រាជធានីភ្នំពេញ ៖ បុរសអាមេរិកម្នាក់ត្រូវគេអះអាងថា បានគាំងបេះដូងលង់ទឹកស្លាប់ភ្លាមៗក្នុងស្រះទឹកមួយ ខណៈពេលកំពុងហែលទឹកលេងជាមួយក្មេងៗមួយក្រុមក្នុងភូមិ ។ ការលង់ទឹកស្លាប់ដោយចៃដន្យនេះ បង្កឱ្យមានការភ្ញាក់ផ្អើល កាលពីវេលាម៉ោង៤និង៥នាទីរសៀលថ្ងៃទី២០ កញ្ញា នៅក្នុងស្រះទឹកមួយស្ថិតក្នុងក្រុម៦ ភូមិទឹកថ្លា សង្កាត់ទឹកថ្លា ខណ្ឌសែនសុខ។
បុរសជនជាតិអាមេរិកដែលគាំងបេះដូងស្លាប់ក្នុងស្រះទឹកនេះឈ្មោះ JEFFREY G. EVANSON អាយុ៦០ឆ្នាំ ជាគ្រូបង្រៀនស្នាក់នៅផ្ទះលេខ១៧៧G ផ្លូវលេខ១០១៥ សង្កាត់ភ្នំពេញថ្មី ខណ្ឌសែនសុខ ។ យោងតាមលោកប៉ែន ថុល នាយប៉ុស្តិ៍នគរបាលរដ្ឋបាលទឹកថ្លាឱ្យដឹងថា មុនពេលកើតហេតុនាវេលាម៉ោង២និង៣០នាទីរសៀលថ្ងៃទី២០ កញ្ញា គេឃើញបុរសជនជាតិអាមេរិករូបនេះបបួលក្មេងៗក្នុងភូមិទៅហែលទឹកលេងនៅស្រះទឹកមួយក្នុងភូមិ ។ ពេលនោះមានក្មេងប្រុសៗ៥នាក់បានទៅហែលទឹកលេងជាមួយគាត់ លុះបានប្រហែលជាង២ម៉ោងស្រាប់តែឃើញក្មេងៗទាំងអស់នោះរត់មកផ្ទះវិញ ហើយប្រាប់ឪពុកម្តាយពួកគេថា បុរសជនជាតិអាមេរិករូបនោះលង់ទឹកស្លាប់ទើបបង្កឱ្យមានការភ្ញាក់ផ្អើលឡើងនិងមានមនុស្សទៅចោមរោមមើលកកកុញ ។
លោកប៉ែន ថុល បន្តថា ក្រោយពេលកើតហេតុ ប៉ូលិសបានចុះទៅដល់និងពិនិត្យសពជនជាតិអាមេរិកនោះទើបដឹងថា មិនមែនស្លាប់ដោយគេសម្លាប់ទេគឺដោយគាំងបេះដូងហើយលង់ទឹក ។ ក្រោយពេលពិនិត្យរួច សពត្រូវគ្រួសារយកទៅលំនៅឋានដើម្បីធ្វើបុណ្យ ៕
ចែករំលែកព័តមាននេះ