រាជធានីភ្នំពេញ ៖ ជន៤នាក់ក្លែងខ្លួនជាសង្ឃរួមនឹងបុរសពីរនាក់ទៀតដែលជាអ្នកបើករថយន្តជូនដំណើរ ត្រូវបានកម្លាំងប៉ូលិសប៉ុស្តិ៍ក្រាំងធ្នង់ និងប៉ូលិសខណ្ឌពោធិ៍សែនជ័យ ចាប់ខ្លួន ខណៈ ពេលពួកគេជិះរថយន្តពីរគ្រឿងមានដឹកស្បង់ចីវរ និងបាតក្នុងឃ្លុបរថយន្តខាងក្រោយទៅរកទីតាំងស្ងាត់ដើម្បីស្លៀកស្បង់ចីវរចេញដើរបិណ្ឌបាត ប៉ុន្តែដោយប៉ូលិសមានការសង្ស័យ និងធ្វើការស្រាវជ្រាវយូរមកហើយនោះ ទើបឈានដល់ការចាប់ខ្លួនតែម្តង ។
ការចាប់ខ្លួននោះបានធ្វើឡើងកាលពីវេលាម៉ោង៨ និង៤៥នាទីព្រឹកថ្ងៃទី២០ កញ្ញា ឆ្នាំ២០១២ នៅតាមផ្លូវលេខ២០១១ ស្ថិតក្នុងភូមិត្រពាំងជើងស្រុក សង្កាត់ក្រាំងធ្នង់ ខណ្ឌពោធិ៍សែនជ័យ ។
ក្រុមជនសង្ស័យទាំង៦នាក់នេះ ១-ឈ្មោះជីម ណាត អាយុ២៧ឆ្នាំ ២-ឈ្មោះសន ណាក់ អាយុ៣៦ឆ្នាំ ៣-ឈ្មោះទូច ណែត អាយុ២៥ឆ្នាំ ៤-ឈ្មោះបឿន ធី អាយុ២៣ឆ្នាំ ៥-ឈ្មោះសន សុណៃ អាយុ៣៣ឆ្នាំ និង៦ឈ្មោះសន សំអូន អាយុ៣២ឆ្នាំ ។ ជនទាំង៦នាក់នោះមានស្រុកកំណើតនៅស្រុកមេសាង ខេត្តព្រៃវែង ជាមួយគ្នា ហើយសព្វថ្ងៃស្នាក់នៅក្នុងភូមិអណ្តូង៣ សង្កាត់គោករកា ខណ្ឌពោធិ៍សែនជ័យ ។ ក្រោយពេលចាប់ខ្លួនប៉ូលិសដកហូតបានសម្ភារមួយចំនួនរួមមានរថយន្តម៉ាកកូរ៉ូឡា ពណ៌ស ពីរគ្រឿង ដែលមួយគ្រឿងពាក់ស្លាកលេខភ្នំពេញ 2Q 6252 និងមួយគ្រឿងទៀតពាក់ស្លាកលេខកំពង់ចាម 2A0245 ព្រមទាំងបាតចំនួន៩ ស្បង់ចីវរចំនួន៥កំប្លេ និងឆត្រចំនួន១១ ។
លោកវរសេនីយ៍ទោ ប៊ន សំអាត អធិការប៉ូលិសខណ្ឌពោធិ៍សែនជ័យ បានមានប្រសាសន៍ថា ជនទាំង៦នាក់ខាងលើនេះគឺបានក្លែងខ្លួនជាសង្ឃចេញដើរបិណ្ឌបាតបោកប្រាសប្រជាពលរដ្ឋជាយូរមកហើយដែលក្នុង១ថ្ងៃៗពួកគេរកប្រាក់បានរាប់ម៉ឺនរៀល ដោយពួកគេមិនបានគិតដល់ថា ខ្លួនកំពុងតែជាន់ឈ្លីវិស័យព្រះពុទ្ធសាសនាដែលជាសាសនារបស់រដ្ឋនោះឡើយ ។ ម្យ៉ាងទៀតប្រជាពលរដ្ឋតែងតែមានជំនឿខ្លាំងណាស់ម្នាក់ៗពេលបានឃើញជនទាំងនេះទៅស្លៀកស្បង់ចីវរចេញទៅបិណ្ឌបាតម្តងៗពួកគាត់មានជំនឿបានយកបាយ ឬបច្ច័យទៅដាក់បាតដោយគ្មានការសោកស្តាយអ្វីទាំងអស់ ព្រោះក្នុងនាមខ្លួនជាអ្នកកាន់ព្រះពុទ្ធសាសនា ។
លោកអធិការបានបន្តថា ការជឿជាក់នោះគឺដោយសារតែបងប្អូនប្រជាពលរដ្ឋទាំងអស់មិនបានដឹងថា ជនទាំងនោះគឺជាសង្ឃក្លែងក្លាយនោះទេ ហើយមិនត្រឹមតែយកចង្ហាន់ ឬបច្ច័យទៅប្រគេន និងដាក់បាតប៉ុណ្ណោះទេ គឺថែមទាំងក្រាមថ្វាយបង្គំឱនក្បាលដល់ដីទៀតផង ។ តាមពិតជនទាំងនេះគឺជាជនក្លែងខ្លួនដែលជាអ្នកប្រព្រឹត្តបទល្មើសទៅនឹងច្បាប់ ។
លោកអធិការបានបន្តថា ទម្រាំតែចាប់ខ្លួនបកស្បែកសង្ឃក្លែងក្លាយនោះបាន គឺលោកបានដាក់កម្លាំងធ្វើការតាមដានរយៈពេលជាង១ខែមកហើយ ។ រហូតដល់ព្រឹកថ្ងៃទី២០ កញ្ញា បានប្រទះឃើញរថយន្តរបស់ក្រុមសង្ឃក្លែងក្លាយទាំងនោះបើកចេញពីផ្ទះនៅក្នុងភូមិអណ្តូង៣ សង្កាត់គោករកា ។ ពេលនោះកម្លាំងប៉ូលិសរបស់លោកបានចេញធ្វើការស្ទាក់ចាប់ត្រួតពិនិត្យបានប្រទះឃើញមានបុរស៤នាក់ក្បាលត្រងោល ឯពីរនាក់ទៀតដែលជាអ្នកបើករថយន្តគឺមានសក់ធម្មតា ហើយបន្ទាប់ពីការឆែកឆេរបន្តបន្ទាប់បានរកឃើញបាត និងស្បង់ចីវរ ព្រមទាងឆត្រទើបនាំខ្លួនទៅធ្វើការសាកសួរ ។
លោកអធិការបានបន្តថា ក្រោយពេលសាកសួរជនទាំងនោះបានសារភាពថា ពួកគេពិតជាបានក្លែងខ្លួនជាសង្ឃចេញដើរបិណ្ឌបាតមែនដោយបានធ្វើបែបនេះយូរមកហើយ ។ ពេលពួកគេជិះរថយន្តដល់កន្លែងស្ងាត់ទើបស្លៀកស្បង់ចីវរចេញដើរបិណ្ឌបាតតែម្តង ។ បន្ទាប់ពីមានចម្លើយសារភាព និងវត្ថុតាងជាក់ស្តែងបែបនេះ លោកបានបញ្ជាឱ្យនាំខ្លួនជនទាំងនោះទៅកាន់ផ្នែកព្រហ្មទណ្ឌដើម្បីសាកសួរ និងកសាងសំណុំរឿងបន្តបញ្ជូនទៅតុលាការចាត់ការតាមច្បាប់ ៕
ចែករំលែកព័តមាននេះ