ខេត្តសៀមរាប ៖ កាលពីសប្តាហ៍កន្លងទៅនេះ លោកបណ្ឌិត ណៅ ធួក ប្រតិភូរាជរដ្ឋាភិបាលកម្ពុជាទទួលបន្ទុកជាប្រធានរដ្ឋបាលជលផល បានអញ្ជើញទៅពិនិត្យវាយតម្លៃស្ថានីយផលិតកូនត្រីពូជទឹកវិល មានទីតាំងឋិតក្នុងភូមិជ្រៃ សង្កាត់ទឹកវិល ក្រុងសៀមរាប និងវាយតម្លៃការងារចិញ្ចឹមត្រីនៅមជ្ឈមណ្ឌលអភិវឌ្ឍន៍យោធិនពិការសម្តេច តេជោ ៣១៧ ។
ខេត្តសៀមរាប ៖ កាលពីសប្តាហ៍កន្លងទៅនេះ លោកបណ្ឌិត ណៅ ធួក ប្រតិភូរាជរដ្ឋាភិបាលកម្ពុជាទទួលបន្ទុកជាប្រធានរដ្ឋបាលជលផល បានអញ្ជើញទៅពិនិត្យវាយតម្លៃស្ថានីយផលិតកូនត្រីពូជទឹកវិល មានទីតាំងឋិតក្នុងភូមិជ្រៃ សង្កាត់ទឹកវិល ក្រុងសៀមរាប និងវាយតម្លៃការងារចិញ្ចឹមត្រីនៅមជ្ឈមណ្ឌលអភិវឌ្ឍន៍យោធិនពិការសម្តេច តេជោ ៣១៧ ។
តាមមន្រ្តីវារីវប្បកម្មប្រចាំការនៅស្ថានីយផលិតកូនត្រីពូជបានឱ្យដឹងថា លោកបណ្ឌិត ណៅ ធួក បានផ្តួចផ្តើមឱ្យមានការជួសជុលកែលំអស្ថានីយផលិតកូនត្រីពូជទឹកវិលនេះនៅក្នុងឆ្នាំ២០១១ ដោយស្នើសុំការជួយឧបត្ថម្ភគាំទ្រពី សំណាក់ទីភ្នាក់ងារអភិវឌ្ឍន៍អន្តរជាតិនៃប្រទេសជប៉ុន(JICA)តាមរយៈគម្រោងបង្កើនផលិតភាពនិងផ្សព្វផ្សាយវារីវប្បកម្មទឹកសាបជំហានទី២ ។
លោកបណ្ឌិត ណៅ ធួក មានប្រសាសន៍ថា គោលបំណងនៃការបង្កើតឡើងស្ថានីយកូនត្រីពូជនេះ គឺទី១-សិក្សាស្រាវជ្រាវ អំពីអត្រាផ្តល់ចំណីត្រី និងថែបំប៉នត្រីមេពូជដែលត្រូវយកមកបង្កាត់និងទី២-ផលិតកូនត្រីតាមលក្ខណៈសិប្បនិម្មិតដូចជាប្រភេទត្រីអណ្តែង ត្រីកាបស ត្រីកាបឥណ្ឌា ត្រីឆ្ពិន និងត្រីទីឡាប្យា ។ លោកបណ្ឌិតណៅ ធួក បានមានប្រសាសន៍បន្ថែមទៀតថា សកម្មភាពរបស់ស្ថានីយភ្ញាស់កូនត្រីពូជទឹកវិលកន្លងមករួមមាន កម្មវិធីបណ្តុះបណ្តាលរយៈ ពេលខ្លី លើបច្ចេកទេសភ្ញាស់កូនត្រី និងបច្ចេកទេសចិញ្ចឹមត្រីជាលក្ខណៈគ្រួសារដល់កសិករផងដែរ ។
លោកក៏បានថ្លែងអំណរគុណយ៉ាងជ្រាលជ្រៅដល់បណ្ឌិត SHIRO HARA អ្នកឯកទេសជប៉ុនប្រចាំការនៅស្ថានីយទឹកវិលក្នុងការជួយជាបច្ចេកទេសដល់មន្រ្តីជំនាញរដ្ឋបាលជលផល ឱ្យសម្រេចបានលទ្ធផលគួរឱ្យកត់សម្គាល់ រួមមានផលិតកូនត្រីឆ្ពិនបានចំនួន៤០មឺុនក្បាល កូនត្រីកាបសបានចំនួន១០មឺុនក្បាល កូនត្រីអណ្តែងទន់បានចំនួន៤មឺុនក្បាល កូនត្រីអណ្តែងកូនកាត់បានចំនួន៦មឺុនក្បាល កូនត្រីកាបឥណ្ឌាបានចំនួន៥មឺុនក្បាល និងកូនត្រីទីឡាប្យាបានចំនួន៣មឺុនក្បាល និងឈានទៅពង្រីកប្រភេទពូជត្រីសំខាន់ៗមួយចំនួនទៀតដែលមានតម្លៃលើទីផ្សារ។
ដោយឡែក ក្នុងឱកាសចុះពិនិត្យវាយតម្លៃការងារចិញ្ចឹមត្រីនៅមជ្ឈមណ្ឌលអភិវឌ្ឍន៍យោធិនពិការ សម្តេចតេជោ ៣១៧ គូលែនសៀមរាប ឋិតក្នុងឃុំបល្ល័ង្ក ស្រុកប្រាសាទបាគង លោកបណ្ឌិត ណៅ ធួក បានឱ្យដឹងថា គំនិតផ្តួចផ្តើមដ៏ឧត្តុង្គឧត្តមប្រកបដោយគតិបណ្ឌិតរបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នៅក្នុងការបង្កើតមជ្ឈមណ្ឌលអភិវឌ្ឍន៍យោធិនពិការ ៣១៧គូលែនសៀមរាបនេះឡើង ក្នុងគោលបំណងជួួយលើកកម្ពស់ជីវភាពរស់នៅ របស់យោធិនពិការដែលមានគុណបំណាច់បម្រើឱ្យបុព្វហេតុការពារជាតិមាតុភូមិ មានឱកាសការងារនិងមានមុខរបរចិញ្ចឹមជីវិតនៅនឹងកន្លែងគឺការធ្វើផលិតកម្មកសិកម្មជាលក្ខណៈគ្រួសារ ។
សម្តេចនិងលោកជំទាវបានផ្តល់អនុសាសន៍ដល់រដ្ឋបាលជលផលឱ្យបញ្ចូលការងារចិញ្ចឹមត្រី ដោយប្រើប្រាស់មធ្យោបាយស្រះក្រាលថង់ប្លាស្ទិកនៅតាមក្រុមគ្រួសារយោធិនពិការ ហើយជាលទ្ធផលគឺទទួលបានជោគជ័យជាបន្តបន្ទាប់ និងក្រុមគ្រួសារខ្លះពង្រីកការចិញ្ចឹមពីស្រះមួយក្នុងមួយគ្រួសារទៅស្រះចំនួន២ឬ៣បន្ថែមទៀត ។
លោកបណ្ឌិត ណៅ ធួក មានប្រសាសន៍ថា ផ្តើមចេញពីការបោះជំហានទៅមុខលើការងារចិញ្ចឹមត្រីនេះ រដ្ឋបាលជលផលក៏បានផ្តួចផ្តើមបង្កើតឡើងនូវកន្លែងភ្ញាស់និងផលិតកូនត្រីនៅក្នុងមជ្ឈមណ្ឌលអភិវឌ្ឍន៍យោធិនពិការ៣១៧ នេះតែម្តង ដែលគាំទ្រថវិកាពីអង្គការកែប្រែសហគមន៍អស់ថវិកាប្រមាណ៦.៥០០ដុល្លារអាមេរិក នៅក្នុងទិសដៅជំរុញការងារចិញ្ចឹមត្រីនៅទីនេះឱ្យមាននិរន្តរភាពទៅថ្ងៃអនាគត ។ ក្នុងខណៈនោះដែរ លោកបណ្ឌិត ណៅ ធួក ក៏បានអញ្ជើញចែកកូនត្រីអណ្តែងពូជជូនក្រុមគ្រួសារយោធិនពិការចំនួន២៤គ្រួសារ នៅក្នុងសកម្មភាពពង្រីកការចិញ្ចឹមបន្ថែមទៀត ៕
ចែករំលែកព័តមាននេះ