រាជធានីភ្នំពេញ ៖ វេលាម៉ោង១១ព្រឹកថ្ងៃសុក្រ ទី២១ កញ្ញា នេះ លោកឧបនាយករដ្ឋមន្ត្រី ហោ ណាំហុង រដ្ឋមន្ដ្រីក្រសួងការបរទេស និងសហប្រតិបត្ដិការអន្ដរជាតិ និងលោកស្រីឡូរី ដឹ ហ្វ្រីស នាយកបេសកកម្មស្តីទីនៃទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្ដរជាតិ USAID បានចុះហត្ថលេខាលើ វិសោធនកម្មនៃកិច្ចព្រមព្រៀងទ្វេភាគីចំនួនពីរ ដែលនឹងផ្ដល់ថវិកាចំនួន៣៤លាន
រាជធានីភ្នំពេញ ៖ វេលាម៉ោង១១ព្រឹកថ្ងៃសុក្រ ទី២១ កញ្ញា នេះ លោកឧបនាយករដ្ឋមន្ត្រី ហោ ណាំហុង រដ្ឋមន្ដ្រីក្រសួងការបរទេស និងសហប្រតិបត្ដិការអន្ដរជាតិ និងលោកស្រីឡូរី ដឹ ហ្វ្រីស នាយកបេសកកម្មស្តីទីនៃទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្ដរជាតិ USAID បានចុះហត្ថលេខាលើ វិសោធនកម្មនៃកិច្ចព្រមព្រៀងទ្វេភាគីចំនួនពីរ ដែលនឹងផ្ដល់ថវិកាចំនួន៣៤លានដុល្លារសហរដ្ឋអាមេរិក ជាជំនួយថវិកាសំរាប់ឆ្នាំ២០១២ របស់ទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្ដរជាតិ (USAID) ដើម្បីជួយនិងពង្រឹងវិស័យសុខាភិបាល និងវិស័យអប់រំ ដែលជាវិស័យអភិវឌ្ឍន៍ជាអាទិភាពនៅកម្ពុជា។
សេចក្តីប្រកាសព័ត៌មានរបស់ស្ថានទូតអាមេរិកប្រចំាកម្ពុជាក៏បានឲ្យដឹងថា លោក ជេហ្វ ដេហ្គល ភារធារីស្ថានទូតសហរដ្ឋអាមេរិកប្រចាំនៅកម្ពុជា ក៏នឹងអញ្ជើញចូលរួមនៅក្នុងពិធីនិងចុះហត្ថលេខាជាសាក្សីនាឱកាសនោះផងដែរ ។ក្នុងចំណោមជំនួយរបស់អាមេរិកជាថវិកាសរុប៣៤លានដុល្លារនោះ គឺវិសោធនកម្មលើកិច្ចព្រមព្រៀងក្នុងវិស័យសុខាភិបាលផ្ដល់ថវិកាចំនួន៣៣លានដុល្លារសហរដ្ឋអាមេរិក ដែលរួមចំណែកដល់ការ សម្រេចគោលដៅសុខាភិបាលជាតិរបស់ប្រទេសកម្ពុជា ។ ជំនួយថវិកានេះ ប្រើសំរាប់គាំទ្រដល់សកម្មភាពនានាជាបន្ត ដើម្បីកែលំអសុខភាពមាតា សុខភាពបន្តពូជ និងសុខភាពកុមារកាត់បន្ថយការឆ្លង និងផលប៉ះពាល់នៃជំងឺអេដស៍ការពារ និងកំចាត់ជំងឺឆ្លងធំៗ ដូចជាជំងឺរបេងជាដើម និងដើម្បីពង្រឹងប្រព័ន្ធសុខាភិបាលនៃប្រទេសកម្ពុជា អាទិភាពសុខាភិបាលជាតិរបស់រដ្ឋាភិបាល និងវិសោធនកម្មលើកិច្ចព្រមព្រៀងក្នុងវិស័យអប់រំផ្ដល់ថវិកាចំនួន ១ លានដុល្លារសហរដ្ឋអាមេរិក ដើម្បីគាំទ្រគោលដៅអប់រំនៃរដ្ឋាភិបាលកម្ពុជា ។
ថវិកានេះសំរាប់ជួយកម្មវិធីដែលមានជាបន្តក្នុងវិស័យអប់រំ ដើម្បីកែលំអគុណភាព និងប្រយោជន៍ទាក់ទងនៃការសិក្សាអប់រំជាមូលដ្ឋាន ហើយបង្កើនលទ្ធភាពអោយកុមារទាំងអស់បានរៀនសូត្រ រួមទាំងក្រុមជនជាតិភាគតិចជនពិការនិងអ្នកក្រខ្លាំង។សកម្មភាពទាំងនេះ ថែមទាំងផ្ដោតទៅលើការកាត់បន្ថយអត្រាបោះបង់ចោលសាលារៀន និងអត្រារៀនត្រួតថ្នាក់ តាមរយៈការបង្កើនគុណភាពនៃការបង្រៀន ការបណ្ដុះបណ្ដាលលើការគ្រប់គ្រងសាលារៀន និងការវាយតំលៃលទ្ធផលនៃការសិក្សារបស់សិស្ស។
សេចក្តីប្រកាសព័ត៌មានរបស់ស្ថានទូតអាមេរិកក៏បានបន្ថែមទៀតថា ជាបន្ថែមទៅលើសកម្មភាពក្នុងវិស័យសុខាភិបាល និងអប់រំ ទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិ USAID ថែមទាំងជួយដល់កម្មវិធីជាច្រើនទៀត សំរាប់ជាប្រយោជន៍ដល់ប្រជាជនកម្ពុជាទាំងអស់ ដូចជាកម្មវិធីកំណើនសេដ្ឋកិច្ច កសិកម្ម ការគ្រប់គ្រងធនធានធម្មជាតិ លទ្ធិប្រជាធិបតេយ្យ អភិបាលកិច្ច និងការប្រយុទ្ធប្រឆាំងការជួញដូរមនុស្ស។ ទីភ្នាក់ងារ USAID រំពឹងផ្ដល់ថវិកាសរុបចំនួន៦៥លានដុល្លារសហរដ្ឋអាមេរិក ជាជំនួយឧបត្ថម្ភដល់ប្រទេសកម្ពុជាក្នុងឆ្នាំ២០១២នេះ ៕
ចែករំលែកព័តមាននេះ