ខេត្តក្រចេះ ៖ មន្ត្រីខណ្ឌរដ្ឋបាលជលផល ខេត្ត ដឹកនាំដោយលោកម៉ុក ពន្លក នាយរងខណ្ឌ រួមជាមួយកងកម្លាំងប្រដាប់អាវុធ កាលពីព្រឹកថ្ងៃ១៥ កញ្ញា បានចុះធ្វើការបង្ក្រាបបទល្មើសនេសាទនៅក្នុងបឹងវែង ស្ថិតក្នុងភូមិបឹងរៃ ឃុំប្ញស្សីកែវ ស្រុកព្រែកប្រសព្វ ។
ខេត្តក្រចេះ ៖ មន្ត្រីខណ្ឌរដ្ឋបាលជលផល ខេត្ត ដឹកនាំដោយលោកម៉ុក ពន្លក នាយរងខណ្ឌ រួមជាមួយកងកម្លាំងប្រដាប់អាវុធ កាលពីព្រឹកថ្ងៃ១៥ កញ្ញា បានចុះធ្វើការបង្ក្រាបបទល្មើសនេសាទនៅក្នុងបឹងវែង ស្ថិតក្នុងភូមិបឹងរៃ ឃុំប្ញស្សីកែវ ស្រុកព្រែកប្រសព្វ។
មន្ត្រីខណ្ឌរដ្ឋបាលជលផលខេត្តឱ្យដឹងថា ក្នុងការចុះបង្ក្រាបបទល្មើសនេសាទនៅបឹងវែងនេះ កម្លាំងជំនាញរឹបអូសបានរបាំងស្បៃមុងចំនួន២៥ខ្សែ មានប្រវែង១.២៥០ម៉ែត្រ លូស្បៃមុងចំនួន២៥គ្រឿង របាំងណរ៉ាវ ធ្វើអំពីសាច់អួននីឡុងរឹងចំនួន៤ខ្សែ មានប្រវែង២.៥០០ម៉ែត្រ លបណរ៉ាវធ្វើពីសាច់អួននីឡុងចំនួន១០គ្រឿង និងបង្គោលចម្រឹងប្ញស្សីចំនួន៥៣៥ដើម ។ ជាមួយគ្នានេះ កូនត្រីចម្រុះប្រមាណជិត២រយគីឡូក្រាម ត្រូវបានលែងចូលទៅក្នុងបឹងធម្មជាតិវិញ ។
ពលរដ្ឋនៅស្រុកព្រែកប្រសព្វរាប់រាយគ្រួសារ ដែលសព្វថ្ងៃពឹងអាស្រ័យលើរបរនេសាទសម្រាប់គ្រួសារដូចជា បង់សំណាញ់ រាយមង និងរាយសន្ទូចនៅបឹងវែង មានទីតាំងនៅក្រោយស្រុកព្រែកប្រសព្វ បានសម្តែងនូវការព្រួយបារម្ភយ៉ាងខ្លាំងចំពោះការបាត់បង់ពូជមច្ឆជាតិធំៗ ខណៈពេលដែលសព្វថ្ងៃនេះ ការលួចនេសាទរបស់ជនទុច្ចរិតដោយប្រើឧបករណ៍ល្មើសនេសាទ នៅតែកើតមានឥតឈប់ឈរ តែការបង្ក្រាបរបស់អាជ្ញាធរមូលដ្ឋាន ហាក់ដូចជានៅមានកម្រិតទាបនៅឡើយ ។
លោកម៉ុក ពន្លក នាយរងខណ្ឌរដ្ឋបាលជលផលេខត្តថ្លែងថា បឹងវែងនេះ គឺជាបឹងធំមួយមានព្រៃលិចទឹកយ៉ាងសម្បូរបែប ហើយកន្លងមក ទោះបីជាអាជ្ញាធរបានរៀបចំជាសហគមន៍នេសាទសម្រាប់ថែរក្សាការពារ និងបង្កើតតំបន់អភិរក្សត្រីមេពូជយ៉ាងណាក៏ដោយ ក៏នៅតែមានជនខិលខូចមួយចំនួនឆ្លៀតឱកាសលួចធ្វើសកម្មភាពនេសាទដោយប្រើឧបករណ៍នេសាទល្មើសច្បាប់ ។ លោកនាយរងខណ្ឌអះអាងថា ប្រសិនបើអាជ្ញាធរដែនដីរួមសហការជាមួយសមត្ថកិច្ចគ្រប់ជាន់ថ្នាក់បានល្អនោះ ទើបការទប់ស្កាត់អាចមានប្រសិទ្ធភាព ៕
ចែករំលែកព័តមាននេះ