អាមេរិក-កាណាដា ៖ នាយករដ្ឋមន្ត្រីកាណាដាលោកម៉ាក់កាណីអះអាងនាថ្ងៃទី៣០មិថុនាថា ការសម្រេចចិត្តរបស់លោកបោះបង់ចោលការយកពន្ធលើសេវាកម្មនុយមេរិកនៅកាណាដា ស្ថិតក្នុងក្របខណ្ឌនៃការចរចាពាណិជ្ជិកម្មកាន់តែទូលំទូលាយថែមទៀតជាមួយសហរដ្ឋអាមេរិក ខណៈសេតវិមាននិយាយថា លោកកាណីព្រមចុះញ៉មហើយចំពោះការគាបសង្កត់របស់លោកដូណាល់ត្រាំ។
រដ្ឋាភិបាលកាណាដាបានបោះជំហានថយក្រោយកាលពីថ្ងៃទី២៩មិថុនា ដោយលុបចោលពន្ធលើបណ្ដាផលិតផលបច្ចេកវិទ្យាអាមេរិកដែលនាំចូល។ ការប្រកាសលុបចោលនេះធ្វើឡើងតែប៉ុន្មានម៉ោង មុនដល់កាលបរិច្ឆេទកំណត់បង់ពន្ធនោះដំបូង និង៣ថ្ងៃបន្ទាប់ពីលោកត្រាំប្រកាសផ្អាកការចរចាពាណិជ្ជកម្មជាមួយកាណាដា មកពីរឿងនោះ។ លោកកាណីថ្លែងទៅកាន់បណ្ដាអ្នកកាសែតថា នោះជាការចរចាជាសកល ដែលបែបនេះពិតជាល្អសម្រាប់ពលរដ្ឋកាណាដា។
ទោះបីយ៉ាងណានៅក្រុងវ៉ាសិុនតោនអ្នកនាំពាក្យសេតវិមានលោកស្រីការ៉ូលីនលីវីតអះអាងថា លោកកាណីបានព្រមចុះញ៉មលោកត្រាំនិងសហរដ្ឋអាមេរិក។ លោកស្រីថាលោកត្រាំដឹងថាតើត្រូវចរចាបែបណា។ លោកស្រីបន្តថា កាណាដាបានធ្វើការខុសឆ្គងមួយដោយសន្យាអនុវត្តការយកពន្ធនោះ ដែលនឹងបំផ្លាញដល់បណ្ដាសហគ្រាសបច្ចេកវិទ្យាអាមេរិក។
តាមនាយករដ្ឋមន្ត្រីកាណាដាថា ប្រទេសលោកនិងសហរដ្ឋអាមេរិកធ្វើការចរចាឡើងវិញនាព្រឹកថ្ងៃទី៣០មិថុនា ហើយការចរចានោះផ្ដោតជានិច្ចលើកាលបរិច្ឆេទថ្ងៃទី២១កក្កដាកំណត់ដោយមេដឹកនាំទាំង២ នាឱកាសជួបគ្នាក្នុងកិច្ចប្រជុំកំពូលG7នៅក្រុងអាំល់ប៊ែរតាកាណាដាកាលពីដើមខែនេះ។ ការផ្កាកចរចាពាណិជ្ជកម្មជាមួយកាណាដាប្រកាសដោយលោកដូណាល់ត្រាំកាលពីថ្ងៃទី២៧មិថុនា នាំដល់ការបញ្ចប់ការចរចារវាងរដ្ឋមន្ត្រីហិរញ្ញវត្ថុនិងរដ្ឋមន្ត្រីពាណិជ្ជកម្មកាណាដា ជាមួយសមភាគីអាមេរិក៕
ចែករំលែកព័តមាននេះ