វៀតណាមអនុម័តដំឡើងពន្ធលើភេសជ្ជៈមានជាតិអាល់កុលដល់ ៩០% ត្រឹមឆ្នាំ២០៣១
ទីក្រុងហាណូយ ៖ រដ្ឋសភាវៀតណាមកាលពីថ្ងៃទី១៤ ខែមិថុនា ឆ្នាំ២០២៥ បានអនុម័តផែនការដំឡើងពន្ធពិសេសលើភេសជ្ជៈមានជាតិអាល់កុលចាប់ពី ៦៥% ទៅ ៩០% នៅឆ្នាំ២០៣១…
ទីក្រុងហាណូយ ៖ រដ្ឋសភាវៀតណាមកាលពីថ្ងៃទី១៤ ខែមិថុនា ឆ្នាំ២០២៥ បានអនុម័តផែនការដំឡើងពន្ធពិសេសលើភេសជ្ជៈមានជាតិអាល់កុលចាប់ពី ៦៥% ទៅ ៩០% នៅឆ្នាំ២០៣១ ដែលជាវិធានការមួយក្នុងគោលបំណងកាត់បន្ថយការទទួលទាន ប៉ុន្តែក៏ជាវិធានការមួយបង្កើនសម្ពាធបន្ថែមទៀតលើឧស្សាហកម្ម ដែលកំពុងជួបការលំបាករួចទៅហើយ។ នេះបើតាមប្រភពពីទីភ្នាក់ងារសារព័ត៌មាន Reuters បានចេញផ្សាយ។
ស្ថិតនៅក្រោមច្បាប់នេះ អត្រាពន្ធលើស្រាបៀរ និងស្រាមានជាតិអាកុលខ្លាំង នឹងកើនឡើងដល់ ៧០% នៅឆ្នាំ២០២៧ មុននឹងឈានដល់ ៩០% នៅឆ្នាំ២០៣១។ បច្ចុប្បន្ន វៀតណាមបានដាក់ពន្ធ ៦៥% លើភេសជ្ជៈមានជាតិអាល់កុល ដ្បិតសំណើដំបូងកាលពីឆ្នាំមុនចង់ឱ្យដំឡើងពន្ធរហូតដល់ ១០០%។ ក្រសួងហិរញ្ញវត្ថុវៀតណាមបានអះអាងថា គោលបំណងនៃការដំឡើងពន្ធខ្ពស់ គឺដើម្បីទប់ស្កាត់ការប្រើប្រាស់គ្រឿងស្រវឹង។ យោងតាមរបាយការណ៍របស់ទីភ្នាក់ងារប្រឹក្សាពន្ធ KPMG ក្នុងឆ្នាំ២០២៤ បានឱ្យដឹងថា ប្រទេសវៀតណាម គឺជាទីផ្សារស្រាបៀរធំទីពីររបស់តំបន់អាស៊ីអាគ្នេយ៍។
យ៉ាងណាមិញ ឧស្សាហកម្មស្រាបៀរវៀតណាមជាច្រើន បានប្រឈមមុខនឹងបញ្ហារួចទៅហើយពីច្បាប់ដ៏តឹងរ៉ឹងស្តីពីការទទួលទានគ្រឿងស្រវឹងហើយបើកបរ ដែលបានណែនាំក្នុងឆ្នាំ២០១៩ ដែលកំណត់កម្រិតគ្មានជាតិអាល់កុលសម្រាប់អ្នកបើកបរ។ ដ្បិតប្រធានសមាគមស្រាបៀរ និងគ្រឿងស្រវឹងរបស់ប្រទេសវៀតណាមលើកឡើងថា ប្រាក់ចំណូលក្នុងឧស្សាហកម្មនេះ បានធ្លាក់ចុះក្នុងរយៈពេល៣ឆ្នាំចុងក្រោយនេះ។
ទន្ទឹមជាមួយគ្នានោះផងដែរ រដ្ឋសភាវៀតណាមកាលពីថ្ងៃទី១៤ ខែមិថុនា ឆ្នាំ២០២៥ ក៏បានអនុម័តការយកពន្ធថ្មីចំនួន ៨% លើភេសជ្ជៈដែលមានជាតិស្ករលើសពី៥ក្រាមក្នុង១០០មីល្លីលីត្រ (5g/100ml) ដែលនឹងចូលជាធរមាននៅឆ្នាំ២០២៧ និងកើនឡើងដល់ ១០% នៅឆ្នាំ២០២៨៕
ចែករំលែកព័តមាននេះ