រាជធានីភ្នំពេញ ៖ ទីតាំងលេងល្បែងភ្នាល់បាល់តាមប្រព័ន្ធ អីុនធើរណេតចំនួនពីរកន្លែងត្រូវសមត្ថកិច្ចនគរបាលនៃនាយកដ្ឋានប្រឆាំងភេរវកម្មក្រសួងមហា ផ្ទៃ សហការជាមួយនគរបាលស្នងការដ្ឋានរាជធានីភ្នំពេញ និងនគរបាលខណ្ឌចំការមន ដោយមានការចូលរួមអនុវត្តពីព្រះរាជអាជ្ញាអមសាលាដំបូងរាជធានី បានឆែកឆេរ និងឃាត់ខ្លួនជនជាតិចិន ម៉ាឡេស៊ី ចំនួន២៦នាក់ និងជនជាតិខ្មែរចំនួន២៥នាក់ នាំទៅកាន់នាយកដ្ឋានដើម្បីធ្វើការសួរនាំពាក់ព័ន្ធនឹងសកម្មភាពលេងល្បែងភ្នាល់តាមអីុនធើរណេត កាលពីព្រឹកថ្ងៃទី២០ កញ្ញា ។
ទីតាំងទាំងពីរកន្លែងខាងលើនេះកន្លែងទី១ ស្ថិតនៅផ្ទះលេខ១៦ AB ផ្លូវលេខ៩ សង្កាត់ទន្លេបាសាក់ ខណ្ឌចំការមន និងទី២ ស្ថិតនៅផ្ទះលេខ៣៤ ផ្លូវលេខ១០៥ សង្កាត់បឹងកេងកងទី៣ ខណ្ឌចំការមន ។ ប្រតិបត្តិការទាំងពីរកន្លែងនេះសមត្ថកិច្ចអនុវត្តន៍ឡើងក្នុងពេលតែមួយ ក្នុងនោះ ក៏បានឃាត់ខ្លួនជនជាតិខ្មែរនៅក្នុងទីតាំងខាងលើនេះចំនួន២៥នាក់មានប្រុស-ស្រី នាំទៅកាន់នាយកដ្ឋានដើម្បីសួរចម្លើយ ។
ការបង្ក្រាបទីតាំងលេងល្បែងភ្នាល់ទាំងពីរកន្លែងខាងលើនេះ សមត្ថកិច្ចអនុវត្តឡើងក្នុងរយៈពេលតែ២ម៉ោងប៉ុណ្ណោះ ដោយសារទីតាំងទីមួយតូចជាងទីតាំងក្នុងភូមិសាស្ត្រសង្កាត់បឹងកេងទី៣ ។ ទីតាំងនៅក្នុងសង្កាត់ទន្លេបាសាក់ដដែលនោះ គេឃើញមានតែជនជាតិចិនតែ២នាក់ប៉ុណ្ណោះ ដោយឡែកទីតាំងក្នុងភូមិសាស្ត្របឹងកេងកងទី៣ មានជនជាតិចិន ភេទប្រុសចំនួន២៤នាក់ និងខ្មែរ៧នាក់សុត្ធតែជានារីទាំងអស់ ។
ប្រភពព័ត៌មានក្រៅផ្លូវការបានបង្ហើបថា ប្រតិបត្តិការខាងលើនេះសមត្ថកិច្ចក៏បានធ្វើការដកហូតលុយដុល្លារពីក្រុមជនជាតិចិនខាងលើនេះបានមួយចំនួនធំផងដែរ ។ ជាងនេះទៅទៀតសមត្ថកិច្ចបានឆែកឆេរឃើញ «បុង» ចាក់បាល់ដែលមានវិក្កយបត្ររាប់ម៉ឺនដុល្លារ ។
មិនទាន់មានប្រភពព័ត៌មានផ្លូវការណាមួយអះអាងបញ្ជាក់ ពីក្រុមមន្ត្រីសមត្ថកិច្ចក្នុងប្រតិបត្តិការខាងលើនេះថា ការចុះឆែកឆេរ និងឃាត់ខ្លួនមនុស្សមានចិន មានខ្មែរនេះពាក់ព័ន្ធនឹងបទល្មើសអ្វីច្បាស់លាស់នៅឡើយទេ ប៉ុន្តែសមត្ថកិច្ចខ្លះលួចបង្ហើបប្រាប់ថា ពាក់ព័ន្ធនឹងបទល្មើសលេងល្បែងភ្នាល់តាមប្រព័ន្ធអេឡេត្រូនិក ។ កាលពីប៉ុន្មានថ្ងៃមុននេះក៏មានការឃាត់ខ្លួនក្រុមជនជាតិឥណ្ឌូណេស៊ីរាប់រយនាក់ ដែលជួលផ្ទះនៅក្នុងខណ្ឌចំការមនដែរ ពួកគេទទួលរងការចោទប្រកាន់ថា លេងល្បែងភ្នាល់ខុសច្បាប់ដូចគ្នាដែរ ៕
ចែករំលែកព័តមាននេះ