹងប្រវែង២០ម៉ែត្រគ្រោងបំពាក់ដោយគ្រឿងសង្ហារឹមល្អៗ ដែលគិតជាថវិកាអស់ប្រមាណ១៨ម៉ឺនដុល្លារ ដែលជាអំណោយសប្បុរសធម៌នៃប្រទេសម៉ាឡេស៊ី ។
លោកឧកញ៉ាអូស្មាន ហាស្សាន់ បានមានប្រសាសន៍ឱ្យដឹងថា ក្នុងរបបប្រល័យពូជសាសន៍ខ្មែរក្រហម វត្តអារាម វិហារ ស៊ួរ៉ាវ សាលារៀនត្រូវបានបំផ្លិចបំផ្លាញស្ទើរតែទាំងអស់ ហើយការគោរពបូជារបស់សាសនិកអ៊ិស្លាម ក៏ដូចជាពុទ្ធបរិស័ទត្រូវបានហាមឃាត់ ។ ក្រោយថ្ងៃរំដោះ៧ មករា ឆ្នាំ១៩៧៩ សាសនាអ៊ិស្លាមក៏ដូចជាពុទ្ធសាសនាបានរស់រានឡើងវិញ ហើយប្រជាពលរដ្ឋមានសិទ្ធិពេញលេញក្នុងការគោរពប្រតិបត្តិសាសនារៀងៗខ្លួន ។
លោកឧកញ៉ាបានបន្តទៀតថា ប្រទេសជាតិក្រោមការដឹកនាំប្រកបដោយគតិបណ្ឌិតរបស់សម្តេចទាំង៣ ជាពិសេសក្រោមការដឹក
នាំរបស់សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជា សមិទ្ធផលជាច្រើនត្រូវបានកសាងជាបន្តបន្ទាប់ និងមានការអភិវឌ្ឍន៍រីកចម្រើនលើគ្រប់វិស័យ ទាំងវិស័យអាណាចក្រ និងពុទ្ធចក្រ និងអ៊ិស្លាមសាសនាផងដែរ ។ ជាក់ស្តែងថ្ងៃនេះនៅភូមិបេងថ្មី ឃុំសេដា ស្រុកតំបែរ ខេត្តកំពង់ចាម យើងទទួលបាននូវវិហារអ៊ិស្លាមថ្មីមួយទៀតដែលត្រូវបានបើកការដ្ឋានសាងសង់ ដើម្បីទុកជូនបងប្អូនសាសនិកអ៊ិស្លាមគោរពប្រតិបត្តិឱ្យបានសមរម្យទៅតាមសម័យកាល ដែលប្រទេសជាតិមានការរីកចម្រើនលើគ្រប់វិស័យ ។
លោកឧកញ៉ា អូស្មាន ហាស្សាន់ បានឱ្យដឹងថា ដោយមើលឃើញវិហារអ៊ិស្លាមអាល់មូហាជីរីននេះធ្វើអំពីឈើ តូចចង្អៀត ចាស់ទ្រុឌទ្រោម និងមានការស្នើសុំ និងទទួចពីបងប្អូនប្រជាពលរដ្ឋក្នុងដំណើរចុះសាកសួរសុខទុក្ខ លោកបានធ្វើការពិភាក្សាជាមួយលោក Haji Abdul Karim Bin Haji Abdullah និងលោក Haji Tayaib Bin Haji Abdullah ដែលសប្បុរសជនប្រទេសម៉ាឡេស៊ី ដើម្បីស្វែងរកជំនួយថវិកាមកសាងសង់វិហារអ៊ិស្លាមដែលបានបើកការដ្ឋាននៅពេលនេះ ។
លោកឧកញ៉ាក៏បានណែនាំដល់ប្រជាពលរដ្ឋអ៊ិស្លាមដែលគ្រប់អាយុឱ្យនាំគ្នាទៅចុះឈ្មោះ និងពិនិត្យមើលឈ្មោះបោះឆ្នោតជ្រើសរើសតំណាងរាស្រ្តនៅពេលខាងមុខឱ្យបានគ្រប់ៗគ្នា និងបោះឆ្នោតជូនគណបក្សណាដែលបងប្អូនយល់ថាមានគុណបំណាច់ចំពោះជាតិមាតុភូមិ និងដឹកនាំប្រទេសមានសន្តិភាព និងអភិវឌ្ឍន៍ ។ក្នុងឱកាសនោះលោកឧកញ៉ាអូស្មាន ហាស្សាន់ ក៏បានឧបត្ថម្ភថវិកាចំនួន៤០ម៉ឺនរៀលដល់ក្រុមកីឡាករផងដែរ ។ បន្ទាប់មកលោកឧកញ៉ាក៏បានអញ្ជើញបញ្ជាគ្រឿងចក្របើកការដ្ឋានដំណើរការសាងសង់វិហារអ៊ិស្លាមចាប់ពីពេលនេះតទៅ ៕
ចែករំលែកព័តមាននេះ