រាជធានីភ្នំពេញ ៖ ការប្រកួតបាល់ទាត់ពានរង្វាន់ Soccer League លើកទី១ ឆ្នាំ២០១២ វគ្គជម្រុះតាមពូល៣៣ក្រុមដំបូងនឹងចាប់ផ្តើមពីថ្ងៃទី២៩ កញ្ញា តទៅនៅលើទីលានមួយចំនួនដូចជា ទីលានពហុកីឡដ្ឋានជាតិ ស្តាតចាស់ ទីលានមជ្ឈមណ្ឌលកីឡាបាល់ទាត់ជាតិចែងម៉ែង និងទីលានភ្នំពេញក្រោននៅខណ្ឌប្ញស្សីកែវ ជាដើម ។
ពិធីប្រកាសឱ្យមានការប្រកួតជាផ្លូវការនូវវគ្គប្រកួតជម្រុះតាមពូលជុំដំបូងបានធ្វើឡើងនៅសាលប្រជុំណាហ្គាវើល កាលពីព្រឹកថ្ងៃទី២០ កញ្ញា កន្លងមក ដោយបានការអញ្ជើញចូលរួមពីលោកហ៊ុន ម៉ានី អនុប្រធានសមាគមយុវជនកម្ពុជា និងជាប្រធានគណៈកម្មការប្រតិបត្តិសម្រាប់ពានរង្វាន់ Soccer League លោកមុំ ច័ន្ទករុណា អនុប្រធានសមាគមយុវជនកម្ពុជា និងជាប្រធានគណៈកម្មការរៀបចំការប្រកួត និងតំណាងក្លិបទាំង៣៣ ។
លោកម៉ៃ តុលា ប្រធានគណៈកម្មការបច្ចេកទេសបានឱ្យដឹងថា ក្រុមទាំង៣៣នេះនឹងធ្វើការចាប់ឆ្នោតចែកចេញជា៨ពូល ចាប់ពីពូល Aរហូតដល់ពូលH ។ ក្រោយពីការចាប់ឆ្នោតដើម្បីស្វែងរកក្រុមតាមពូលនីមួយៗឈានទៅធ្វើការប្រកួតតាមរូបមន្តជម្រុះក្នុងពូលរួចមក សម្រាប់ពូល A មាន២ក្រុម ដែលត្រូវបានផ្តល់អាទិភាពមុនគេដោយមិនបាច់ឆ្លងកាត់ការចាប់ឆ្នោត គឺក្រុមយុវជនក្នុងបុព្វហេតុមាតុភូមិ និងក្រុមយុវជនទូរទស្សន៍បាយ័ន ចំណែក២ក្រុមទៀតគឺក្រុមនិស្សិតបញ្ញវន្ត ប្រជាធិបតេយ្យកម្ពុជា និងក្រុមយុវជនខេត្តស្វាយរៀង។ ពូល B មានក្រុមយុវជនខណ្ឌមានជ័យ ក្រុមយុវជនអាស៊ាន ក្រុមយុវជនខេត្តកោះកុង និងក្រុមយុវជនខេត្តសៀមរាប ។ ពូល C មានក្រុមយុវជនក្រសួងការងារ និងបណ្តុះបណ្តាលវិជ្ជាជីវៈ ក្រុមយុវជនក្រសួងទេសចរណ៍ ក្រុមយុវជនក្រសួងកសិកម្ម និងក្រុមយុវជនខណ្ឌប្ញស្សីកែវ ។ ពូល D មានក្រុមយុវជនខេត្តព្រៃវែង ក្រុមយុវជនអ៊ិស្លាមកម្ពុជា ក្រុមយុវជនអប្សរា២ធ្នូ និងក្រុមយុវជនក្រសួងពាណិជ្ជកម្ម ។ ពូល E មានក្រុមយុវជនបេះដូងខ្មែរ ក្រុមយុវជនខណ្ឌទួលគោក ក្រុមចលនាយុវជនកម្ពុជា១៥៧ និងក្រុមយុវជនក្រសួងព័ត៌មាន ។ ពូល F មានក្រុមយុវជនខណ្ឌដង្កោ ក្រុមយុវជនខេត្តកំពង់ស្ពឺ ក្រុមយុវជនទីស្តីការគណៈរដ្ឋមន្ត្រី និងក្រុមយុវជនក៧៧ ។ ពូល G មានក្រុមយុវជនបៃតង ក្រុមយុវជនក្រសួងសង្គមកិច្ច អតីតយុទ្ធជន និងយុវនីតិសម្បទា ក្រុមបាល់ទាត់ក្លិបកម្សាន្តហាស់ និងក្រុមយុវជនស្ម័គ្រចិត្ត ក១២ ។ រីឯពូល H ដែលមានរហូតដល់ទៅ៥ក្រុមនោះ មានក្រុមសាលាដំបូងរាជធានីភ្នំពេញ ក្រុមយុវជនណាហ្គាវើល ក្រុមយុវជនខណ្ឌសែនសុខ ក្រុមយុវជនធនាគារជាតិនៃកម្ពុជា និងក្រុមយុវជនក្រុមហ៊ុនវីតាល់ ។
លោកហ៊ុន ម៉ានី បានមានប្រសាសន៍ថា មូលហេតុដែលលោក និងគណៈកម្មការទាំងអស់រៀបចំឱ្យមានព្រឹត្តិការណ៍នៃការប្រកួតនេះឡើង គឺដើម្បីចូលរួមចំណែកលើកកម្ពស់វិស័យបាល់ទាត់ផង និងធ្វើយ៉ាងណាឱ្យយុវជនយើងទាំងអស់ដែលជាកោសិកាសង្គមនោះមានឱកាសបានធ្វើទំនាក់ទំនងគ្នា សាមគ្គីភាពរវាងក្រុមមួយទៅក្រុមមួយទៀត និងក៏មានបំណងចង់ឱ្យពួកគេចៀសឱ្យផុតពីគ្រឿងញៀន និងអំពើមិនល្អដទៃទៀត ដែលសង្គមស្អប់ខ្ពើម ៕
ចែករំលែកព័តមាននេះ