រាជធានីភ្នំពេញ ៖ សំអាងលើលទ្ធផលដែលទើបវាយបំបាក់កីឡាករជើងខ្លាំងជំនាន់មុនលោកផាន់ សុវណ្ណ មកពីក្លិបមិត្តប៉ូលិស កាលពីសប្តាហ៍មុន កំពុងធ្វើឱ្យកីឡាករផាន់ គ្រាន់ មកពីក្លិបព្រះខ័នរាជ អះអាងថា មិនខ្លាចកីឡាករសារឿន ចាន់ ក្នុងជំនួបគ្នានៅសង្វៀនស្ថានីយទូរទស្សន៍បាយ័នបឹងស្នោនាថ្ងៃស្អែកនេះឡើយ ។ លោកបញ្ជាក់ថា ទោះជាកីឡាករសារឿន ចាន់ ល្បីមុនខ្លួន ប៉ុន្តែលោកនឹងធ្វើឱ្យបានល្អបំផុត ដើម្បីដណ្តើមយកជ័យជម្នះពីការប្រកួតគ្នាលើកដំបូងនេះ ។
កីឡាករផាន់ គ្រាន់ និយាយថា បើគិតលើបទពិសោធន៍ប្រកួត គឺលោកមិនអាចប្រៀបផ្ទឹមនឹងកីឡាករជើងខ្លាំងសារឿន ចាន់ ដែលមានឈ្មោះដើមថា រាជសីហ៍ ចាន់រ៉ា នោះបានឡើយ ដោយសារតែកីឡាកររូបនេះជាប់ឈ្មោះខាងជើងខ្លាំងក្នុងពិភពប្រដាល់មុនលោកជាយូរឆ្នាំណាស់មកហើយ ។ ទោះបីជាបែបណា លោកនៅតែមានជំនឿចិត្ត បើទោះជាលោកទើបតែឡើងរេញបានជាង២០ដង ដែលតិចជាងកីឡាករសារឿន ចាន់ ឬរាជសីហ៍ ចាន់រ៉ា ដល់ទៅ២ដងនោះក៏ដោយ ។ លោកផាន់ គ្រាន់ ពោលថា ការប្រកួតប្រដាល់មិនអាចកំណត់លទ្ធផលឈ្នះឬ ចាញ់ទុកជាមុន ដោយគ្រាន់តែសម្គាល់ឃើញសម្បកក្រៅរបស់គូប្រកួតបានទេ ។
ប៉ុន្តែសម្រាប់លោកគឺមានជំនឿចិត្ត និងហា៊ននិយាយទុកមុនថា អត់ខ្លាចខ្លាចាស់រៀមច្បងម្នាក់នេះតាំងពីពេលដឹងថាមានការផ្គូផ្គងគ្នានោះម៉្លេះ ។ ជាមួយគ្នានោះ លោកថែមទាំងសប្បាយចិត្តនៅពេលបានប្រកួតជាមួយកីឡាកររៀមច្បងដែលជាជើងខ្លាំង ធ្លាប់មានឈ្មោះល្បីមុនខ្លួនបែបនេះ ប្រកបដោយអារម្មណ៍អន្ទះសាចង់ឆាប់ឱ្យដល់ម៉ោងឡើងរេញថែមទៀតផង ។ កីឡាករវ័យ១៩ឆ្នាំរូបនេះ បញ្ជាក់ថា ភាពខ្លាំងរបស់កីឡាករសារឿន ចាន់ គឺម៉ាត់ត្រង់ និងដៃជើងរស់រវើក អីុចឹងហើយទើបលោកបានត្រៀមបញ្ចេញស្នៀតពិសេសៗមិនតិចជាងបីបួនស្នៀតឡើយដើម្បីទប់ទល់ ។
តាមការកត់សម្គាល់ កីឡាករផាន់ គ្រាន់ ដ្បិតថាទើបតែល្បីឈ្មោះក្រោយសារឿន ចាន់ បន្តិចមែន ប៉ុន្តែលោកត្រូវគេមើលឃើញថា មានស្នៀតល្អមិនធម្មតាឡើយ ពិសេសគឺក្បាច់នាគវាត់កន្ទុយ និងក្បាច់កែងហោះ ដែលលោកធ្លាប់ប្រើ ហើយទទួលបានជោគជ័យលើគូប្រកួតនាពេលចុងក្រោយ ។ ជាក់ស្តែងកាលពីសប្តាហ៍មុន លោកបានវាយបំបាក់ជើងខ្លាំងគឺកីឡាករផាន់ សុវណ្ណ ដោយប្រើស្នៀតទាំងនេះ ស្ទើរតែ មិនអាចឱ្យកីឡាករផាន់ សុវណ្ណ ស៊ូដល់ទឹកចុងក្រោយបាន ។ ប៉ុន្តែបើផ្អែកតាមការប្រកួតរបស់កីឡាករសារឿន ចាន់ វិញក៏មានចំណុចខ្លាំងពិបាកឱ្យកីឡាករផាន់ គ្រាន់ យកឈ្នះបានដោយងាយៗផងដែរ ដោយសារតែលោកខ្លាំងទាំងជង្គង់ និងដៃជើង ដែលកន្លងមកគេច្រើនសម្គាល់ថា ឱ្យតែគូប្រកួតចូលកៀ់ករមែងស៊ីកណ្តាប់ដៃ និងជង្គង់របស់សារឿន ចាន់ ត្រូវចំផាច់ៗធ្វើឱ្យលោកស្រូបបានពិន្ទុនោះផងដែរ ។ កីឡាករសារឿន ចាន់ អះអាងក្នុងពេលផ្គូផ្គងថា លោកមានជំនឿចិត្តឈ្នះលើការប្រកួតនេះដូចគ្នា ដោយសារតែលោកបានធ្វើការហ្វឹកហាត់ និងបំប៉នកម្លាំងមួយរយៈ ដើម្បីកុំឱ្យចាញ់ស៊ុហ្វក្នុងពេលប្រកួត ។
អ្នកទស្សនាជាច្រើនបានត្រឹមតែចាំមើលពីលទ្ធផលជាក់ស្តែងដែលនឹងកើតឡើងនាថ្ងៃស្អែកនោះតែប៉ុណ្ណោះ ក្នុងពេលដែលពួកគេមិនធ្លាប់ជួបសាកកម្លាំងគ្នា ទើបមិនអាចដឹងមុនថា អ្នកណាខ្លាំងជាងអ្នកណា ។ ទោះយ៉ាងណា ក្នុងចំណោមអ្នកស្នេហាកីឡាប្រដាល់ ហាក់ផ្តល់ទំនោរចិត្តលើកីឡាករផាន់ គ្រាន់ ច្រើនជាងដោយសារតែមួយរយៈចុងក្រោយនេះលោកមានឱកាសផ្តួលគូប្រកួតជាជើងខ្លាំងៗរៀមច្បងឱ្យចាញ់ជាប់គ្នារហូតត្រូវគេផ្តល់ឱកាសឱ្យវាយក្នុងគូឯកទៀតផង ។ ម៉្យាងកីឡាកររូបនេះ នៅក្មេងកម្លាំងពេញ និងមានស្នៀតល្អទាំងកែង ជង្គង់ ជើង និងក្បាច់នាគវាត់កន្ទុយផង ទើបគេនៅតែយល់ថា កីឡាករផាន់ គ្រាន់ មានទឹកមាត់លេបជាងសារឿន ចាន់ ។ ប៉ុន្តែចំពោះលទ្ធផលជាក់ស្តែង គឺមិនអាចកំណត់ដឹងនៅឡើយទេ ក្នុងពេលកីឡាករទាំង២នេះសុទ្ធតែមានផ្លែល្អក្នុងការប្រកួតរៀងៗខ្លួន ហើយមានទំនុកចិត្តថាឈ្នះការប្រកួត ដោយម្នាក់ៗសុទ្ធតែជឿជាក់លើសមត្ថភាពខ្លួនឯងបែបនេះ ។
នាថ្ងៃអាទិត្យនោះដែរ ក៏មានការប្រកួតរវាងកីឡាកររឿន ស្មាច់ មកពីក្លិបកងរាជអាវុធហត្ថរាជធានីភ្នំពេញ និងកីឡាករស៊ីន ជីវ័ន មកពីក្លិបរកាខ្នុរគ្រឿងញៀន ។ កីឡាករសួស យ៉ាត មកពីក្លិបទ័ពជើងទឹក និងកីឡាករឯម ពិភ័ត មកពីក្លិបគ្រុឌមានជ័យ ។ កីឡាករពេជ្រ សំពៅ មកពីក្លិបខេមរភូមិន្ទ និងកីឡាករស្រិល ទ្រី មកពីក្លិបគជសារកីឡា និងគូចុងក្រោយគឺការប្រកួតរវាងកីឡាករព្រំ វី មកពីក្លិបស្រុកស្ទោង ខេត្តកំពង់ធំ និងកីឡាករគួន ប៊ុនហ៊ីម មកពីក្លិបពន្លឺសាមគ្គី ៕
ចែករំលែកព័តមាននេះ