រាជធានីភ្នំពេញ ៖ មន្ត្រីស្ថានទូតអាមេរិកប្រចាំនៅកម្ពុជាបានថ្លែងកាលពីថ្ងៃទី១៩ កញ្ញា ២០១២ ថា សហរដ្ឋអាមេរិកកាលពីពេលថ្មីៗនេះ បានជួបពិភាក្សាជាមួយមន្ត្រីក្រសួងមហាផ្ទៃលើកិច្ចសហការការពារសន្តិសុខ សុវត្ថិភាព ស្ថានទូតអាមេរិកប្រចាំព្រះរាជាណាចក្រកម្ពុជា ។ ការថ្លែងរបស់មន្ត្រីស្ថានទូតអាមេរិកបានធ្វើឡើងនៅក្នុងជំនួបដាច់ដោយឡែកមួយជាមួយអ្នកកាសែតកម្ពុជាមួយក្រុមនៅសណ្ឋាគារភ្នំពេញ ពេលអាហារថ្ងៃត្រង់ជុំគ្នាមួយ។
លោកចន សៀន ម៉ាក អិុនតូស (John Sean Mc Intosh) មន្ត្រីអ្នកនាំពាក្យសហរដ្ឋអាមេរិកប្រចាំកម្ពុជា បានបញ្ជាក់ថា លោកអូបាម៉ា បានដាក់បទបញ្ជាឱ្យគ្រប់ស្ថានទូតអាមេរិកត្រូវបង្កើនការយាមកាម ដើម្បីពង្រឹងកិច្ចការពារសន្តិសុខ ។ ដូចគ្នាផងដែរ ស្ថានទូតអាមេរិកប្រចាំនៅព្រះរាជាណាចក្រកម្ពុជា កាលពីពេលថ្មីៗនេះក៏បានទាក់ទងជាមួយនឹងប៉ូលិសកម្ពុជារួចអស់ហើយ ដើម្បីបង្កើនកិច្ចសហការក្នុងកិច្ចការពារសន្តិសុខ នៅស្ថានទូតក៏ដូចជាការពារសុវត្ថិភាពសម្រាប់បុគ្គលិកស្ថានទូត ។
ស្ថានទូតអាមេរិកប្រចាំនៅព្រះរាជាណាចក្រកម្ពុជា មានទីតាំងស្ថិតនៅក្នុងខណ្ឌដូនពេញ ជិតវត្តភ្នំក្នុងរាជធានីភ្នំពេញ បានស្វែងរកកិច្ចសហការជាមួយនឹងក្រសួងមហាផ្ទៃកម្ពុជា ដើម្បីបង្កើនកិច្ចការពារសន្តិសុខសុវត្ថិភាព ។ នេះជាបទបញ្ជាថ្មីរបស់ប្រធានាធិបតីអូបាម៉ា ក្រោយពេលមានកុបកម្មតវ៉ាប្រឆាំងអាមេរិក រហូតដល់វាយកម្ទេច និងសម្លាប់ឯកអគ្គរដ្ឋទូតអាមេរិកប្រចាំប្រទេសលីប៊ី កាលពីសប្តាហ៍មុន ដោយសារតែកំហឹងរបស់ជនជាតិអ៊ិស្លាម ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ