ខេត្តក្រចេះ ៖ នេះជាលើកដំបូងហើយដែលសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិងលោកជំទាវកិតិ្តព្រឹទ្ធបណ្ឌិត អញ្ជើញជាអធិបតីដ៏ខ្ពង់ខ្ពស់ក្នុងពិធីសំណេះសំណាលនិងប្រគល់ប័ណ្ណកម្មសិទ្ធិដីធ្លីជូនប្រជាពលរដ្ឋឃុំស្រែចារ និងឃុំ២ធ្នូ ក្រោមតំណក់ភ្លៀងនាព្រឹកថ្ងៃទី២១ កញ្ញា ឆ្នាំ២០១២ ស្ថិតនៅឃុំស្រែចារ ស្រុកស្នួល ខេត្តក្រចេះ បន្ទាប់ពីការវាស់វែងដីធ្លីបានចប់ ជាស្ថាពរចំនួន៥៦០គ្រួសារលើក្បាលដី៨៩០ក្បាលដី ។
រយៈពេលជាងពីរម៉ោងបន្ទាប់ពីបានធ្វើការសំណេះសំណាលជាមួយប្អូនៗក្មួយៗយុវជនស្ម័គ្រចិត្ត និងជាមួយប្រជាពលរដ្ឋមួយចំនួនដែលស្ថិតនៅក្នុងឃុំទាំងនោះអំពីការលំបាកការងាយស្រួលនិងទៅអនាគត សម្តេចតេជោនាយករដ្ឋមន្ត្រីហ៊ុន សែន មានប្រសាសន៍ថា ថ្ងៃនេះយើងបានធ្វើសិក្ខាសាលាមួយដើម្បីស្វែងយល់នូវទិដ្ឋភាពទាំងឡាយនៅឃុំស្រែចារនេះ តែម្តង ។ បញ្ហាដែលបានកើតឡើងនៅទីនេះក៏អាចកើតឡើងនៅកន្លែងដទៃៗទៀតដែរ ដែលទម្រង់នៃការដោះស្រាយជាបន្តបន្ទាប់ពីការដោះ ស្រាយដីធ្លី ក៏អាចផ្តល់នូវអាទិភាព៤យ៉ាងបន្ថែម ដើម្បីគាំទ្រនូវកំណើន និងបន្ទាប់ពីការផ្តល់កម្មសិទ្ធិដល់ប្រជាពលរដ្ឋដែលរួមមានបញ្ហាផ្លូវ សាលារៀន មណ្ឌលសុខភាព និងបញ្ហាទឹក ជាអាទិភាពចម្បងក្នុងការចាត់ចែងនិងដោះស្រាយដោយស្ថាប័នដោះស្រាយលើតំបន់ទាំងអស់ដែលបានវាស់វែងដីធ្លីជូនប្រជាពលរដ្ឋ ។
សម្តេចតេជោបញ្ជាក់ថា សូមធ្វើការផ្សព្វផ្សាយថា ការវាស់វែងនឹងត្រូវដំណើេរការបន្តហើយបើសិនជាមិនទាន់ចប់ខ្ញុំក៏មិនទាន់ដកថយដែរ ។ អ្វីដែលមិនអាចវាស់វែងបានគឺដីមានទំនាស់ដូចបានលើកឡើងនៅសល់១២ក្បាលដីដែលមានទំនាស់គឺមិនអាចវាស់វែងបាន ហើយករណីអ្នកកាប់ទន្រ្ទានដីថ្មីៗដែលកាប់បំពានក៏មិនអាចវាស់វែងជូនបានដែរ ព្រោះរដ្ឋមិនអាចទទួលយកបានឡើយពីសំណាក់ក្រុមជនណាមួយឱ្យរដ្ឋបាលឬរាជរដ្ឋាភិបាលទទួលស្គាល់នៅអំណាចរបស់ខ្លួនទេ ។
ចំពោះប្រជាពលរដ្ឋដែលមិនបានវាស់វែងសម្ដេចមានប្រសាសន៍ថា មិនថានៅខេត្តក្រចេះនៅទូទាំងប្រទេស សូមមេត្តាកុំបារម្ភបញ្ហានេះគ្រាន់តែបញ្ហាពេលវេលាតែប៉ុណ្ណោះ ចាំបាច់ត្រូវតែដំណើរការនេះជាបន្តទៅទៀត ការវាស់វែងជូន ។
ទាក់ទិននឹងការអញ្ជើញរបស់សង្គមស៊ីវិលដែលបានធ្វើសិក្ខាសាលាស្ដីអំពីដីធ្លីសម្រាប់គណបក្សនយោបាយសម្ដេចតេជោ សូមផ្ញើសារត្រឡប់ទៅវិញថា គណបក្សប្រជាជនកម្ពុជាគ្មានពេលវេលាសម្រាប់ការចូលរួមសិក្ខាសាលានៅក្នុងសណ្ឋាគារទេ គណបក្សប្រជាជនកម្ពុជាមានគោលនយោបាយច្បាស់លាស់ចំពោះបញ្ហាដីធ្លីរួចស្រេចទៅហើយតាមនយោបាយរបស់គណបក្ស ហើយរាជរដ្ឋាភិបាលកំពុងអនុវត្តន៍ ។
គណបក្សប្រជាជនកម្ពុជា ឬ រាជរដ្ឋាភិបាលបានកើតមុនសង្គមស៊ីវិលបាន ហើយការដោះស្រាយនយោបាយដីធ្លីនេះ មិនមែនជាបញ្ហាថ្មីរបស់គណបក្សប្រជាជនកម្ពុជាទេ មិនមែនជារឿងថ្មីរបស់រាជរដ្ឋាភិបាលទេ ។ នយោបាយចាស់ សកម្មភាពថ្មី ដោយសារមិនមែនរឿងថ្មីរបស់គណបក្សប្រជាជន ហើយក៏មិនមែនរឿងថ្មីរបស់ហ៊ុន សែន ទេ ។ នេះជាលើកទី៤ ដែលបានដោះស្រាយដីធ្លីជូនប្រជាជន។ លើកទី១ ក្រោយថ្ងៃរំដោះ ១៩៧៩ នេះដំណាក់កាលទី១ក្រោយថ្ងៃរំដោះដែលប្រជាពលរដ្ឋមានសិទ្ធិកាន់កាប់ដីធ្លី ។ ចាប់ពីឆ្នាំ ១៩៩១- ១៩៩២ បានដោះស្រាយដីធ្លីលើកទី២ រដ្ឋកម្ពុជាពេលនោះមានភារកិច្ចទទួលបន្ទុកដោះស្រាយដីធ្លីជូនប្រជាពលរដ្ឋដែលធ្វើមាតុភូមិនិវត្តន៍ពីប្រទេសថៃមកប្រទេសកម្ពុជាវិញ ។ លើកទី៣ បន្ទាប់ពីការធ្វើសមាហរណកម្មរួចហើយ ប្រជាពលរដ្ឋទាំងនៅតំបន់កាន់កាប់ដោយខ្មែរក្រហមក៏បានទទួលដី ហើយបងប្អូនចូលទៅតំបន់នោះក៏បានទទួលដី ។ ឯលើកទី៤គឺពេលនេះហើយ ពេលនេះយើងប្រគល់កម្មសិទ្ធិជូនប្រជាពលរដ្ឋនៅលើដីស្ថានភាព៣បែប ទី១- ដីដែលនៅក្នុងព្រៃសម្បទានត្រូវកាត់ជូនឱ្យប្រជាពលរដ្ឋ ។ ទី២- ដីដែលមានភាពមិនច្បាស់លាស់រវាងប្រជាពលរដ្ឋជាមួយនឹងក្រុមហ៊ុនដែលបានទទួលដីសម្បទានសេដ្ឋកិច្ច ហើយដែលយើងបាននិងកំពុងធ្វើនៅលើទីតាំងនេះ ហើយត្រូវវាស់វែងជូនប្រជាពលរដ្ឋជាមុន ឯក្រុមហ៊ុនទុកជាក្រោយ ។ ទី៣- គឺដីកាន់កាប់មិនទាន់ស្របច្បាប់ ។
សម្តេចតេជោ នាយករដ្ឋមន្ត្រីគូសបញ្ជាក់ថា ដោយសារបំពេញនីតិវិធីបានត្រឹមត្រូវ ហើយមានការជឿជាក់ ដោយការខិតខំរបស់មន្ត្រីសុរិយោដី អាជ្ញាធរដែនដីគ្រប់លំដាប់ថ្នាក់ រួមជាមួយនឹងយុវជនស្ម័គ្រចិត្ត ធ្វើការវាស់វែងហ្មត់ចត់យ៉ាងដូច្នេះ គឺហ៊ានចេញប័ណ្ណកម្មសិទ្ធិជូនប្រជាពលរដ្ឋដោយមិនរង់ចាំការចេញប័ណ្ណជាលើកទី១ ហើយរង់ចាំប៉ុន្មានខែទើបចេញប័ណ្ណស្ថាពរនោះទេ គឺយើងដើរផ្លូវកាត់បាន ។
សម្តេចតេជោ នាយករដ្ឋមន្ត្រីថ្លែងថា ប្រជាពលរដ្ឋទាំងអស់ដែលទទួលប័ណ្ណកម្មសិទ្ធិនៅថ្ងៃនេះគឺហាក់បីដូចជាបានទទួលមាសនៅក្នុងដៃរក្សាទុក ។ សូមអង្វករគួរកុំលក់ គួរកុំដូរ ទុកឱ្យកូនចៅបន្ត ។
ក្នុងសុន្ទរកថា លោកអភិបាលខេត្តក្រចេះបានឱ្យដឹងថា ក្នុងការអនុវត្តគោលនយោបាយចាស់សកម្មភាពថ្មីលើកំណែទម្រង់ដីធ្លី ជាពិសេសអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គោលការណ៍ណែនាំរបស់ក្រសួងរៀបចំដែនដីនគរូបនីយកម្មនិងសំណង់ និងការណែនាំផ្ទាល់ពីលោកអឹុម ឈុនលឹម យន្តការសម្រាប់ការងារត្រូវបានរៀបចំរួចរាល់នៅថ្ងៃទី២៨ មិថុនា ប្អូនៗយុវជនស្ម័គ្រចិត្តសម្តេចតេជោបានមកដល់ និងបញ្ជូនទៅកាន់ទីតាំងគោលដៅចាប់ពីថ្ងៃទី៣ កក្កដា រហូតមក ។
លោកអភិបាលខេត្តបញ្ជាក់ថា សមិទ្ធផលនៃការខិតខំប្រឹងប្រែងបំពេញការងាររបស់ក្រុមយុវជនស្ម័គ្រចិត្តសម្តេចតេជោ និងក្រុមមន្ត្រីបច្ចេកទេសសុរិយោដី ព្រមទាំងការចូលរួមពីអាជ្ញាធរដែនដី និងបងប្អូនប្រជាពលរដ្ឋចំពោះនយោ បាយចាស់សកម្មភាពថ្មីលើវិស័យដីធ្លីរបស់សម្តេចតេជោនាយករដ្ឋមន្ត្រី បានចុះវាស់វែងដីធ្លីសម្រេចចេញប័ណ្ណកម្មសិទ្ធិជូនប្រជាពលរដ្ឋបានចំនួន៥៦០គ្រួសារលើក្បាលដី៨៩០ក្បាលដី ៕
ចែករំលែកព័តមាននេះ