ខេត្តព្រះសីហនុ ៖ អង្គភាពនគរបាលបង្ក្រាបបទល្មើសលើផ្ទៃសមុទ្រ បានស្ទាក់ចាប់ទូកដឹកឈើល្មើសច្បាប់១គ្រឿង ដែលធ្វើសកម្មភាពដឹកឈើចេញពីស្រុកស្រែអំបិល ខេត្តកោះកុង កាលពីវេលាម៉ោង២រំលងអធ្រាត្រឈានចូលថ្ងៃទី១៨ កញ្ញា ក្នុងគោលបំណងដឹកឆ្ពោះទៅប្រទេសវៀតណាម ។ ទីបំផុតនៅវេលាម៉ោងជាង១១ព្រឹកថ្ងៃទី១៨ កញ្ញា ក៏ត្រូវបានបង្ក្រាបនៅក្នុងលំហសមុទ្រ ហើយឈើប្រណីតដែលត្រូវបានបង្ក្រាបនេះជាប្រភេទឈើធ្នង់មានចំនួន៦២ដុំ ស្មើនឹង៧ម៉ែត្រគូប ។
លោកវរសេនីយ៍ត្រីយ៍ឌឹម សំបូរ នាយសេនាធិការ និងលោកវរសេនីយ៍ទោ សាក់ សុវណ្ណ មេបញ្ជាការអង្គភាពបង្ក្រាបលើផ្ទៃសមុទ្រ ដែលមានទីតាំងស្ថិតនៅតាមបណ្ដោយទំនប់កោះព្រាប ស្ថិតក្នុងភូមិ៣ សង្កាត់លេខ១ ក្រុងព្រះសីហនុ បានមានប្រសាសន៍ថា ការបង្ក្រាបបទល្មើសទូកដឹកឈើខុសច្បាប់លើផ្ទៃសមុទ្រនាពេលនេះ គឺទទួលជោគជ័យទាំងស្រុង ដោយអង្គភាពបានប្រើប្រាស់កម្លាំងជំនាញសម្ងាត់តាមដានឈ្មួញរកស៊ីដឹកឈើខុសច្បាប់នេះជាយូរណាស់មកហើយ ។ ដោយទទួលបានបញ្ជាដ៏ម៉ឺងម៉ាត់ពីលោកឧត្តមសេនីយ៍ទោ តេង សួន ប្រធាននាយកដ្ឋាននគរបាលព្រំដែនទឹក ក៏ដូចជាអនុវត្តទៅតាមបទបញ្ជារបស់លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ ទីបំផុតយើងបង្ក្រាបបានបទល្មើសនេះ ។
លោកវរសេនីយ៍ទោ សាក់ សុវណ្ណ បានឱ្យដឹងថា ក្រោយពីបណ្តាញសម្ងាត់របស់អង្គភាពបង្ក្រាបបទល្មើសលើផ្ទៃសមុទ្ររាយការណ៍អំពីទូកដឹកឈើប្រណីត១គ្រឿងនេះចេញដំណើរពីតំបន់ស្រុកស្រែអំបិល ខេត្តកោះកុងដោយឆ្លងកាត់តាមឆ្នេរសមុទ្រខេត្តព្រះសីហនុ អង្គភាពបង្ក្រាបបទល្មើសលើផ្ទៃសមុទ្រក៏បានសហការជាមួយកម្លាំងនគរបាលប៉ុស្តិ៍ព្រំដែនទឹកកែវផុស នៃវរសេនាតូចលេខ២៦៩ ចេញពួនស្ទាក់នូវចំណុចមុខភូមិកែវផុស ស្រុកស្ទឹងហាវ ។ រីឯកម្លាំងរបស់អង្គភាពក៏បានចេញប្រតិបត្តិការនៅតាមផ្ទៃសមុទ្រ ដោយប្រើប្រាស់អូប៊័រ១គ្រឿង និងកម្លាំង៦នាក់ ដឹកនាំបញ្ជាដោយលោកវរសេនីយ៍ត្រីឌឹម សំបូរ នាយសេនាធិការ និងរូបលោកផ្ទាល់(សាក់ សុវណ្ណ) ។ រហូតដល់វេលាម៉ោង១១និង១៥នាទីព្រឹកថ្ងៃទី១៨ កញ្ញា កម្លាំងប្រតិបត្តិការក៏ជួបទូកដឹកឈើធ្នង់ជាច្រើនកំណាត់ ហើយក៏ធ្វើការឃាត់នៅចំណុចលំហសមុទ្រមុខភូមិកែវផុស ស្រុកស្ទឹងហាវ ។
ប្រភពដដែលបន្ថែមទៀតថា ទូកដឹកឈើនោះជាប្រភេទទូកឈើកន្ទុយវែង មានបណ្តោយ១៤ម៉ែត្រ ទទឹង៣ម៉ែត្រ ប្រើប្រាស់ម៉ាស៊ីនកម្លាំងសេស១៦៨សេះ។ ក្នុងជំហានដំបូង តាមការប៉ាន់ស្មានរបស់កម្មករដឹកឈើល្មើសច្បាប់នោះបានឱ្យដឹងថា ឈើនេះមានប្រមាណជាង១០តោន ។ ក្នុងប្រតិបត្តិការនេះ ក៏មានការឃាត់ខ្លួនកម្មករនៅលើទូកនោះចំនួន៤នាក់ សុទ្ធតែជាជនជាតិវៀតណាម មានសញ្ជាតិកម្ពុជា គឺ១- ឈ្មោះចៅ ឡាយ ភេទប្រុស អាយុ៣៨ឆ្នាំ ជាអ្នកបើកបរ ២- ឈ្មោះលី ទឹម ភេទប្រុស អាយុ៣៨ឆ្នាំ ជាកម្មករ ៣- ឈ្មោះលី លុន ភេទប្រុស អាយុ៣០ឆ្នាំ ជាកម្មករ និង៤- ឈ្មោះចៅ ទឹង ភេទប្រុស អាយុ២៦ឆ្នាំ ជាកម្មករ ។ ជនទាំង៤នាក់ខាងលើនេះ មានទីលំនៅឃុំតាលូ ស្រុកហាទៀង ខេត្តកៀនយ៉ាង ប្រទេសវៀតណាម ។
លោកវរសេនីយ៍ទោ សាក់ សុវណ្ណ បានបញ្ជាក់ឱ្យដឹងផងដែរថា ក្រោយពីធ្វើការបង្ក្រាបនិងកសាងសំណុំរឿងរួចមក ទាំងទូក និងឈើ ព្រមទាំងកម្មករទាំង៤នាក់ត្រូវបានប្រគល់ជូនមន្ត្រីខណ្ឌរដ្ឋបាលព្រៃឈើ ខេត្តព្រះសីហនុ ដើម្បីត្រួតពិនិត្យវាស់វែង រកទិន្នន័យជាក់លាក់ និងកសាងសំណុំរឿងបញ្ជូនទៅសាលាដំបូងខេត្តព្រះសីហនុ ដើម្បីចាត់ការទៅតាមនីតិវិធីច្បាប់ ហើយតាមការត្រួតពិនិត្យឃើញមានឈើធ្នង់ចំនួន៦២ដុំ ស្មើនឹងជាង៧ម៉ែត្រគូប ។ គួរបញ្ជាក់ថា កន្លងមកអង្គភាពបង្ក្រាបបទល្មើសលើផ្ទៃសមុទ្របានបង្ក្រាបឈ្មួញរត់ពន្ធសាច់មាន់ខូចគុណភាពនាំចូលមកពីប្រទេសថៃចំនួនជាង៣០០តោនផងដែរ ៕
ចែករំលែកព័តមាននេះ