ប្រផ្នូលមិនល្អឬយ៉ាងណា? ក្រោយត្រីនាគបានបង្ហាញវត្តមាននៅប្រទេសវៀតណាម
ប្រទេសវៀតណាម ៖ ជារឿងដ៏ភ្ញាក់ផ្អើលបំផុតមួយ ដោយត្រីនាគ ឬត្រី Oarfish ដាច់កន្ទុយមួយក្បាលបានបោកបក់អណ្តែតមកទើរនៅឆ្នេរសមុទ្រ វិញ ហ៊ី (Vinh…
ប្រទេសវៀតណាម ៖ ជារឿងដ៏ភ្ញាក់ផ្អើលបំផុតមួយ ដោយត្រីនាគ ឬត្រី Oarfish ដាច់កន្ទុយមួយក្បាលបានបោកបក់អណ្តែតមកទើរនៅឆ្នេរសមុទ្រ វិញ ហ៊ី (Vinh Hy) ស្ថិតនៅក្នុងខេត្ត នីញ ធួន (Ninh Thuan) ប្រទេសវៀតណាម ដោយបង្កឱ្យមានការភ័យខ្លាចថា អាចជាប្រផ្នូលមិនល្អ។
បើយោងតាមប្រភពពីសារព័ត៌មានវៀតណាម Bao Tuoi Tre ចេញផ្សាយនៅរសៀលថ្ងៃទី១៩ ខែឧសភា ឆ្នាំ២០២៥ បានឱ្យដឹងថា លោក ង្វៀន ថាញ់ចូវ (Nguyen Thanh Chau) ប្រធានភូមិ វិញ ហ៊ី ឃុំ វិញ ហៃ (Vinh Hai) ស្រុក នីញ ហៃ (Ninh Hai) នៃខេត្ត នីញ ធួន បានបញ្ជាក់ថា ត្រីនាគប្រវែង២ម៉ែត្រមួយក្បាលបានដាច់កន្ទុយ ហើយត្រូវបានរលកបោកបក់មកទើរលើឆ្នេរសមុទ្រក្នុងតំបន់ កាលពីថ្ងៃទី១៨ ខែឧសភា ឆ្នាំ២០២៥។ អ្នកស្រុក និងអ្នកទេសចរបានព្យាយាមជួយយកវាទៅដាក់ក្នុងសមុទ្រវិញ ប៉ុន្តែក្រោយមកវាបានងាប់។
ប្រភពដដែលបានបន្តថា ត្រីមួយក្បាលនេះ ត្រូវបានប្រទះឃើញដោយបុគ្គលិកនៅតំបន់ទេសចរណ៍នៅក្បែរទីនោះ ហើយនៅពេលឃើញ ត្រីមួយក្បាលនេះបានដាច់កន្ទុយទៅហើយ។ លោក ង្វៀន ថាញ់ចូវ បានអះអាងថា នេះជាលើកទីមួយហើយ ដែលវត្តមានត្រីនាគបានអណ្តែតមកទើរលើច្រាំងក្នុងភូមិរបស់លោក ហើយបន្ទាប់ពីត្រីងាប់ ប្រជាជនក្នុងតំបន់ និងបុគ្គលិកនៅតំបន់ទេសចរណ៍ក្បែរនោះ បានសម្រេចកប់ត្រីនោះតាមប្រពៃណីទំនៀមទម្លាប់។
វត្តមានត្រីនាគដែកអណ្តែតមកទើរលើឆ្នេរសមុទ្រវិញ ហ៊ី ត្រូវបានប្រជាជនក្នុងតំបន់ និងអ្នកទេសចរថតបាន ហើយបង្ហោះលើបណ្តាញសង្គម ដោយទាក់ទាញអ្នកទស្សនារាប់ពាន់នាក់ និងចែករំលែកបន្តផងដែរ។
អ្នកនេសាទក្នុងស្រុកជាច្រើនជឿថា ត្រីនាគភាគច្រើនរស់នៅក្នុងសមុទ្រជ្រៅ ហើយកម្រលេចវត្តមានឡើងនៅជិតច្រាំងណាស់ វត្តមានរបស់ត្រីនាគចូលទៅក្នុងសមុទ្រវិញ ហ៊ី គឺជារឿងដ៏កម្របំផុតមួយ។ ដ្បិតហេតុការណ៍បែបនេះ ត្រូវបានគេជឿផងដែរថា ត្រីនាគនៅទីណា នៅទីនោះ នឹងកើតមានបាតុភូតធម្មជាតិមិនធម្មតាដូចជា ការរញ្ជួយដី ឬរលកយក្សស៊ូណាមិ ប៉ុន្តែមិនមានភស្តុតាងវិទ្យាសាស្ត្រណាមួយបញ្ជាក់ជុំវិញការអះអាងបែបនេះទេ៕
ចែករំលែកព័តមាននេះ