ក្រុងប៉ោយប៉ែត ៖ ជនរងគ្រោះដោយទឹកជំនន់ក្នុងសង្កាត់ចំនួន២ ក្នុងក្រុងប៉ោយប៉ែត សរុប១.២៦០គ្រួសារ នៅព្រឹកថ្ងៃទី២១ កញ្ញា បានទទួលអំណោយពីកាកបាទក្រហមកម្ពុជា ហើយពិធីចែកអំណោយនេះបានប្រារព្ធធ្វើនៅទួលសុវត្ថិភាពម្តុំផ្សាររ៉ាថ្មី ក្នុងភូមិប៉ោយប៉ែត សង្កាត់ប៉ោយប៉ែត ក្រោមអធិបតីភាពលោកកែ គឹមយ៉ាន ឧបនាយករដ្ឋមន្ត្រី និងជាប្រធានក្រុមការងារចុះជួយខេត្តបន្ទាយមានជ័យ ។
ចូលរួមក្នុងពិធីនោះមានលោកអ៊ុយ សំអាត នាយកនាយកដ្ឋានគ្រប់គ្រងគ្រោះមហន្តរាយកាកបាទក្រហមកម្ពុជា តំណាងលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន មន្ត្រីអាជ្ញាធរខេត្ត-ក្រុង សង្កាត់ និងមន្ត្រីមកពីមន្ទីរពាក់ព័ន្ធជុំវិញខេត្ត មេបញ្ជាការ-មេបញ្ជាការរងគ្រប់អង្គភាពពាក់ព័ន្ធក្នុងខេត្ត ព្រមទាំងសមាជិកសមាជិកា សាខាកាកបាទក្រហមខេត្តជាច្រើនរូបទៀត ។
លោកង៉ោ ម៉េងជ្រួន អភិបាលក្រុងប៉ោយប៉ែតថ្លែងថា ប្រជាពលរដ្ឋរងគ្រោះទាំង១.២៦០គ្រួសាររស់នៅក្នុងសង្កាត់ចំនួន២គឺ សង្កាត់ប៉ោយប៉ែត មាន៨៥៤គ្រួសារ មក៣ភូមិគឺភូមិប៉ោយប៉ែត៤៥០គ្រួសារ ភូមិក្បាលកោះ ២៦៤គ្រួសារ និងភូមិអូរជ្រៅ៤០គ្រួសារ និងសង្កាត់ផ្សារកណ្តាលមាន៤០៦គ្រួសារ មកពីភូមិផ្សារកណ្តាល៩០គ្រួសារ ភូមិស្ទឹងបត់៤៧គ្រួសារ និងភូមិគីឡូម៉ែតលេខ៤ ចំនួន២៦៩គ្រួសារ ។ ចំពោះអំណោយដែលផ្តល់ជូននាពេលនេះក្នុង មួយគ្រួសារៗទទួលបានអង្ករ២៥គីឡូក្រាម ត្រីខ១០កំប៉ុង នំធុង១ធុង និងឃីត១កញ្ចប់ក្នុងនោះមាន មុង១ ភួយ១ សារុង១ ក្រមា១ ។ ក្នុងចំណោមអំណោយទាំងអស់នេះ នំធុងជារបស់លោកឧបនាយករដ្ឋមន្រ្តីកែ គឹមយ៉ាន ឯក្រៅពីនេះជារបស់កាកបាទក្រហមកម្ពុជា ។
លោកកែ គឹមយ៉ាន ឧបនាយករដ្ឋមន្ត្រី និងជាប្រធានក្រុមការងារចុះជួយខេត្តបន្ទាយមានជ័យថ្លែងថា រាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាធិបតីតេជោហ៊ុន សែន នាយករដ្ឋមន្ត្រី ក៏ដូចជាលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជានិច្ចកាលតែងតែយកចិត្តទុកដាក់ពីសុខទុក្ខប្រជាពលរដ្ឋហើយផ្តាំផ្ញើនូវការសួរសុខទុក្ខជាប្រចាំទៀតផងតាមរយៈថ្នាក់ដឹកនាំដែលចុះជួយមូលដ្ឋាន ៕
ចែករំលែកព័តមាននេះ