រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍សង្កត់ធ្ងន់បន្ថែមទៀតទៅលើចំណុចដែលត្រូវយកចិត្តទុកដាក់ដើម្បីធានាថា កម្ពុជានឹងទទួលបានភ្ញៀវទេសចរក្នុងរង្វង់១០លាននាក់នៅក្នុងឆ្នាំ២០២០ ។
សម្តេចតេជោនាយករដ្ឋមន្ត្រី ហ៊ុន សែន បានមានប្រសាសន៍បែបនេះនាព្រឹកថ្ងៃទី២០ កញ្ញា ឆ្នាំ២០១២ នៅវិមានសន្តិភាព ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីប្រគល់ និងប្រកាសផ្សព្វផ្សាយជាផ្លូវការផែនការយុទ្ធសាស្ត្រអភិវឌ្ឍន៍ទេសចរណ៍២០១២-២០២០ ដែលជាការបង្ហាញនូវចក្ខុវិស័យច្បាស់លាស់ និងយូរអង្វែងសម្រាប់ការអភិវឌ្ឍទេសចរណ៍កម្ពុជាដោយផ្តោតលើកត្តាសក្តានុពលនៃធនធានវប្បធម៌ និងធម្មជាតិ ។
សម្តេចតេជោនាយករដ្ឋមន្ត្រីមានប្រសាសន៍ថា មានកត្តាធំៗពីរគួបផ្សំគ្នាគឺ កត្តាផ្ទៃក្នុង និងកត្តាអន្តរជាតិ ដែលមានភាពអំណោយផល ។ ទាក់ទងនឹងកត្តាអន្តរជាតិដែលមានភាពអំណោយផល សម្តេចតេជោនាយករដ្ឋមន្ត្រី បញ្ជាក់ថា យើងមិនអាចទាក់ទាញភ្ញៀវទេសចរអន្តរជាតិបាននៅពេលដែលយើងខ្វះទំនាក់ទំនងការទូតជាមួយនឹងប្រទេសដទៃបានទេ គឺទាល់តែមានកិច្ចសហប្រតិបត្តិការទូលំទូលាយជាមួយនឹងប្រទេសដទៃទាំងអស់ ។ ការទាក់ទាញភ្ញៀវទេសចរអន្តរជាតិនេះយើងគ្មានការរើសអើងថាមកពីស្បែកខ្មៅ-ស្បែកស ឬស្បែកលឿងទេ គឺឱ្យតែភ្ញៀវទេសចរ ។ នេះគឺជាកត្តាដែលយើងចាំបាច់ត្រូវតែមានទំនាក់ទំនង ហើយនេះក៏ស្ថិតនៅក្នុងមុមទី២នៃយុទ្ធសាស្ត្រត្រីកោណដែលបានដាក់ចេញនៅថ្ងៃទី២ ធ្នូ ឆ្នាំ១៩៩៨ ក្នុងរាជរដ្ឋាភិបាលអាណត្តិទី២ ដែលធ្វើសមាហរណកម្មបន្ទាន់ទៅក្នុងតំបន់ និងពិភពលោក ។ តាំងពីពេលនោះមក កម្ពុជាបានបង្កើតទំនាក់ទំនងការទូតទូលំទូលាយជាមួយគ្រប់ទ្វីប គ្រប់តំបន់ រាប់ទាំងឆ្នាំនេះកម្ពុជាជាប្រធានអាស៊ានផងដែរ ។
មួយផ្នែកទៀតសម្តេចតេជោមានប្រសាសន៍ថា កត្តាខាងក្រៅក៏ជាកត្តាងាយរងនូវផលប៉ះពាល់សម្រាប់វិស័យទេសចរណ៍របស់កម្ពុជា ដែលទាក់ទងជាមួយការធ្លាក់ចុះនៃសេដ្ឋកិច្ចរបស់ប្រទេសដែលមានភ្ញៀវទេសចរច្រើនមកកាន់កម្ពុជា ។ បើសិនជាអាមេរិក និងអឺរ៉ុបមានសេដ្ឋកិច្ចងើបឡើងល្អ ទេសចរមកពីតំបន់នោះក៏មានច្រើនដែរ ។
បន្ថែមពីលើនេះ គឺសុវត្ថិភាពនៃការហោះហើរដោយគ្មានការគំរាមកំហែងពីភេវរកម្ម ក៏ជាផ្នែកមួយនាំទេសចរមកកាន់កម្ពុជា ហើយកម្ពុជាយើងក៏មិនត្រូវភ្លេចថា នៅតំបន់របស់យើងមានប្រទេសដែលភ្ជាប់ជើងហោះហើរជាមួយយើង តែប្រទេសទាំងនោះបែរជាអស្ថិរភាពដោយសារមានការវាយប្រហារដោយភេរវជននោះ ហើយកម្ពុជា ក៏ពុំបានទទួលទេសចរ នេះក៏ជាបញ្ហាគ្រោះថ្នាក់សម្រាប់សេដ្ឋកិច្ចកម្ពុជាដែរ ។ ដូច្នេះហើយបានជាការរួមគ្នាជាមួយសហគមន៍អន្តរជាតិ ជាមួយដៃគូអន្តរជាតិក្នុងការប្រយុទ្ធប្រឆាំងនឹងភេរវកម្ម គឺមិនមែនចៃដន្យទេ គឺបម្រើឱ្យគោលដៅនៃសេដ្ឋកិច្ច និងសុវត្ថិភាពរបស់កម្ពុជាផង និងរួមចំណែកជាមួយពិភពលោកដើម្បីប្រយុទ្ធប្រឆាំងនឹងបិសាចដ៏ចង្រៃដែលបំផ្លាញឱ្យមានអស្ថិរភាពនៅក្នុងពិភពលោក ។
កត្តាអន្តរជាតិវាមិនទាន់គ្រប់គ្រាន់ទេ ប៉ុន្តែឥឡូវខ្ញុំនិយាយអំពីកត្តាផ្ទៃក្នុងដែលជាកត្តាធំជាងនេះទៀត ។ សម្តេចតេជោ បានលើកហេតុផលថា វាគ្មានអ្នកណាគេប្រថុយជីវិតមកស្លាប់នៅក្រោមគ្រាប់កាំភ្លើង គ្រាប់បែកទេ ។ អ្នកណាមកធ្វើទេសចរណ៍នៅកន្លែងមានសង្គ្រាម ? ចាប់តាំងពីឆ្នាំ១៩៧០ មក តើមានអ្នកណាគេធ្វើទេសចរណ៍នៅកន្លែងមានសង្គ្រាម ? របបប៉ុល ពត ?…
សម្តេចមានប្រសាសន៍ថា នៅមុនឆ្នាំ១៩៩៨-១៩៩៩ រដ្ឋាភិបាលជប៉ុនអនុញ្ញាតឱ្យទេសចរជប៉ុនមកត្រឹមតែទីក្រុងភ្នំពេញ និងទីក្រុងសៀមរាបទេ អត់ឱ្យទៅឆ្ងាយទេ ។ ទេសចរជនជាតិបារាំងម្នាក់ អង់គ្លេសម្នាក់ និងអូស្ត្រាលីម្នាក់បានស្លាប់ពេលធ្វើដំណើរតាមរថភ្លើង ។ នេះគឺជាចំណុចដែលធ្វើឱ្យគេភ័យខ្លាច មិនមានសុវត្ថិភាពលើបញ្ហាទេសចរណ៍ទេ ដូច្នេះបញ្ហាសន្តិសុខ ស្ថិរភាពខាងនយោបាយវាសំខាន់ណាស់សម្រាប់កម្ពុជាក្នុងការទាក់ទាញភ្ញៀវទេសចរនេះ ។
យើងមិនត្រូវមើលរំលងជាមួយនឹងសន្តិសុខនេះទេ ជាក់ស្តែងបានបង្ហាញហើយដែលយើងត្រូវខិតខំចាប់តាំងពីបញ្ហាសន្តិសុខធំរហូតទៅដល់បញ្ហាតូចតាចដូចជា បញ្ហាភេរវកម្មមិនមែនជាបញ្ហាដាច់ដោយឡែករបស់កម្ពុជាទេ តែកម្ពុជាបានចូលរួមប្រឹងប្រែងដើម្បីកម្ពុជាខ្លួនឯងផង និងតំបន់ ព្រមទាំងពិភពលោកផងដែរ ។ ក៏ប៉ុន្តែយើងមិនត្រូវភ្លេចថា កម្ពុជាក៏មានទេសចរជនជាតិបរទេសដែលពួកភេរវករចង់វាយប្រហារដែរ ។ យើងត្រូវមានការប្រុងប្រយ័ត្នលើចំណុចទាំងអស់នេះ ។
សម្តេចតេជោ មានប្រសាសន៍ថា ក្រៅពីនេះបញ្ហាខ្លះដែលខ្ញុំត្រូវធ្វើការដាស់តឿន រឿងខ្លះមិនគួរកើតបែរទៅជាកើត ។ រឿងនេះខ្ញុំគិតថា គួរឈានដល់ដំណាក់កាលផ្តាច់ព្រ័ត្រហើយ មិនគួរត្រូវបានលើកលែងបន្ថែមទេ នៅតាមហាង ភោជនីយដ្ឋាននីមួយៗស្ទើរតែគ្រប់ភោជនីយដ្ឋានមានទេសចរបរទេសចូលទទួលទាន ក៏ដូចជាទេសចរក្នុងស្រុកក៏ចូលហាងដែរ ។ ប៉ុន្តែក៏នៅមានពួកអ្នកមានកាំភ្លើងទៅបាញ់បោះធ្វើឱ្យមានចលាចលក្នុងភោជនីយដ្ឋាន…។
ទាក់ទិននឹងបញ្ហានេះ សម្តេចតេជោនាយករដ្ឋមន្ត្រីបានសង្កត់ធ្ងន់ថា តើយើងត្រូវបន្តការអត់ឱនចំពោះពួកនោះដែលមានកាំភ្លើងបាញ់បោះក្នុងហាងតទៅទៀតទេ?
មិនថាទេសចរជាតិ ឬបរទេសទេ ពេលណាគេឃើញការបាញ់បោះនៅតាមភោជនីយដ្ឋាន ដូច្នេះគឺជាការបំផ្លាញភ្ញៀវទេសចរហើយ ។ មិនមែនតែនៅភ្នំពេញទេ គឺនៅគ្រប់ខេត្តទាំងអស់ បើចង់រក្សាសុវត្ថិភាពទេសចរ ចង់ឱ្យមានភ្ញៀវទេសចរមកកម្សាន្ត តើអស់លោកបណ្តោយឱ្យពួកកាប់ដាវសាមូរ៉ៃ បាញ់បោះក្នុងភោជនីយដ្ឋាន ហើយទទួលការអត់ឱនលើកលែងទេ? បើទោះបីជាកូនអ្នកធំក៏ដោយ បើសិនជាឪពុកម្តាយធំប៉ុណ្ណា ក៏ត្រូវតែបង្ក្រាបក្មេងនោះដែរ ហើយឪពុកម្តាយកុំកាន់ជើងដើម្បីចាត់វិធានការតាមផ្លូវច្បាប់ ។ ត្រូវដោះស្រាយបន្តទៀត ។
សម្តេចគូសបញ្ជាក់ថា ដូច្នេះត្រូវយកចិត្តទុកដាក់ឱ្យមែនទែនចាប់តាំងពីភេរវកម្ម ហើយកុំភ្លេចបញ្ហាតូចតាចដែលបង្កឡើងឱ្យសោះ ។ ក្រៅពីនោះក៏នៅមានចរាចរណ៍ បញ្ហាចរាចរណ៍នេះក៏បណ្តាលឱ្យទេសចរភ័យខ្លាចដែរ ទាំងទេសចរក្នុងស្រុក និងទេសចរក្រៅស្រុក ។ កន្លង ទៅមានគ្រោះថ្នាក់តាមរថយន្តតាក់ស៊ី រថយន្តក្រុង មានការបាត់បង់ជីវិតជនជាតិរុស្ស៊ី ។
ដូច្នេះ បញ្ហាសុវត្ថិភាពចរាចរណ៍ជាបញ្ហាមួយធំដែរសម្រាប់ទេសចរ កុំឱ្យទេសចរមានការភ័យខ្លាចទាក់ទងនឹងការធ្វើដំណើររបស់ពួកគេ ។ នេះជាបញ្ហាមួយដែលត្រូវលើកយកមកនិយាយ ។ មិនមែនគ្រាន់តែរថយន្តទេ សូម្បីតែកាណូតសម្រាប់ទេសចរក៏ត្រូវតែពិនិត្យមើលដែរ ជាពិសេសពេលនេះមានទឹកជំនន់ពេលទេសចរចុះកាណូតភ្លាមគឺត្រូវមានពោងសុវត្ថិភាពសម្រាប់ភ្ញៀវទេសចរ ។
សូម្បីតែសុវត្ថិភាពចំណីអាហារជាដើម គឺសុទ្ធតែជាផ្នែកសុវត្ថិភាពនៃទេសចរ ប្រយ័ត្នពេលគេពិសាទៅនាំឱ្យគេរាក ។ ដូច្នេះចំណុចទាំងនេះគឺជាចំណុចត្រូវយកចិត្តទុកដាក់ដើម្បីធានាឱ្យទេសចរកើនឡើងនៅប្រទេសកម្ពុជា គឺកម្ពុជាខ្លួនឯងត្រូវតែមានសន្តិសុខ ត្រូវតែមានសន្តិភាព ត្រូវតែមានស្ថិរភាពនយោបាយ ។
លោកថោង ខុន រដ្ឋមន្ត្រីក្រសួងទេសចរណ៍បានថ្លែងថា វិស័យទេសចរណ៍ត្រូវបានរាជរដ្ឋាភិបាលកម្ពុជាទទួលស្គាល់ថាជាមាស «បៃតង» ជាផ្នែកដ៏សំខាន់នៃសេដ្ឋកិច្ចបៃតង ដែលចំណូលនៃវិស័យនេះត្រូវបានចាត់បញ្ចូលភ្លាមៗទៅក្នុងចរន្តសេដ្ឋកិច្ចជាតិ រួមចំណែកជំរុញកំណើនផលិតផលក្នុងស្រុកសរុប ។ អភិវឌ្ឍន៍ទេសចរណ៍ប្រកបដោយគុណភាព និងការទទួលខុសត្រូវ រួមចំណែកយ៉ាងសកម្មដល់កិច្ចអភិវឌ្ឍន៍ថែរក្សាការពារនូវសម្បត្តិវប្បធម៌ប្រវត្តិសាស្ត្រ និងធនធានធម្មជាតិ ។
លោករដ្ឋមន្ត្រីថ្លែងបន្តថា ក្រោមកិច្ចដឹកនាំដ៏ត្រឹមត្រូវឈ្លាសវៃ និងប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជានិច្ចកាលតែងយកចិត្តទុកដាក់ខ្ពស់គាំទ្រ និងជំរុញការអភិវឌ្ឍទេសចរណ៍ឱ្យបានជោគជ័យជាបន្តបន្ទាប់ ។ រាជរដ្ឋាភិបាលបានដាក់ចេញគោលនយោបាយ វិធានការ ផែនការ និងយុទ្ធសាស្ត្រជំរុញការអភិវឌ្ឍទេសចរណ៍ ពិសេសគោលនយោបាយបើកចំហជើងមេឃ យុទ្ធសាស្ត្រចតុកោណដំណាក់កាលទី២ និងផែនការយុទ្ធសាស្ត្រអភិវឌ្ឍន៍ទេសចរណ៍២០១២-២០២០ ត្រូវជំរុញអនុវត្តដោយផ្តោតទៅលើទិសដៅយុទ្ធសាស្ត្រអាទិភាព៦យ៉ាងជាសំខាន់រួមមាន ៖
១-ការអភិវឌ្ឍផលិតផលទេសចរណ៍
២-ការសិក្សាទីផ្សារ និងផ្សព្វផ្សាយទេសចរណ៍
៣-ការតភ្ជាប់ និងសម្រួលការធ្វើដំណើរ ដឹកជញ្ជូនទេសចរណ៍
៤-ប្រព័ន្ធសុវត្ថិភាពទេសចរណ៍ និងការគ្រប់គ្រងផលប៉ះពាល់
៥-ប្រព័ន្ធច្បាប់ និងយន្តការគ្រប់គ្រង និង
៦-ការអភិវឌ្ឍធនធានមនុស្ស
សម្រាប់កម្ពុជា ចក្ខុវិស័យឆ្នាំ២០២០ គឺការមកដល់ភ្ញៀវទេសចរអន្តរជាតិចំនួន១០លាននាក់ជាមួយចំណូលប្រមាណជា៥.០០០លានដុល្លារក្នុងមួយឆ្នាំ៕
ចែករំលែកព័តមាននេះ