ផលិតផលឧស្សាហកម្មតំបន់អឺរ៉ុបកើន ០,៦% នៅក្នុងខែកក្កដា បន្ទាប់ពីធ្លាក់ចុះ ០,៦% កាលពីខែមុន ។ តាមតួលេខរបស់ទីភ្នាក់ងារទិន្នន័យ Eurostat បង្ហាញថា ការរើបឡើងវិញនេះ ដោយសារមានកំណើនផលិតកម្មទំនិញឧស្សាហកម្ម ២,៤% ។ទំនិញអន្តរការីកើន ០,១% ខណៈដែលទំនិញប្រើប្រាស់រយៈពេលវែងធ្លាក់ចុះ០,៥% ហើយទំនិញប្រើប្រាស់រយៈពេលខ្លីធ្លាក់ចុះ ០,៦%ដែរ ។ ចំណែកផលិតកម្មថាមពលធ្លាក់ចុះ ១,២% នៅក្នុងរយៈពេលដូចគ្នានេះ ។
នៅទូទាំងប្រទេសសហគមន៍អឺរ៉ុបទាំង២៧ ទិន្នផលឧស្សាហកម្មកើន១,១% នៅក្នុងខែកក្កដា ខណៈកាលពីខែមិថុនា ធ្លាក់ចុះ០,៨% ។ក្នុងចំណោមរដ្ឋសមាជិកទាំងអស់ ប្រទេសដែលមានកំណើនខ្ពស់បំផុត គឺប្រទេសលីទុយអានី មានកំណើន៤,៤% អង់គ្លេសកើន ២,៩% និងដាណឺម៉ាកកើន ២,៣% ។ ចំណែកប្រទេសដែលធ្លាក់ចុះខ្លាំងជាងគេ គឺប្រទេសស្លូវេនី ធ្លាក់ចុះ ២,៣% ប្រទេសហូឡង់ ធ្លាក់ចុះ០,៨% និងម៉ាល់តាធ្លាក់ចុះ០,៥% ។
សេដ្ឋវិទូ បេន ម៉េ (Ben May) ថ្លែងថា បើទោះបីជាមានការរើបឡើងវិញនៅក្នុងខែកក្កដា ក៏ដោយ ក៏រូបភាពទាំងមូលដែលយើងមើលឃើញគឺនៅតែអវិជ្ជមានដដែល ព្រោះថាសេដ្ឋកិច្ចនៅអឺរ៉ុប កំពុងស្ថិតក្នុងវិបត្តិ ។ លោកបន្តថា ខែកក្កដា កើនក៏ពិតមែន ប៉ុន្តែមិនបានផ្លាស់ប្តូរទស្សនៈរបស់យើងថា សេដ្ឋកិច្ចទាំងមូលឥឡូវនេះស្ថិតក្នុងវិបត្តិឧស្សាហកម្មនោះទេ ។ កំណើនប្រចាំខែនេះ គឺជាកំណើនលើកទី២នៅក្នុងរយៈពេល៥ខែ ។ ម្យ៉ាងវិញទៀត កំណើននៅក្នុងខែកក្កដា វាគ្រាន់តែផ្លាស់ប្តូរពីខែមុនប៉ុណ្ណោះ ចំណែកឯអត្រាកំណើនប្រចាំឆ្នាំវិញធ្លាក់ចុះ ៕
ចែករំលែកព័តមាននេះ