ខេត្តស្ទឹងត្រែង ៖ បទល្មើសនេសាទមិនមានការថយចុះទេទោះបីមានការបង្ក្រាបពីមន្ត្រី អាវុធហត្ថជាច្រើនករណីថែមទាំងឃាត់ខ្លួនជនល្មើសបញ្ជូនទៅសាលាដំបូងចេញដីកាឃុំខ្លួនក្នុងពន្ធនាគារខេត្តជាបន្តបន្ទាប់ក្តី ។ជាក់ស្តែងកាលពីថ្ងៃ ទី១៨ កញ្ញា លោកឆោម ញឹម អនុគណៈកម្មការសហគមន៍នេសាទឃុំកោះស្នែង ស្រុកថាឡារិវ៉ាត់ បានធ្វើការប្រគល់ជូនឧបករណ៍នេសាទខុសច្បាប់ដែល
ខេត្តស្ទឹងត្រែង ៖ បទល្មើសនេសាទមិនមានការថយចុះទេទោះបីមានការបង្ក្រាបពីមន្ត្រី អាវុធហត្ថជាច្រើនករណីថែមទាំងឃាត់ខ្លួនជនល្មើសបញ្ជូនទៅសាលាដំបូងចេញដីកាឃុំខ្លួនក្នុងពន្ធនាគារខេត្តជាបន្តបន្ទាប់ក្តី ។ជាក់ស្តែងកាលពីថ្ងៃ ទី១៨ កញ្ញា លោកឆោម ញឹម អនុគណៈកម្មការសហគមន៍នេសាទឃុំកោះស្នែង ស្រុកថាឡារិវ៉ាត់ បានធ្វើការប្រគល់ជូនឧបករណ៍នេសាទខុសច្បាប់ដែលចាប់បានពីក្នុងទន្លេដល់នាយរងខណ្ឌជលផលខេត្តរក្សាទុកធ្វើកំណត់ហេតុជាភស្តុតាង ។
ឧបករណ៍ដែលសហគមន៍ឃុំកោះស្នែងធ្វើការប្រគល់ជូននោះរួមមាន ក្បាលឆក់ប្រភេទក្តៅចំនួន៤គ្រឿង ក្បាលឆក់ប្រភេទត្រជាក់១គ្រឿងក្បាលឆក់១មានធាតុក្តៅ និងត្រជាក់១គ្រឿងដងឆក់ចំនួន២គូ ថ្នងដងត្រី១ ម៉ាស៊ីនទូកកម្លាំង១០សេះមួយគ្រឿង និងទូកខ្នាតតូចខូចគុណភាពមួយគ្រឿង ។ក្នុងការទទួលឧបករណ៍នេសាទល្មើសច្បាប់ទាំងនោះ មន្ត្រីជលផលខេត្តស្ទឹងត្រែងបានធ្វើការផ្តាំផ្ញើដល់សហគមន៍ជំរុញបំផុសឱ្យមានការអភិរក្ស និងទប់ស្កាត់រាល់បទល្មើសនេសាទ និងបញ្ឈប់សកម្មភាពបង្កឱ្យកើតមានបទល្មើសនេសាទខុសច្បាប់នៅក្នុងតំបន់នីមួយៗថែមទាំងឧបត្ថម្ភនូវថវិកា២០មឺុនរៀលជាការលើកទឹកចិត្តផងដែរ ។
ជាការកត់សម្គាល់ បទល្មើសនេសាទគេសង្កេតឃើញនៅតែបន្តកើតឡើងនៅក្នុងតំបន់អន្លង់អភិរក្សទាំងនោះ ដោយសារមានបញ្ហាមួយចំនួនដូចជា ពុំមានមន្ត្រីជលផលទៅបំពេញភារកិច្ច ចំណែកលោកនាយខណ្ឌជលផលខេត្ត ដោយមានការមមាញឹកព្រោះលោកជាប្រធានគណៈកម្មការរៀបចំការបោះឆ្នោតនៅខេត្តរតនគិរីយូរឆ្នាំមកហើយ ឯមុខតំណែងជាប្រធានខណ្ឌគ្រាន់តែស៊ីប្រាក់ខែរដ្ឋប៉ុណ្ណោះដូច្នេះការគ្រប់គ្រង និងការដាក់ផែនការលើការគ្រប់គ្រងបទល្មើសនេសាទមានមន្ត្រីសកម្មតិចបំផុតទើបកើតមានបទល្មើសជាហូរហែបែបនេះ ។
ទន្ទឹមនឹងនេះ ប្រជាសហគមន៍នៅភូមិកោះ ខន ឌិន ដែលសុំមិនបញ្ចេញឈ្មោះបានបញ្ជាក់ប្រាប់កោះសន្តិភាពតាមទូរស័ព្ទថា ប្រភពត្រីក្នុងឆ្នាំនេះកើតឡើងច្រើនតែនៅតែមានការខ្វះខាតចំពោះប្រជាពលរដ្ឋរស់នៅតាមដងទន្លេទាំងនេះដោយសារមានជនខិលខូចលួចប្រើឧបករណ៍ឆក់ត្រីទាំងថ្ងៃទាំងយប់ បើទោះបីជាធ្វើការហាមឃាត់និងបង្ក្រាបក៏ដោយ ក៏ជនទាំងនោះនៅតែធ្វើផ្គើនដាក់សហគមន៍ដដែល ។
ប្រជានេសាទនៅតាមបណ្តាសហគមន៍មួយចំនួនបានអំពាវនាវដល់រដ្ឋាភិបាលសូមមានវិធានការចំពោះករណីខាងលើផង ដើម្បីពួកគាត់ដែលជាសហគមន៍មានទឹកចិត្តក្នុងការចុះល្បាតនិងថែរក្សានូវធនធានធម្មជាតិមួយនេះកុំឱ្យបាត់បង់ ៕
ចែករំលែកព័តមាននេះ