រាជធានីភ្នំពេញ ៖ ជនប្រដាប់អាវុធម្នាក់មានសមាសភាពមិនទាន់ច្បាស់លាស់ត្រូវបានកម្លាំងប៉ូលិសប៉ុស្តិ៍គោលដៅ២៤ម៉ោងរបស់ខណ្ឌពោធិ៍សែនជ័យចាប់ខ្លួន ក្នុងខណៈពេលដែលជននោះជិះម៉ូតូមួយគ្រឿងអត់ពាក់មួក និងអត់កញ្ចក់ហើយត្រូវបានប៉ូលិសឃាត់ដើម្បីសួរនាំ ។ ប៉ុន្តែជននោះមិនត្រឹមតែមិនព្រមឈប់ប៉ុណ្ណោះទេ ថែមទាំងបើកបំបុកប៉ូលិសឲ្យដួល ហើយដកកាំភ្លើងខ្លីបា.ញ់ទៅលើប៉ូលិស១
រាជធានីភ្នំពេញ ៖ ជនប្រដាប់អាវុធម្នាក់មានសមាសភាពមិនទាន់ច្បាស់លាស់ត្រូវបានកម្លាំងប៉ូលិសប៉ុស្តិ៍គោលដៅ២៤ម៉ោងរបស់ខណ្ឌពោធិ៍សែនជ័យចាប់ខ្លួន ក្នុងខណៈពេលដែលជននោះជិះម៉ូតូមួយគ្រឿងអត់ពាក់មួក និងអត់កញ្ចក់ហើយត្រូវបានប៉ូលិសឃាត់ដើម្បីសួរនាំ ។ ប៉ុន្តែជននោះមិនត្រឹមតែមិនព្រមឈប់ប៉ុណ្ណោះទេ ថែមទាំងបើកបំបុកប៉ូលិសឲ្យដួល ហើយដកកាំភ្លើងខ្លីបាញ់ទៅលើប៉ូលិស១គ្រាប់ទៀត ប៉ុន្តែសំណាងល្អមិនផ្ទុះ ទើបត្រូវបានប៉ូលិសចាប់ខ្លួនភ្លាមៗ ។
ហេតុការណ៍នោះបានកើតឡើងកាលពីវេលាម៉ោង៨ និង៤៥នាទីព្រឹកថ្ងៃទី២១ កញ្ញា នៅលើកំណាត់ផ្លូវចោមចៅត្រង់ចំណុចប៉ុស្តិ៍គោលដៅ២៤ម៉ោង ស្ថិតក្នុងភូមិត្រពាំងថ្លឹងសង្កាត់ចោមចៅ ខណ្ឌពោធិ៍សែនជ័យ ។ ជនខ្មាន់កាំភ្លើងខាងលើនេះឈ្មោះតូច វិចិត្រ អាយុ២៥ឆ្នាំ មុខរបរ និងទីលំនៅមិនពិតប្រាកដប្រើកាំភ្លើងខ្លីមួយដើមម៉ាកកា៥៤ផលិតនៅអតីតសហភាពសូវៀត បង់មួយ និងគ្រាប់ចំនួន១១គ្រាប់ ជិះម៉ូតូ១គ្រឿងម៉ាកសេ១២៥ស៊េរីឆ្នាំ២០១២ ពាក់ស្លាកលេខភ្នំពេញ១AB២៤៥៥ ពណ៌ខ្មៅ ជាស្លាកលេខម៉ូតូផ្សេងទេ តែជននោះបានយកទៅចាប់ពាក់ឲ្យម៉ូតូដែលខ្លួនជិះ ។
តាមប្រភពព័ត៌មានពីមន្រ្តីប៉ូលិសគោលដៅ២៤ម៉ោងផ្លូវចោមចៅនោះ បានឲ្យដឹងថា នៅមុនពេលកើតហេតុខាងលើ ជនសង្ស័យរូបនេះបានជិះម៉ូតូមួយគ្រឿងក្នុងល្បឿនយ៉ាងលឿនក្នុងទិសដៅពីកើតទៅលិច ។ លុះពេលទៅដល់ចំណុចគោលដៅ២៤ម៉ោងនោះ ដោយមានការសង្ស័យលោកវរសេនីយ៍ទោ ប៊ន សំអាត អធិការប៉ូលិសខណ្ឌពោធិ៍សែនជ័យ បានបញ្ជាឲ្យ កម្លាំងប៉ូលិសចេញឃាត់ឲ្យឈប់ដើម្បីត្រួតពិនិត្យ ព្រោះពេលនោះជនខាងលើមិនមានពាក់មួកសុវត្ថិភាពនោះទេ ឯម៉ូតូក៏មានការសង្ស័យច្រើនដែរដោយអត់មានកញ្ចក់មើលក្រោយ ហើយស្លាកលេខក៏ខុសស៊េរីអត់បាញ់កិបទេ បែរជាចាប់ខ្ចៅទៅវិញ ។
ប្រភពដដែលបានបន្តថា នៅក្នុងខណៈនោះជនសង្ស័យមិនព្រមឈប់ឲ្យធ្វើការត្រួតពិនិត្យទេ គេបានព្យាយាមបើករត់គេចខ្លួន និងបានបើកបំបុកប៉ូលិសម្នាក់បណ្តាលឲ្យដួលទាំងអស់គ្នា ។ បន្ទាប់មកជនសង្ស័យបានស្ទុះក្រោកឡើង និងបានដកកាំភ្លើងខ្លីម៉ាកកា៥៤មួយដើមពីចង្កេះអាម៉េបញ្ចូលគ្រាប់រួចបាញ់ប្រហារទៅលើកម្លាំងប៉ូលិស១គ្រាប់ប៉ុនប៉ងដើម្បីដោះខ្លួន ។ ប៉ុន្តែសំណាងល្អពេលនោះកាំភ្លើងមិនផ្ទុះហើយជននោះបានអាម៉េបញ្ចូលគ្រាប់ថ្មី១គ្រាប់ទៀតម្រុងបាញ់ប៉ូលិសម្តងទៀត តែត្រូវបានប៉ូលិសលោតចូលទៅចាប់ឱបដណ្តើមបានកាំភ្លើង និងចាប់ខ្លួនជននោះបានភ្លាមៗ ។
ប្រភពដដែលបានបន្តថា ក្រោយចាប់ខ្លួនជននោះត្រូវបាននាំទៅកាន់ផ្នែកព្រហ្មទណ្ឌខណ្ឌពោធិ៍សែនជ័យដើម្បីធ្វើការសាកសួរ ។ ជននេះបានសារភាពប្រាប់ប៉ូលិសថា ខ្លួនគឺជាទាហានទិញឈ្មោះគេ និងឈរជើងនៅតំបន់ប្រាសាទព្រះវិហារ ហើយខ្លួនទើបត្រឡប់មកពីខេត្តព្រះវិហារមកដល់ភ្នំពេញកាលពីវេលាយប់ថ្ងៃទី២០ កញ្ញាដើម្បីយកកាំភ្លើងទៅលក់ឲ្យបក្សពួក ។ បក្សពួករបស់គេទូរស័ព្ទហៅឲ្យមកជួបនៅម្តុំរោងចក្រកាត់ដេរកាណាឌីយ៉ា ភូមិត្រពាំងថ្លឹង សង្កាត់ចោមចៅ ដើម្បីទិញកាំភ្លើងពីរូបគេ ។ មិនតែប៉ុណ្ណោះជននោះបានប្រាប់ថា ខ្លួនជាមនុស្សកំព្រាឪពុកម្តាយស្លាប់ចោលអស់ហើយសព្វថ្ងៃមិនមានកន្លែងស្នាក់នៅពិតប្រាកដនោះឡើយ ។
សមត្ថកិច្ចបានបន្តថា ជននេះសាហាវខ្លាំងណាស់ហ៊ានដកកាំភ្លើងបាញ់ប៉ូលិសទាំងកំរោលតែសំណាងល្អមិនផ្ទុះ ហើយគេមានការសង្ស័យថា ជននេះគឺជាមុខសញ្ញាក្រុមចោរប្លន់ប្រដាប់អាវុធដើររកធ្វើសកម្មភាពប្លន់ ប៉ុន្តែពុំទាន់មានឱកាសប៉ះចំថ្ងៃស៊យជួបកម្លាំងប៉ូលិសដកកាំភ្លើងបាញ់ដើម្បីដោះខ្លួន តែមិនផ្ទុះក៏ត្រូវចាប់ខ្លួនតែម្តង ។ ពេលនេះប៉ូលិសកំពុងធ្វើការស្រាវជ្រាវ និងកសាងសំណុំរឿងបន្ត ៕
ចែករំលែកព័តមាននេះ