ស្ថានភាពគ្រោះថ្នាក់ចរាចរណ៍រមែងកើតឡើងនៅតាមបណ្តាប្រទេសនានានៅលើពិភពលោក ក្នុងហេតុការណ៍ផ្សេងៗជាក់ស្តែងដូចក្នុងពេលថ្មីៗនេះ នៅប្រទេសនេប៉ាលមានឧប្បត្តិហេតុគ្រោះថ្នាក់ចរាចរណ៍មួយបង្កឡើងដោយរថយន្តក្រុងបួងចង្កូតមិនទាន់ក្រឡាប់ធ្លាក់ចូលក្នុងទន្លេបណ្តាលឱ្យមានអ្នកស្លាប់ចំនួន២៧នាក់ និង១១នាក់ទៀតរងរបួស កើតឡើងកាលពីថ្ងៃទី១១ កញ្ញា កន្លងមក ។
ដោយឡែកនៅថ្ងៃទី១៤ កញ្ញា ក៏កើតមានគ្រោះថ្នាក់ចរាចរណ៍រវាងរថយន្តក្រុងបុកជាមួយរថយន្តដឹកប្រេងនៅប្រទេសអាហ្វហ្គានីស្ថាន បណ្តាលឱ្យមនុស្សយ៉ាងតិច៥០នាក់បានស្លាប់ និងជាច្រើននាក់ទៀតរងរបួសដែលភាគច្រើនជាស្ត្រី និងកុមារ ។តាមទីភ្នាក់ងារព័ត៌មានបរទេសកាលពីថ្ងៃទី១៤ កញ្ញា បានផ្សាយថា មានឧប្បត្តិហេតុគ្រោះថ្នាក់ចរាចរណ៍រវាងរថយន្តក្រុងបុកជាមួយរថយន្តដឹកប្រេងនៅក្នុងខេត្តកាស្នី ប្រទេសអាហ្វហ្គានីស្ថានបង្កការផ្ទុះឆេះបណ្តាលឱ្យមានមនុស្សស្លាប់យ៉ាងតិច៥០នាក់ និងរបួសជាច្រើននាក់ ។
លោកម៉ូហាម៉ាត់ អាលី អាម៉ាឌី អភិបាលរងខេត្តកាស្នី បានថ្លែងថា ហេតុការណ៍នេះបានកើតឡើងនៅម៉ោង៦និង៣០នាទីព្រឹក ម៉ោងនៅក្នុងស្រុក នៅតាមដងផ្លូវក្នុងស្រុកអាប់បាន់ ខេត្តកាស្នី ត្រង់ចំណុចតភ្ជាប់រវាងផ្លូវជាតិពីក្រុងកាប៊ុល ឆ្ពោះទៅខេត្តកាន់ដាហា ភាគខាងត្បូងប្រទេស។ រហូតមកទល់ពេលនេះ អាជ្ញាធរនៅមិនអាចបញ្ជាក់បានថា រថយន្តផ្ទុកប្រេងដែលបុកជាមួយរថយន្តក្រុងនោះជារបស់ក្រុមហ៊ុនណានៅឡើយទេ ។
គួរបញ្ជាក់ថា រថយន្តទាំង២គ្រឿងនេះបុកគ្នាបង្កជាអណ្តាតភ្លើងឆាបឆេះដ៏សន្ធោសន្ធៅនៅបរិវេណកើតហេតុ បណ្តាលឱ្យមនុស្សស្លាប់ភ្លាមៗចំនួន៥០នាក់ និងរងរបួសប្រហែល៦នាក់ ត្រូវអាជ្ញាធរប្រញាប់បញ្ជូនអ្នករងរបួសទៅព្យាបាលនៅមន្ទីរពេទ្យ ៕
ចែករំលែកព័តមាននេះ