ខេត្តព្រះសីហនុ ៖ ជនសង្ស័យម្នាក់ក្នុងចំណោមជនសង្ស័យចំនួន២នាក់ត្រូវបានកម្លាំងសមត្ថកិច្ចចម្រុះស្រុកស្រែអំបិល សហការជាមួយសមត្ថកិច្ចចម្រុះស្រុកព្រៃនប់ ធ្វើការឡោមព័ទ្ធរួចបាញ់ បណ្តាលឱ្យស្លាប់ភ្លាមៗនៅនឹងកន្លែងកើតហេតុ បន្ទាប់ពីជនសង្ស័យទាំងនេះបានធ្វើសកម្មភាពប្លន់ពីស្រុកស្រែអំបិល ហើយរត់គេចខ្លួនបម្រុងសំដៅទៅខេត្តព្រះសីហនុ ។ ហេតុការណ៍នេះបានកើតឡើង កាលពីថ្ងៃទី២១ កញ្ញា ២០១២ វេលាម៉ោង១០និង១០នាទីយប់ នៅចម្ងាយផ្សារវាលរេញប្រហែល៣០០ម៉ែត្រ ស្ថិតក្នុងភូមិបឹងវែង ឃុំវាលរេញ ស្រុកព្រៃនប់ ។
តាមព័ត៌មានចេញពីសមត្ថកិច្ចទាំង២ស្រុកបានឱ្យដឹងថា ជនសង្ស័យខាងលើនេះមិនមែនមានគ្នាតែ២នាក់នោះទេ គឺមានគ្នាទាំងអស់ចំនួន៣នាក់ ក្នុងនោះមានស្រីម្នាក់ផងដែរ ហើយមុនពេលកើតមានប្រតិបត្តិការបាញ់នេះ ប្រហែលជាជាងមួយម៉ោង គឺនៅវេលាម៉ោងជាង៩យប់ជនសង្ស័យទាំងនេះប្រដាប់ដោយកាំភ្លើងខ្លីចំនួន២ដើម បានធ្វើសកម្មភាពប្លន់ផ្ទះប្រជាពលរដ្ឋជាអ្នកលក់បាយដែលមានម្ចាស់ផ្ទះឈ្មោះដិក ឡឹក អាយុ៥២ឆ្នាំ ប្រពន្ធឈ្មោះហេង ឈុនឡាយ អាយុ៣៩ឆ្នាំ មានទីលំនៅភូមិតាធង ឃុំដងពែង ស្រុកស្រែអំបិល ខេត្តកោះកុង ប្លន់យកបានប្រាក់៩ពាន់បាត លុយខ្មែរ៩០ម៉ឺរៀល ដុល្លារ១៧០ដុល្លារ ទូរស័ព្ទដៃ៣គ្រឿង នាឡិកាមួយគ្រឿង ចិញ្ចៀនប្លាទីនចំនួន៤វង់ ទម្ងន់៥ជី កងដៃប្លាទីនមួយខ្សែ និងរថយន្តម៉ាកកូរ៉ូឡា ពណ៌សំបកឪឡឹកមួយគ្រឿង។
នៅពេលព្រឹកជនសង្ស័យទាំង៣នាក់ និងបក្សពួក៣នាក់ផ្សេងទៀតសរុប៦នាក់ ប្រុស៣នាក់ ស្រី៣នាក់ បានចូលមកហូបបាយថ្ងៃត្រង់ម្តងរួចមកហើយ ហើយក្រោយពីបាយរួចក៏ចេញទៅបាត់អស់ទៅ លុះដល់ម៉ោងជិត៩យប់ក៏ឃើញមានគ្នាតែ ៣នាក់ ប្រុស២ ស្រីម្នាក់ ជិះម៉ូតូមួយគ្រឿង (មិនស្គាល់ម៉ាក) មកចូលស៊ីបាយម្តងទៀត លុះពេលស៊ីរួចរាល់ក៏ហៅម្ចាស់ផ្ទះឱ្យគិតលុយ ហើយក៏ធ្វើសកម្មភាពប្លន់ដោយប្រើប្រាស់អាវុធខ្លីចំនួន២ដើម ភ្ជង់រួចចាប់ចងម្ចាស់ផ្ទះទាំង២នាក់ប្តីប្រពន្ធ រួមទាំងអ្នកបម្រើម្នាក់ឱ្យដេកផ្កាប់មុខក្នុងបន្ទប់ ដោយជនសង្ស័យប្រុស២នាក់ជាអ្នកឈរភ្ជង់ រីឯស្រីម្នាក់ជាអ្នកដើរកកូកកាយរកលុយកាក់មាសប្រាក់មានតម្លៃ លុះប្រមូលបានហើយជនសង្ស័យ២នាក់ ស្រីមួយ ប្រុសមួយ ក៏ឡើងបើករថយន្តរបស់ចាស់ផ្ទះចេញមក ហើយជនសង្ស័យម្នាក់ទៀតក៏ជិះម៉ូតូដែលពួកខ្លួនជិះមកធ្វើសកម្មភាពចេញមកតាមក្រោយ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ