រាជធានីភ្នំពេញ ៖ លោកPrabowio Subianto អតីតឧត្តមសេនីយ៍ឯកឥណ្ឌូណេស៊ី និងជាប្រធានគណបក្សចលនាឆ្នើមឥណ្ឌូណេស៊ីបានមានប្រសាសន៍ថា ដំណើរទស្សនកិច្ចរបស់លោកមកកាន់ប្រទេសកម្ពុជានាពេលនេះ គឺជាការវិលត្រឡប់មកកាន់ប្រទេសមួយដែលលោកធ្លាប់បានមក ធ្លាប់មានមនោសញ្ចេតនាជាមួយ ហើយនោះជាដំណើរទស្សនកិច្ចដែលមានរយៈពេល១៦ឆ្នាំ
រាជធានីភ្នំពេញ ៖ លោកPrabowio Subianto អតីតឧត្តមសេនីយ៍ឯកឥណ្ឌូណេស៊ី និងជាប្រធានគណបក្សចលនាឆ្នើមឥណ្ឌូណេស៊ីបានមានប្រសាសន៍ថា ដំណើរទស្សនកិច្ចរបស់លោកមកកាន់ប្រទេសកម្ពុជានាពេលនេះ គឺជាការវិលត្រឡប់មកកាន់ប្រទេសមួយដែលលោកធ្លាប់បានមក ធ្លាប់មានមនោសញ្ចេតនាជាមួយ ហើយនោះជាដំណើរទស្សនកិច្ចដែលមានរយៈពេល១៦ឆ្នាំកន្លងមកហើយ ។
លោក Prabowio Subiantoបានមានប្រសាសន៍បែបនេះនារសៀលថ្ងៃទី១៨ កញ្ញា ឆ្នាំ២០១២ ក្នុងឱកាសដែលលោកត្រូវបានអនុញ្ញាតឱ្យចូលជួបសម្តែងការគួរសមជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅវិមានសន្តិភាព ។ លោកមានប្រសាសន៍បន្តថា លោកបានកត់សម្គាល់ឃើញប្រទេសកម្ពុជាមានការអភិវឌ្ឍដែលមិននឹងស្មានដល់ ហើយបានសម្តែងនូវការកោតសរសើរនិងវាយតម្លៃខ្ពស់ចំពោះវីរភាពដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន ។ លោកបានជម្រាបសម្តេចតេជោនាយករដ្ឋមន្ត្រីថា នៅពេលដែលលោកមកដល់កម្ពុជា លោកបានចងចាំនូវរាល់អនុស្សាវរីយ៍ទាំងឡាយដែលលោកធ្លាប់មាននិងធ្វើឱ្យលោកមានក្តីសប្បាយរីករាយយ៉ាងខ្លាំង ។
ជាការឆើ្លយតប សម្តេចតេជោនាយករដ្ឋមន្ត្រី ហ៊ុន សែន បានថ្លែងអំណរគុណលោកPrabowo Subianto ដែលមានប្រសាសន៍ប្រកបដោយពាក្យពេចន៍ល្អៗ។ សម្តេចបានមានប្រសាសន៍ជម្រាបជូនអំពីស្ថានភាពសេដ្ឋកិច្ចរបស់ប្រទេសកម្ពុជា ដែលនៅពេលនេះគឺជាឱកាសពេជ្រនិងកំពុងប្រើប្រាស់នូវសក្តានុពលទាំងឡាយដើម្បីធ្វើការអភិវឌ្ឍ ។
សម្តេចតេជោនាយករដ្ឋមន្ត្រីបានមានប្រសាសន៍បញ្ជាក់ថា ក្នុងរយៈពេលមួយទសវត្សកន្លងមកនេះ កម្ពុជាទទួលបានកំណើនសេដ្ឋកិច្ច២ខ្ទង់ ហើយបានកែប្រែប្រទេសកម្ពុជាដែលជាប្រទេសខ្វះអង្ករ ខ្វះស្រូវ ក្លាយទៅជាប្រទេសមួយមានលទ្ធភាពនាំស្រូវ នាំអង្ករចេញ ហើយកំពុងតែធ្វើកំណែទម្រង់ដីធ្លី កែទម្រង់ឡូត៍នេសាទ និងកំពុងតែធ្វើកំណែទម្រង់អ្វីៗផ្សេងទៀត ដើម្បីនាំប្រទេសកម្ពុជាឆ្ពោះទៅកាន់ការរីកចម្រើនថែមទៀត ។
ជាទីបញ្ចប់ សម្តេចតេជោនាយករដ្ឋមន្ត្រីបានស្វាគមន៍សាជាថ្មីចំពោះដំណើរទស្សនកិច្ចរបស់លោកPrabowo Subianto និងសូមឱ្យលោកបានទទួលជោគជ័យនិងសប្បាយរីករាយក្នុងដំណើរបំពេញទស្សនកិច្ចនៅកម្ពុជានេះ ៕
ចែករំលែកព័តមាននេះ