ប្រទេសវៀតណាម ៖ ក្រសួងកសិកម្មវៀតណាមបានអះអាងនៅថ្ងៃទី៣ ខែមិថុនា ឆ្នាំ២០២៥ ថា បណ្តាក្រុមហ៊ុនវៀតណាមនឹងចុះហត្ថលេខាលើអនុស្សរណៈនៃការយោគយល់ (MoU) ជាមួយនឹងដៃគូសហរដ្ឋអាមេរិក ដើម្បីទិញកសិផលអាមេរិកមានតម្លៃ២ពាន់លានដុល្លារ…
ប្រទេសវៀតណាម ៖ ក្រសួងកសិកម្មវៀតណាមបានអះអាងនៅថ្ងៃទី៣ ខែមិថុនា ឆ្នាំ២០២៥ ថា បណ្តាក្រុមហ៊ុនវៀតណាមនឹងចុះហត្ថលេខាលើអនុស្សរណៈនៃការយោគយល់ (MoU) ជាមួយនឹងដៃគូសហរដ្ឋអាមេរិក ដើម្បីទិញកសិផលអាមេរិកមានតម្លៃ២ពាន់លានដុល្លារ ដែលជាផ្នែកនៃកិច្ចខិតខំប្រឹងប្រែង ដើម្បីសម្រេចបានកិច្ចព្រមព្រៀងពាណិជ្ជកម្មថ្មីមួយរវាងប្រទេសទាំងពីរ។ យោងតាមប្រភពពីទីភ្នាក់ងារសារព័ត៌មាន Reuters បានចេញផ្សាយ។
ប្រទេសវៀតណាមរងការយកពន្ធរហូតដល់ ៤៦% ដោយរដ្ឋបាលលោក ត្រាំ ទោះបីជាការកំណត់អត្រាពន្ធនេះត្រូវបានផ្អាករហូតដល់ខែកក្កដាយ៉ាងក៏ដោយ តែប្រសិនបើវិធានការពន្ធចូលជាធរមាននោះ វៀតណាមនឹងរងប៉ះពាល់យ៉ាងធ្ងន់ធ្ងរដល់កំណើនសេដ្ឋកិច្ច ដែលពឹងផ្អែកលើការនាំចេញទៅកាន់សហរដ្ឋអាមេរិក ដែលជាទីផ្សារកំពូលរបស់ខ្លួន។
ក្រសួងកសិកម្មវៀតណាមបានបញ្ជាក់ថា កិច្ចព្រមព្រៀងថ្មីដែលបានចុះហត្ថលេខាអំឡុងពេលដំណើរទស្សនកិច្ចទៅកាន់សហរដ្ឋអាមេរិកពីគណៈប្រតិភូក្រុមហ៊ុនវៀតណាមចំនួន ៥០ក្រុមហ៊ុន ដែលដឹកនាំដោយរដ្ឋមន្ត្រីក្រសួងកសិកម្ម លោក Do Duc Duy រួមមានអនុស្សរណៈនៃការយោគយល់ចំនួន ៥ ដើម្បីទិញផលិតផលកសិកម្មតម្លៃ ៨០០លានដុល្លារពីរដ្ឋអាយអូវ៉ា (Iowa) ក្នុងរយៈពេល៣ឆ្នាំ។ ចំណែកអនុស្សរណៈនៃការយោគរបស់រដ្ឋអាយអូវ៉ាពាក់ព័ន្ធនឹងការទិញពោត ស្រូវសាលី គ្រាប់ធញ្ញជាតិស្ងួត និងគ្រាប់សណ្តែកពីវៀតណាម។
បច្ចុប្បន្នវៀតណាម និងរដ្ឋបាលលោក ត្រាំ បាននឹងកំពុងធ្វើការចរចាលើកិច្ចព្រមព្រៀងពាណិជ្ជកម្មមួយ ដោយវៀតណាមបានសន្យាថានឹងអនុញ្ញាតឱ្យមានការនាំចូលពីសហរដ្ឋអាមេរិកបន្ថែមទៀត ដើម្បីបង្រួមគម្លាតពាណិជ្ជកម្មរវាងប្រទេសទាំងពីរ។ ដ្បិតសហរដ្ឋអាមេរិកបានចុះបញ្ជីឱនភាពពាណិជ្ជកម្មតម្លៃ ១២៣ពាន់លានដុល្លារ ជាមួយប្រទេសវៀតណាម កាលពីឆ្នាំមុន។
ទីភ្នាក់ងារសារព័ត៌មានវៀតណាមបានរាយការណ៍ថា ប្រទេសវៀតណាមកាលពីឆ្នាំមុនបានទិញកសិផលរបស់សហរដ្ឋអាមេរិកមានតម្លៃ ៣,៤ពាន់លានដុល្លារ ហើយបាននាំចេញកសិផលរបស់ខ្លួនចំនួន ១៣,៦៨ពាន់លានដុល្លារទៅកាន់សហរដ្ឋអាមេរិក។
នៅក្នុងការចរចានោះ ប្រទេសវៀតណាមក៏បានសន្យាទិញផលិតផលអាមេរិកផ្សេងទៀត រួមទាំងយន្តហោះ Boeing និងឧស្ម័នធម្មជាតិរាវផងដែរ ព្រមទាំងបានសន្យានឹងបង្ក្រាបការក្លែងបន្លំ និងការលួចចម្លងតាមប្រព័ន្ធឌីជីថល បន្ទាប់ពីសហរដ្ឋអាមេរិកបានចោទប្រកាន់ប្រទេសអាស៊ានមួយនេះថា គឺជាមជ្ឈមណ្ឌលដ៏សំខាន់សម្រាប់សកម្មភាពខុសច្បាប់អស់ទាំងនេះ៕
ចែករំលែកព័តមាននេះ