ខេត្តស្វាយរៀង ៖ យ៉ាងហោចណាស់មានកម្មការិនីរោងចក្រយ៉ក ផលិតស្រោមដៃ(Yorks Cambodia)ចំនួន៧៦នាក់ បានដួលសន្លប់ជាបន្តបន្ទាប់ធ្វើឱ្យកម្មករកម្មការិនីក្នុងរោងចក្រជាង៥០០នាក់ភ័យស្លន់ស្លោនាំគ្នារត់ចេញពីរោងចក្រដោយសារមានធុំក្លិនថ្នាំពុល ។ ហេតុការណ៍នេះ បានកើតឡើងកាលពីថ្ងៃទី២១ កញ្ញា វេលាម៉ោង៨និង២០នាទីព្រឹក នៅរោងចក្រដែលមានទីតាំងនៅភូមិព្រៃស្តៅ សង្កាត់ច្រកម្ទេស ក្រុងបាវិត ។
កម្មការិនីឈ្មោះសៀវ ស្រី អាយុ២៧ឆ្នាំ មានផ្ទៃពោះ៤ខែ និងមានទីលំនៅភូមិព្រៃទទឹង ឃុំប្រសូត ស្រុកស្វាយទាបថា នាងបានចូលធ្វើការនៅវេលាម៉ោង៧និង៣០នាទីព្រឹក ខណៈពេលកំពុងធ្វើការ ស្រាប់តែធុំក្លិនថ្នាំភាយចូលក្នុងអគាររោងចក្រក៏ទន់ដៃទន់ជើងដួលសន្លប់តែម្តង លុះពេលដឹងខ្លួនឡើងស្រាប់តែនៅក្នុងមន្ទីរពេទ្យ ហើយនាងចុកក្នុងពោះដែលគ្រូពេទ្យប្រាប់ថា ក្លិនថ្នាំអាចប៉ះពាល់ដល់ទារកក្នុងផ្ទៃ ។ ចំណែកកម្មការិនីម្នាក់ទៀតឈ្មោះវ៉ែន សម្បត្តិ អាយុ១៩ឆ្នាំ មានផ្ទៃពោះ២ខែ និងមានទីលំនៅភូមិជប់ព្រីង ឃុំថ្មី ស្រុកកំពង់រោទិ៍ ដែលដួលសន្លប់ហើយមានអាការៈចុកពោះដែរ គ្រូពេទ្យប្រាប់ថាប៉ះពាល់ដល់កូនក្នុងផ្ទៃដូចគ្នា ។
លោកណេប សារ៉ុន អភិបាលស្តីទីក្រុងបាវិតថ្លែងថា រោងចក្រ Yorks Cambodia មានកម្មករកម្មការិនីសរុបជាង៥០០នាក់ ហើយការដួលសន្លប់នេះសង្ស័យថា មកពីក្លិនថ្នាំពុល ព្រោះកសិករបាញ់ថ្នាំសម្លាប់សត្វល្អិតនៅក្នុងស្រែចម្ងាយប្រមាណ២០០ម៉ែត្រពីរោងចក្រ ។ លុះពេលមានខ្យល់បក់ចូលទៅក្នុងរោងចក្រក៏បណ្តាលឱ្យដួលសន្លប់បន្តបន្ទាប់ចំនួន៧៦នាក់ និងជាង៤០០នាក់រត់ចេញមកក្រៅ ។ ដោយសារហេតុការណ៍នេះ ក្រុមហ៊ុនបានឱ្យសម្រាក១ថ្ងៃដើម្បីសម្អាតអគាររោងចក្រហើយរូបលោករួមជាមួយមន្ត្រីសាលាក្រុង នគរបាល កងរាជអាវុធហត្ថក្រុង បានទៅជួយអន្តរាគមន៍ដោយហៅរថយន្តសាមុយមន្ទីរពេទ្យស្រុកប្រតិបត្តិជីភូ និងរថយន្តឯកជន មកដឹកកម្មការិនីទាំង៧៦នាក់ទៅកាន់មន្ទីរពេទ្យបង្អែកស្រុកប្រតិបត្តិជីភូដើម្បីសង្គ្រោះ ។
លោកវេជ្ជបណ្ឌិតសូ សុណារី ប្រធានការិយាល័យសុខាភិបាលស្រុកប្រតិបត្តិជីភូមានប្រសាសន៍ថា មន្ទីរពេទ្យមានរថយន្តសាមុយតែមួយគ្រឿង ហើយកម្មករកម្មការិនីរោងចក្រមានគ្រោះថ្នាក់ជាញឹកញាប់ពេលមានអាសន្នគ្មានរថយន្តដឹកទេ ដូច្នេះលោកសំណូមពរដល់រាជរដ្ឋាភិបាលមេត្តាផ្តល់រថយន្តសាមុយមួយគ្រឿងទៀតដើម្បីធានាការដឹកជញ្ជូនឱ្យបានទាន់ពេល។ ចំពោះការដួលសន្លប់របស់កម្មការិនីនេះ បើតាមកម្មការិនីថា ពុលក្លិនក្រណាត់ តែលោកព្រំ ចាន់ថា តំណាងរោងចក្រយ៉កនិយាយថា ពុំមែនសន្លប់ដោយសារធុំក្លិនពីក្រណាត់ទេ គឺពុលក្លិនថ្នាំដែលម្ចាស់ស្រែបាញ់ថ្នាំស្រូវនៅខាងលិចរោងចក្រ ។ ការលើកឡើងបែបនេះដោយសំអាងថា បុគ្គលិកសន្តិសុខរោងចក្របានឃើញម្ចាស់ស្រែបាញ់ថ្នាំនៅវេលាម៉ោង៧ព្រឹក ក៏ប៉ុន្តែម្ចាស់ស្រែឈ្មោះឡឹក សាវ៉ាន់ ភេទប្រុស អាយុ៣៧ឆ្នាំ នៅភូមិព្រៃផ្តៅ ដែលមានស្រែជាប់រោងចក្រនោះបដិសេធថា រូបគាត់ពុំបានបាញ់ថ្នាំទេ ។ គាត់បានអះអាងថា រូបគាត់នឹងដកដើមស្រូវមកហូបឱ្យមើល បើមានជាតិពុលគឺពុលហើយ ។
ដោយសារការចោទប្រកាន់និងការបដិសេធដ៏ចម្រូងចម្រាសនេះ លោកប្រាជ សាឡន ប្រធានការិយាល័យកសិកម្មក្រុងបាវិត បានចុះពិនិត្យស្រែរបស់កសិករឈ្មោះឡឹក សាវ៉ាន់ ហើយមានប្រសាសន៍ថា ការចោទប្រកាន់របស់តំណាងរោងចក្រយ៉កថាកម្មការិនីដួលសន្លប់មកពីការភាយក្លិនថ្នាំពុលកសិករបាញ់ថ្នាំស្រូវនោះលោកសូមបដិសេធ ពីព្រោះក្នុងស្រែពុំមានរកឃើញសារជាតិពុលឡើយ ។ ប៉ុន្តែនៅក្នុងភូមិព្រៃផ្តៅ ចម្ងាយប្រមាណជា៧០០ម៉ែត្រទៅ៩០០ម៉ែត្រខាងលិចរោងចក្រ គឺមានកសិករម្នាក់បាញ់ថ្នាំសម្លាប់សត្វល្អិត«ក្រឹង»លើដំណាំស្រូវមែន ។ ដូច្នេះការសាយក្លិនក៏មិនអាចភាយមកដល់ទេ ពីព្រោះឆ្លងកាត់ផ្ទះប្រជាពលរដ្ឋមួយភូមិ ។ បើពុលដោយសារថ្នាំបាញ់ស្រូវគឺពុលអ្នកភូមិហើយ ជាពិសេសអ្នកបាញ់ថ្នាំខ្លួនឯង ហើយនៅចំណុចកើតហេតុមានរោងចក្រចំនួន៣គឺរោងចក្រម័រ និងរោងចក្រកង់អាត្លង់ទិក ទើបដល់រោងចក្រយ៉ក ។ ចុះហេតុអ្វីពុលសន្លប់តែរោងចក្រយ៉ក? សូមមន្ត្រីមន្ទីរការងារ ឬក្រសួងការងារចុះស្រាវជ្រាវរកមូលហេតុនៃការពុលនេះឱ្យបានច្បាស់ ។
រីឯកម្មការិនីម្នាក់សុំមិនបញ្ចេញឈ្មោះនិយាយថា រូបនាងនិងកម្មការិនីផ្សេងទៀតបានធ្វើការថែមម៉ោងរហូតដល់យប់ ហើយព្រឹកឡើងមកធ្វើការទៀតទើបអស់កម្លាំង លុះពេលធុំក្លិនក្រណាត់ក៏ពុលដួលសន្លប់តែម្តង ៕
ចែករំលែកព័តមាននេះ