ខេត្តព្រះវិហារ ៖ នៅលើកំពូលភ្នំដងរែកមានរមណីយដ្ឋានទេសចរណ៍ធម្មជាតិគួរឱ្យទាក់ ទាញភ្ញៀវទេសចរជាតិ និងអន្តរជាតិ ទៅកម្សាន្ត គឺរមណីយដ្ឋានធម្មជាតិ«ទឹកធ្លាក់តេជោបុស្សស្បូវ» ស្ថិតក្នុងភូមិតេជោបុស្សស្បូវ ឃុំស្រឯមស្រុកជាំក្សាន្ត ។ រមណីយដ្ឋាននោះមានចម្ងាយ១១០គីឡូម៉ែត្រពីក្រុងព្រះវិហារ តាមដងផ្លូវជាតិលេខ៦២ លុះដល់ចំណុចផ្លូវបំបែកស្រុកជាំក្សាន្ត ធ្វើដំណើរតាមផ្លូវក្រួសក្រហមទៅកាន់ជើងភ្នំដងរែក រួចគេធ្វើដំណើរឡើងខ្នងភ្នំតាមផ្លូវក្រាលបេតុង ។
រមណីយដ្ឋានតេជោបុស្សស្បូវ ជារៀងរាល់ឆ្នាំត្រូវរៀបចំកែលម្អដោយកងយោធពលខេមរភូមិន្ទរបស់កងឯកភាពសឹករងព្រះវិហារ។ ខណៈពេលតំបន់នោះមានការគំរាមកំហែងពីទាហានសៀមឈ្លានពានមកលើអធិបតេយ្យភាពរបស់កម្ពុជាកន្លងទៅ កងកម្លាំងកម្ពុជាវាយទប់ទល់និងឈរជើងបានយ៉ាងរឹងមាំ ។
រមណីយដ្ឋានមួយនោះ ទោះបីជាស្ថិតនៅដាច់ស្រយាលពីទីប្រជុំជនក្រុងព្រះវិហារ និងរាជធានីភ្នំពេញក៏ដោយ តែចំពោះភ្ញៀវទេសចរគេសង្កេតឃើញទៅកម្សាន្តជាហូរហែ ។ ភ្ញៀវទេសចរជាតិ និងអន្តរជាតិ បានទៅលេងកម្សាន្តនៅតំបន់នោះក្នុងរដូវវស្សាចាប់ពីខែកក្កដា រហូតដល់ដំណាច់ខែតុលា ពីព្រោះទឹកធ្លាក់ខ្លាំងមានតែក្នុងរដូវវស្សាចន្លោះពី៣ទៅ៤ខែប៉ុណ្ណោះ ។
ចំពោះនៅរដូវប្រាំងតាមការសង្កេតឃើញតំបន់នោះនៅតែមានភ្ញៀវទេសចរទៅកម្សាន្តមិនដាច់ ព្រោះនៅលើកំពូលភ្នំដងរែកត្រង់ចំណុចបុស្សស្បូវ ក៏នៅមានទីកន្លែងទស្សនាកម្សាន្តមួយកន្លែងទៀតនៅក្បែរនោះ គឺជាទីតាំងជំរំទីបញ្ជាការលាក់ខ្លួនរបស់កងទ័ពខ្មែរក្រហមតាម៉ុក ។ ក្រោយពេលដួលរលំនាថ្ងៃទី៧ មករា ឆ្នាំ១៩៧៩ មេខ្លោងធំៗរបស់ខ្មែរក្រហមបានកេណ្ឌទ័ពរបស់ខ្លួនរត់ទៅពួនសម្ងំលើខ្នងភ្នំដងរែក ចំណុចជាំតែ ក្បែរបុស្សស្បូវ ក្នុងទឹកដីខ្មែរជាប់ព្រំប្រទល់ប្រទេសថៃ ។
ត្រង់ចំណុចនោះ តាម៉ុក សហការជាមួយកងទ័ពថៃធ្វើផ្លូវចូលពីដីថៃ សាងសង់ទីបញ្ជាការលាក់ខ្លួនដ៏រឹងមាំមួយ គឺសាងសង់លេណដ្ឋានធំអំពីបេតុងក្នុងដី និងតាម៉ុកសាងសង់ផ្ទះមួយខ្នងជញ្ជាំងធ្វើអំពីបេតុង និងសសរធ្វើអំពីឈើគ្រញូងសុទ្ធ ។ ពេលនេះទីបញ្ជាការតាម៉ុកនោះ បានក្លាយទៅជាទីកន្លែងប្រវត្តិសាស្ត្រមួយ ។ ភ្ញៀវទេសចរជាតិ និងអន្តរជាតិនៅពេលឡើងទៅកម្សាន្តនៅរមណីយដ្ឋានទឹកធ្លាក់បុស្សស្បូវ ក៏ឆ្លៀតទៅទស្សនាទីបញ្ជាការលាក់ខ្លួនប្រវត្តិសាស្ត្ររបស់តាម៉ុកនៅចំណុចជាំតែនោះ ។
បើតាមការបញ្ជាក់ឱ្យដឹងពីបណ្តានាយទាហានធ្លាប់រួមរស់តស៊ូជាមួយតាម៉ុកថា នៅក្បែរសំណង់ផ្ទះតាម៉ុក គឺមានដើមរាំងភ្នំ១ដើម ដែលតាម៉ុកស្រឡាញ់ស្មើជីវិត ។ ពួកគេចាំបានថា តាម៉ុកមិនឱ្យនរណាម្នាក់ប៉ះពាល់ទៅលើដើមរាំងភ្នំនោះទេ ។សព្វថ្ងៃរាំងភ្នំមួយដើមនោះលូតលាស់ធំខ្ពស់ជាងផ្ទះតាម៉ុកទៅទៀត ។ទឹកធ្លាក់ធម្មជាតិបុស្សស្បូវ ពិតមែនតែនៅឆ្ងាយស្ថិតនៅលើកំពូលភ្នំដងរែក តែភ្ញៀវទេសចរដែលទៅកម្សាន្តនិយាយថា ពួកគេមានអារម្មណ៍សប្បាយរីករាយយ៉ាងខ្លាំងពេលដែលទៅលេងកម្សាន្តជាមួយក្រុមគ្រួសារ និងមិត្តភក្តិ ។ ធម្មជាតិនៅទីនោះមានលក្ខណៈល្អ ប្រណីតគួរឱ្យស្រឡាញ់ ហើយប្រាថ្នាចង់ទៅលេងនាពេលក្រោយទៀត ៕
ចែករំលែកព័តមាននេះ