រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានផ្តាំទៅភាគីថៃថា កុំហ៊ានព្រហើនបិទតំបន់ប្រាសាទតាមាន់ធំ មិនឲ្យប្រជាពលរដ្ឋខ្មែរឡើងទៅលេងឲ្យសោះ តែបើហ៊ានពិតជារឿងជាមួយគ្នាជាក់ជាមិនខានឡើយ…
រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានផ្តាំទៅភាគីថៃថា កុំហ៊ានព្រហើនបិទតំបន់ប្រាសាទតាមាន់ធំ មិនឲ្យប្រជាពលរដ្ឋខ្មែរឡើងទៅលេងឲ្យសោះ តែបើហ៊ានពិតជារឿងជាមួយគ្នាជាក់ជាមិនខានឡើយ ។
ថ្លែងក្នុង «ទិវាមច្ឆជាតិ ១កក្កដា ២០២៥» និងលែងកូនត្រីប្រមាណ១.៥លានក្បាល ចូលបឹងទន្លេបាទី ស្ថិតនៅឃុំក្រាំងធ្នង់ ស្រុកបាទី ខេត្តតាកែវ នាព្រឹកថ្ងៃ១ កក្កដា សម្តេចបវរធិបតីបានលើកឡើងថា ពាក់ព័ន្ធនឹងតំបន់ជម្លោះទាំង៤ដែលមានប្រាសាទតាមាន់ធំ, តាមាន់តូច, តាក្របី និងមុំបី ជាពិសេស ប្រាសាទតាមាន់ធំ កុំឃើញកម្ពុជាស្ងៀមស្ងាត់ មិនមាត់កុំគិតថា កម្ពុជាខ្លាចខ្លួនឲ្យសោះ ប៉ុន្តែកម្ពុជាមានពេលវេលាឆ្លើយតបគ្រប់ពេលទាំងអស់ ខណៈកម្ពុជានៅតែបន្តដោះស្រាយដោយសន្តិវិធី និងច្បាប់អន្តរជាតិតាមរយៈយន្តការតុលាការអន្តរជាតិយុត្តិធម៌(ICJ)ដដែល ដោយគ្មានការកែប្រែឡើយ ។
ខណៈស្ថានការណ៍បញ្ហាព្រំដែនកម្ពុជា-ថៃកំពុងមានកម្តៅសម្តេចបវរធិបតីបានគូសបញ្ជាក់ថា«ខ្ញុំសូមប្រកាសឲ្យហើយ កន្លែងតាមាន់ធំគឺជាកន្លែងដែលមិនទាន់ដាច់ស្រេច តាមាន់តូច តាក្របីនិងមុំបី យើងត្រូវរកប្រព័ន្ធតុលាការអន្តរជាតិដោះស្រាយ គ្មានពីណាមានសិទ្ធិឯកតោភាគីប្រកាសបិទកន្លែងហ្នឹងឈប់ឲ្យគេចូលទេ ។ រក្សាស្ថានភាពដដែល ជាឯកតោភាគី ហ៊ានតែបិទទ្វារមិនឲ្យប្រជាពលរដ្ឋខ្មែរឡើងនឹងមានរឿងហើយ បន្ទាត់ក្រហមច្បាស់ស្មើអ្នកឯងដាក់ច្រកឯកតោភាគីយកអាហ្នឹងហើយ ។ ហើយបើសិនជាគេអាចយកកន្លែងហ្នឹងបានដោយឯកតោភាគីបានន័យថា យើងទទួលស្គាល់ផែនទីឯកតោភាគី១លើ៥០ពាន់របស់ថៃ»។
សម្តេចបវរធិបតីបានបន្តថា ដូច្នេះ បើកម្ពុជាទទួលស្គាល់ផែនទី១លើ៥០ពាន់នេះ នឹងអាចធ្វើឲ្យភាគីថៃមានឱកាសតាមអំពើចិត្តគូសផែនទីរំលោភបំពានកម្ពុជាបន្តទៀត ។ ជាមួយគ្នានោះដែរ សម្តេចនាយករដ្ឋមន្ត្រីកម្ពុជាគូសបញ្ជាក់យ៉ាងច្បាស់ៗថា កម្ពុជាពុំបានចង់បានដីរបស់ប្រទេសណាមួយនោះទេ គឺកម្ពុជាប្រកាន់យកតែភាពត្រឹមត្រូវតែប៉ុណ្ណោះ ដូច្នេះអ្វីដែលកម្ពុជា-ថៃបានស៊ីញ៉េរួមគ្នា កាលពីឆ្នាំ២០០០ លើផែនទីដែលមានបារាំងទទួលស្គាល់កាលពីអំឡុងឆ្នាំ១៩០៧នោះ សូមទទួលយកទៅ មិនមែនជាផែនទីដែលថៃគូសឡើងជាឯកតោភាគីនោះទេ ។
សម្តេចធិបតីបន្ថែមថា បើសិនភាគីថៃនៅតែអះអាងប្រើប្រាស់ផែនទីគូសដោយខ្លួនឯង ពិតណាស់បញ្ហាព្រំដែកម្ពុជា-ថៃមិនបញ្ចប់ជម្លោះទេ នឹងបន្តអូសបន្លាយយូរឆ្នាំទៀតរហូតដល់ការធ្វើសង្គ្រាមក៏អាចថាបាន ។ ដូច្នេះ មានតែយន្តការដោះស្រាយតាមផ្លូវតុលាការយុត្តិធម៌អន្តរជាតិ(ICJ) ដែលនេះ ជាការដោះស្រាយដោយសន្តិវិធី ។ លើសពីនេះ សម្តេចនាយករដ្ឋមន្ត្រីអះអាងថា កម្ពុជាជ្រើសយកផ្លូវច្បាប់ជាអន្តរជាតិនេះ ដើម្បីមិនចង់ឲ្យបញ្ហាព្រំដែនរីករាលដាលទៅតំបន់ផ្សេងទៀតនៅតាមបណ្តាខេត្តរបស់ខ្មែរទាំង៧ដែលមានព្រំប្រទល់ជាប់ជាមួយថៃ ។
សូមជម្រាបថា ការលើកឡើងរបស់សម្តេចធិបតីនេះ បន្ទាប់ពីភាគីថៃតែងតែបានប្រកាសជាញឹកញាប់ថា យោធាថៃ នឹងបិទនៅបរិវេណប្រាសាទតាមាន់ធំ មិនឲ្យពលរដ្ឋខ្មែរបានឡើងទៅលេងកម្សាន្តទេ ខណៈព្រំដែនកម្ពុជា-ថៃកំពុងកើនឡើងកម្តៅ ៕
ចែករំលែកព័តមាននេះ