បា.ត់ខ្លួនថៅកែទុរេនថៃម្នាក់ ដោយមានពាក់មាស៨តម្លឹងជាប់ខ្លួន និងលុយ៣ពាន់ដុល្លារ
ប្រទេសថៃ ៖ បើយោងតាមប្រភពពីបណ្តាសារព័ត៌មានថៃ Thairath, MGR Online និង Kapook កាលពីថ្ងៃទី១៩ ខែឧសភា…
ប្រទេសថៃ ៖ បើយោងតាមប្រភពពីបណ្តាសារព័ត៌មានថៃ Thairath, MGR Online និង Kapook កាលពីថ្ងៃទី១៩ ខែឧសភា ឆ្នាំ២០២៥ បានរាយការណ៍ពីករណីបាត់ខ្លួនស្ត្រីជាថៅកែលក់ផ្លែទុរេនម្នាក់ក្នុងខេត្តស៊ូរ៉ាត់ថានី (Surat Thani) តាំងពីថ្ងៃទី១៧ ខែឧសភា ឆ្នាំ២០២៥ មកម្ល៉េះ ដោយគ្រួសារកំពុងបារម្ភយ៉ាងខ្លាំង ព្រោះស្ត្រីរូបនោះមានពាក់មាស៨តម្លឹងជាប់ខ្លួន និងលុយ៣ពាន់ដុល្លារផងដែរ។
សាច់ញាតិអ្នកស្រី ស៊ូជីត្រា ឬ ចែកែវ អាយុ៤៣ឆ្នាំ ដែលជាម្ចាស់តូបលក់ទុរេននៅឯផ្សារផូវ៉ៃ (Pho Wai) ឃុំបាងគង់ Bang Kung ស្រុកមឿ (Muang) ខេត្តស៊ូរ៉ាត់ថានី បានដាក់ពាក្យបណ្តឹងនៅប៉ុស្តិ៍ប៉ូលិសក្រុងស៊ូរ៉ាត់ថានី បន្ទាប់ពីចែកែវបានបាត់ខ្លួនយ៉ាងអាថ៌កំបាំង តាំងពីម៉ោង ៧:៤០នាទីយប់ នៅថ្ងៃទី១៧ ខែឧសភា មកម្ល៉េះ។ លោក ផុងសាផាន សេតាន់ ដែលជាប្តីចែកែវបានបញ្ជាក់ថា ការបាត់ប្រពន្ធគាត់ពិតជាមិនជាប់ពាក់ព័ន្ធនឹងករណីផិតក្បត់ទេ ប៉ុន្តែលោកសង្ស័យថាជាករណីប្លន់ ដោយជនដៃដល់មានបំណងប្លន់ និងរៀបគម្រោងទុកជាមុន។
គាត់សន្មត់ថា ខណៈពេលដែលប្រពន្ធគាត់កំពុងរង់ចាំអតិថិជនមកយកទុរេននៅម៉ោង៧និង៣០នាទីយប់ នៅមុនពេលអតិថិជនមកដល់ ប្រពន្ធគាត់ប្រហែលជាជិះម៉ូតូចេញពីតូបទៅទិញម្ហូប ហើយប្រហែលជាត្រូវចោរប្លន់នៅពេលនោះ។ ចំណែកទូរសព្ទដៃពីរគ្រឿង ដែលដំបូងបានរាយការណ៍ថាបាត់នោះ ក្រោយមកបានរកឃើញនៅក្នុងតូបប៉ុន្តែសុទ្ធតែអស់ថ្ម។
ប៉ូលិសស៊ើបអង្កេតកំពុងបន្តការងាររបស់ខ្លួន ដោយកំពុងពិនិត្យមើលកាមេរ៉ាសុវត្ថិភាពរបស់ក្រុមហ៊ុនឯកជនដែលនៅក្បែរនោះ ព្រោះកាមេរ៉ារបស់សាលាក្រុងមិនអាចពិនិត្យបានទេ ដោយសារសាលាក្រុងកំពុងជួសជុលខ្សែភ្លើងក្រោមដី និងដកបង្គោលភ្លើងចេញពីតំបន់ ដូច្នេះប្រព័ន្ធកាមេរ៉ាទាំងអស់ត្រូវបានដកចេញ៕
ចែករំលែកព័តមាននេះ